Malaki raw ang gastos… SERYE NINA NADINE AT ALDEN, PINAIKLI

ni Beth Gelena @Bulgary | July 4, 2026

Photo: FB / Sparkle

Umiinit ang streaming battle ng mga bagong serye na maglalaban, ang Someone, Someday (SS) nina Kathryn Bernardo at James Reid at Love, Siargao (LS) nina Nadine Lustre at Alden Richards.

Puksaan ito ng dating magdyowa na sina James at Nadine (JaDine).

Magsisimulang mag-stream sa Netflix sa Hulyo 24 ang SS at ipapalabas naman sa TV ang pilot episode sa Hulyo 27 sa ALLTV2, TV5, A2Z, Kapamilya Channel, Kapamilya Online Live, TFC, at iWant.

Inaasahang magiging malakas ang promosyon ng serye matapos ang motorcade ng cast noong Hunyo 28. 

Kasalukuyan namang ipinapalabas sa Viu ang LS. Ayon sa ulat, mula sa orihinal na 26 episodes, ginawa na lamang itong 22 episodes dahil umano sa mataas na gastos sa shooting sa Siargao at pagtaas ng production cost dahil sa fuel crisis.

Kapag ipinalabas naman sa Netflix ang serye nina Kath at James, marami ang mag-aabang kung makakapasok sa Netflix Top 10 ang kanilang Someone, Someday.

---

Inamin ng aktor-singer na si James Reid na kinakabahan siyang makatrabaho ang isang Kathryn Bernardo sa kanilang teleseryeng malapit nang ipalabas, ang Someone, Someday (SS).

Aniya, malaking karangalan para sa kanya ang makasama ang aktres ngunit may kaakibat din itong pressure dahil isa ito sa pinakamalalaking artista sa industriya.

Wika niya sa isang panayam, “Sa totoo lang, kinakabahan talaga ako. Malaki ang pressure na makatrabaho ang mga malalaking pangalan sa industriya.”

Sa kabila nito, puro papuri naman ang ibinigay niya kay Kath.

Inilarawan niya itong napaka-grounded at hands-on sa proyekto, at ipinaparamdam sa buong cast at crew na parang pamilya lang sila sa set.

Dagdag pa ni James, marami siyang natutunan sa pakikipagtrabaho kay Kathryn at excited na siyang mapanood ng publiko ang kanilang serye.

Ang teleseryeng pagsasamahan nila ni Kath ang magiging comeback TV ng aktor-singer matapos ang ilang taong pagtutok sa kanyang music career.

Aniya, pakiramdam niya ay parang hindi siya umalis sa telebisyon at masaya siyang nakabalik sa pag-arte.

Bukod dito, ibinahagi rin niyang mas espesyal ang proyekto dahil isa rin itong kolaborasyon nila ni Kathryn, na aniya’y isang bagong karanasan para sa kanya.

Si James ang nanalo ng Album of the Year award sa ika-17 Star Awards for Music para sa kanyang album na Jgh.

---

APAT na kilalang personalidad sa showbiz ang ginawaran ng espesyal na korona bilang celebrity ambassadors ng Mrs. Universe Philippines 2026.

Ang mga ito ay sina Kris Bernal, Chariz Solomon, Nathalie Hart, at Kitkat Favia. Bawat isa ay bibigyan ng partikular na adbokasiya na kanilang isusulong.

Sina Kris at Chariz ay magsusulong ng breastfeeding o pagpapasuso. Si Kitkat naman ay magiging tagapagtaguyod ng breastfeeding at HIV (Human Immunodeficiency Virus) awareness.

Si Nathalie Hart ay magsusulong ng kapakanan at pagbibigay-inspirasyon sa mga single mother.

Nagpasalamat si Chariz sa pagkakataong maging kinatawan ng mga ina at sinabi niyang “‘Di nagtatapos ang pangarap mo ‘pag naging ina ka na.”

Samantala, ibinahagi ni Nathalie na napakalapit sa kanyang puso ang adbokasiya para sa mga single mother.

Ayon sa kanya, “Dapat malaman ng bawat ina na ang pagsisimula muli ay ‘di ang katapusan ng kanyang kuwento. Minsan, dito nagsisimula ang kanyang lakas.”

Layunin ng Mrs. Universe Philippines na kilalanin at bigyang-inspirasyon ang mga kababaihan at ina sa pamamagitan ng iba’t ibang adbokasiya at serbisyo sa komunidad.

Ex at bagong dyowa ni Coco, nag-face-to-face… KATHERINE, TODO-SORRY AT HIYANG-HIYA KAY JULIA

ni Beth Gelena @Bulgary | July 3, 2026

Photo: FB / Katherine Luna

Ibinahagi ni Julia Montes ang una nilang pagkikita ni Katherine Luna, ang ex-girlfriend ni Coco Martin, na ngayon ay long-time live-in partner ni Julia.

Sa panayam ni Ogie Diaz, ikinuwento nina Coco at Julia na napanood nila ang video kung saan taos-pusong humingi ng tawad si Katherine kay Coco.

Dahil dito, naantig sila at nagpasyang tulungan siyang makabangon muli sa buhay.

“Nu’ng nagkita nga kami, parang wala na. Okay na ‘yun. Wala nang kahit katiting na sama ng loob. Napakahalaga nu’ng napanood kong humingi s’ya sa akin ng sorry.

Tinanggap ko ‘yun. Nagpakumbaba s’ya kaya nabura na ang lahat,” ani Coco.

Bilang suporta, sinabi nina Coco at Julia na tutulungan nila si Katherine sa pagpapagamot ng kanyang mata at bibigyan din siya ng panibagong pagkakataon sa pag-arte.

Tinupad ng aktor ang sinabi at isinama si Katherine sa bago nilang teleserye ni Julia na Sigabo.

Pag-alala ni Julia sa unang pagkikita nila ni Katherine, “Actually, wala pa kaming malalim na usapan. Pero nu’ng una kaming nagkita ni Ate Katherine, sorry lang s’ya nang sorry at thank you lang nang thank you. Super-bait ni Ate Katherine at nahihiya s’ya sa akin,” sey ng aktres.

Sa parehong panayam, ibinahagi rin ng celebrity couple ang kanilang sikreto sa matatag na relasyon. Ayon sa kanila, ang respeto sa isa’t isa ang pinakamahalagang pundasyon ng kanilang pagsasama.

“‘Yun ang meron kami ni Juls—respeto sa isa’t isa. Maraming definition ang pagmamahal, pero ang respeto, malinaw at iisa lang,” saad ni Coco Martin.

---

Naging bukas si Mikael Daez sa pagbabahagi ng isa sa pinakamalalaking hamon na naranasan niya bilang mister ni Megan Young, lalo na ngayong mga magulang na sila.

Sa panayam sa kanya sa podcast ni Bianca Gonzalez, inamin ni Mikael na noong una ay nakaramdam siya na wala siyang magawa habang nakikita niyang maraming emosyonal at mental na responsibilidad ang pasan ni Megan.

Sey ni Mikael, “Ang pinakamahirap para sa akin ay ang pag-alam kung paano ako makakatulong. Pakiramdam ko nu’n, naroon naman ako at may oras ako, pero ‘di ko alam kung ano mismo ang kailangan kong gawin.”

Sinabi niyang madali lang gawin ang mga gawaing-bahay, ngunit ang tunay na hamon ay kung paano mababawasan ang mental at emosyonal na bigat na dinadala ng kanyang misis.

Sa paglipas ng panahon, natutunan niyang hindi palaging kailangan na siya ang agad na umaaksiyon. Sa halip, mas mahalagang maging handa siyang sumuporta sa tuwing kakailanganin siya ni Megan.

Binigyang-diin din niya na sa tingin niya, mas mabigat ang emosyonal at mental na pasaning dinadala ng maraming kababaihan, lalo na sa pagiging ina at sa pamamahala ng tahanan.

Ayon pa sa kanya, “Mas marami talagang dinadala ang mga babae. Kaya sa anumang pagkakataon na maaari akong tumulong, handa akong gawin ‘yun.”

Dahil sa kanyang mga pahayag, maraming netizens ang humanga kay Mikael at pinuri siya sa kanyang pagiging open, maunawain, at pagbibigay-halaga sa mga sakripisyong ginagawa ni Megan bilang asawa at ina.

ZEINAB, NAGPAGAWA NG P5M DIYAMANTENG NGIPIN

ni Beth Gelena @Bulgary | July 2, 2026

Photo: Zeinab Harake - IG

May tsika ang pambansang Marites na si Christian Albert Gaza sa kanyang Facebook (FB) account tungkol sa ipinagawang ngipin ng vlogger na si Zeinab Harake.

Kuwento ni Gaza, “Last December, nagpunta sa Bangkok si Zeinab para suportahan ang Gilas Pilipinas.”

Nag-bonding daw sila nang magkita at napansin ng content creator ang kanyang veneers, na nagustuhan daw ni Zeinab.

Pagmamayabang daw niya rito, “Well, s’yempre naman, P600K ‘yan, eh.” 

“Nalaman ko na lang last week na nagpakabit pala ng diamond-cut veneers ang g*ga worth P250K each. Diyos ko, P5 million ang isang buong set. Nakakaloka! Ngipin pa lang, eh, house and lot na.”

Patuloy niya (as is), “So nag-DM (Direct Message) ako kay Zeinab sa IG para kumpirmahin kung legit ba o fake news lang ‘yung nasagap kong chika kasi sure ako na wala pa nito sa Southeast Asia. Sa Europe at Dubai ko lang na-heard ang diamond veneers, dumating na pala sa Pinas. Doon sa Dr. RFD na mukhang kapatid sa labas ni Vicky Belo.

“Sa loob-loob ko, paano naging diamond chenelin ‘yan. Parang same same lang naman sa akin.”

Sa video lang daw pala makikita ang pagiging diyamante ng ngipin ni Zeinab Harake.

---

Aktor, ‘di kayang may ibang kahalikan ang misis… OYO AT KRISTINE, ATRAS MAKATRABAHO ANG MGA EX

Ayaw nang makipagtrabaho ng mag-asawang Oyo Boy Sotto at Kristine Hermosa sa kanilang mga ex. Ipinaliwanag ng aktor na personal na desisyon nila ito.

Sa isang Facebook (FB) Reel, sinabi ng aktor na matagal na nilang napagkasunduan ang paninindigang ito at hindi ito dahil may alitan sila sa kanilang mga ex.

Sey ni Oyo, “Kami ni Tin, we both agree. It’s our own personal conviction na ayaw naming makatrabaho ang mga ex namin.”

Ayon pa sa mister ng aktres, isa sa mga dahilan ay ang posibilidad ng mga eksenang may halikan o bed scene, na para sa kanila ay maaaring hindi sila komportable.

Aniya pa, “Parang ako, sa asawa ko, ayoko naman na nakikita kong may kahalikan na ibang lalaki ang asawa ko.”

Nilinaw din niya na hindi nila hinuhusgahan ang ibang artista o mag-asawang may ibang pananaw sa ganitong sitwasyon.

Aniya, personal lamang nila itong desisyon bilang paraan ng pagprotekta sa kanilang pagsasama habang nagpapatuloy sa kanilang karera sa showbiz.

---

NAGBALIK na sa taping sina Daniel Padilla at Kaila Estrada bilang magkapareha. Namataan ang dalawa na magkatugma ang kanilang OOTD (outfit of the day), kapwa nakasuot ng jacket at may hawak na magkaparehong baso sa kanilang mga larawan.

Lumipad na rin ang celebrity pair patungong Mindanao kasama ang production team para sa susunod nilang shooting schedule. Bagama’t hindi pa isiniwalat ang eksaktong lokasyon sa Mindanao, ipagpapatuloy nila ang paggawa ng kanilang proyekto matapos tapusin ang nauna nilang shooting schedule sa ibang lugar.

Kasalukuyan nilang ginagawa ang ikalawang season ng kanilang action series na Incognito, na pinagbibidahan din nina Maris Racal, Ian Veneracion, Baron Geisler at Anthony Jennings. 

Sa ngayon, wala pang kumpirmasyon mula sa production team kung babalik pa ang iba pang cast mula sa unang season.