Marami raw karahasan sa mga eksena… SERYE NI COCO, INIREKLAMO SA MTRCB, TULOY PA RIN

ni Beth Gelena @Bulgary | July 10, 2026

Photo: IG _dreamscapeph

Inireklamo ang seryeng Sigabo ni Coco Martin dahil sa umano’y labis o paulit-ulit na pagpapakita ng karahasan.

Ayon sa Movie and Television Review and Classification Board (MTRCB), nakatanggap ang ahensiya ng mahigit 10 reklamo mula nang mag-premiere ang serye noong Hunyo 22.

Ang mga reklamo ay tumutukoy sa paulit-ulit na mararahas na eksena, suntukan at torture, at masasamang pananalita.

Dahil dito, pinadalo ang production team ng Sigabo sa isang compliance seminar sa ilalim ng programang ‘Responsableng Paggabay’ ng MTRCB.

Layunin ng ahensiya na ipaalala ang mga pamantayan sa content at hindi ito awtomatikong nangangahulugang may ipinataw na parusa. 

Sinabi naman ng kinatawan ng CCM Film Productions na positibo nilang tinanggap ang dayalogo ng MTRCB at nangakong magiging mas maingat upang matiyak na sumusunod ang mga susunod na episodes sa mga alituntunin ng ahensiya.

Sa ngayon, wala pang anunsiyo na suspendido o ipinatigil ang pagpapalabas ng Sigabo. Malinaw na ang isinagawa ay compliance seminar lamang at hindi suspensiyon o pagbabawal.

---

Kahit nag-sorry na raw… NADINE, ‘DI MASIKMURA ANG SINABI NG BASHER KAYA IDINEMANDA

NAGSALITA na si Nadine Lustre hinggil sa reklamong isinampa niya dahil sa mga malisyosong komento online.

Sa mediacon para sa teleserye nila ni Alden Richards na Love, Siargao (LS), isiniwalat ng award-winning actress ang totoong dahilan kung bakit siya nagsampa ng reklamo. 

Noong Mayo 21, 2025, naghain si Nadine sa korte ng reklamong paglabag sa Republic Act No. 11313 o Safe Spaces Act (Bawal Bastos Law) laban sa isang lalaking bumastos sa kanya sa social media.

Pahayag ng aktres, “Merong nag-comment sa Instagram ko, medyo ano s’ya, trigger warning. He was obviously given a sentence and of course, rehabilitation as well. He was going to go through mga seminar for gender sensitivity and all of that.

“May nag-comment kasi sa Instagram ko na I would say leading towards online sexual harassment na s’ya. Nu’ng una, hinayaan ko lang s’ya. I left the comment there. But eventually, after a few days, parang there were people, they were so triggered by the comment. And a lot of people were telling me na sobrang ‘di okay ‘yan. Medyo masama naman talaga and, unfortunately, nag-double down pa s’ya.

“So, nag-add pa s’ya ng comment. Parang may nag-reply sa kanya and then, nag-reply pa s’ya ng mas grabe pa ru’n sa sinabi n’ya… And I don’t wanna say it na. I think naman it’s available online for you to see, just because it’s very triggering.

“I think I did it because, obviously, number one, it wasn’t right to do that. Second, I felt a bit responsible for the comment and I wanted to do something about it. Because parang ‘di ko ma-stomach (masikmura) ‘yung injustice or ‘yung ganu’n na knowing na there are people who actually went through that.

“I just felt it was right. I’ve never talked about this kasi sobrang recent lang din nito although the comment did happen last year. ‘Yung case namin was only closed recently. We filed a case.” 

Aniya pa, “I just wanted people to understand that even if you’re hiding behind the screen, ‘di puwedeng magsalita ka lang ng kung ano’ng gusto mong sabihin to another person. Parang there has to be accountability.”

Sey ni Nadine, todo-sorry sa kanya ang basher o taong nagkakalat ng negativity online.

Kuwento niya, “Nag-apologize s’ya but during that time kasi, grabe kasi ‘yung comment n’ya. But unfortunately, this is something that we wanted to bring to light just because social media is like a war zone right now. Tapos, people can just say the harshest thing to harm a person.”

Base sa kumakalat online, ito ang komento ng basher kay Nadine, “Sana, ma-rape ka ng adik.”

---

Habang nagla-live selling…

ALEX, BINARA NG BASHER, PATI BABY IDINAMAY 

ISANG basher din ang may malisyosong comment sa aktres-vlogger na si Alex Gonzaga tungkol sa kanyang pagbubuntis habang nagla-live selling.

Nanatiling kalmado si Alex at direktang tinugunan ang komento. Mabilis namang sinuportahan ng mga netizens ang celebrity mom at binatikos ang komento ng basher na napakasama at hindi nararapat.

Nangyari ito habang ipino-promote ni Alex ang Paragis Herbal Tea ni Chef Ayb. Kasama ang kanyang tiyuhin, ipinapakita ni Alex ang mga benepisyo ng produkto nang lumitaw ang komento ng isang manonood.

Sey ng basher, “Paano po ‘pag namatay ang baby n’yo? Kaya pa ng paragis?”

Patamang sagot ni Alex, “The fact na nasasabi ng ibang tao ‘yan, ibig sabihin, they are really full of hate.

“‘Yung negativity, hatred, ‘yang anxiety, ‘yang depression... mag-Paragis ka na! Alam mo kung bakit? Kasi ang paragis, nakakatanggal din po ‘yan ng anxiety at panic attack,” sagot pa ni Alex.

Pinuri ang pananatili ng kahinahunan ng younger sister ni Toni Gonzaga at hinikayat siyang balewalain ang ganitong masasamang komento para sa kaligtasan at kapayapaan ng kanyang pagbubuntis.

Ibinuking ni FDCP Chair Joey Reyes, nag-start kay Tirso… SEN. ROBIN, MAY P150 M AMBAG SA PHIL. FILM HERITAGE, BUILDING ‘DI PA RIN NATAPOS

ni Beth Gelena @Bulgary | July 9, 2026

Photo: FB / Robin Padilla

Ibinulgar ni Film Development Council of the Philippines (FDCP) Chairperson Joey Javier Reyes ang malaking budget na naipasok ni Sen. Robin Padilla para sa film heritage.

Aniya, may ambag na P150 million budget para sa Philippine Film Heritage Building.

Inihayag niya na ang pondo ay inaasahang makatutulong upang matapos ang proyekto, ngunit kalaunan ay natuklasan niya na ang gusali ay kalahati pa lamang ang natatapos. 

Aniya, kailangan pa ng karagdagang P100 milyon para makumpleto ang pasilidad matapos siyang maupo sa pamumuno ng FDCP.

Pinasalamatan ni Reyes si First Lady Liza Araneta-Marcos at ang secretary ng Department of Public Works and Highways (DPWH) na si Vince Dizon sa pagtulong upang matiyak ang pagkumpleto ng proyekto.

Kinumpirma rin ni Reyes na ang nakuhang P150M ng senador ay mula sa gobyerno para sa pagsasaayos ng Philippine Film Heritage Building sa Intramuros, Maynila.

Ibinahagi ni Reyes ang kuwento nang mag-guest sa Fast Talk with Boy Abunda (FTWBA) kasama ang kapwa-direktor na si Joel Lamangan, kung saan tinalakay nila ang pagpapaunlad ng pinakahihintay na pasilidad para sa pelikula.

Kuwento niya, “Dumaan kami sa kalahating butas ng karayom. Kasi originally, nu’ng in-estimate ‘yan ng kontratista ni then Chairman Tirso Cruz, ang ibinigay na presyo, P150 million to build that building.

“Tapos binigyan kami ng pera, ng insertion ni Sen. Robin Padilla na P150 million, tapos sabi sa amin, ‘O, tapos na ang building.’”

Nang opisyal na maupo si Reyes bilang chairperson ng FDCP, nagulat siya nang matuklasan na malayo pa rin sa pagiging kumpleto ang proyekto.

Paliwanag pa niya, “Sabi sa amin, tapos na ang building. ‘Di na si Tirso ang chairman, ako na. Pagdating ko, kalahati pa lang (ang nagagawa). Sabi ko, ‘Bakit ganito?’ Sabi nila, ‘‘Yung P150M, Phase 1 pa lang ‘yun, kailangan pa ng another P100M.’

“Sabi ko, ‘Diyos ko, saan ako kukuha ng P100M? Kahit lumuhod ako sa lahat ng senador at congressman, saan ako kukuha ng P100M?’

“Nabanggit ko ang problema at tinanong kung sino (ang contractor), at na-realize ko kasi ang kontratista n’yan, ‘yung tinalo ni Vico (Sotto) sa Pasig, si Discaya (Curlee at Sarah).

“So, du’n medyo pumilantik ang tenga ng First Lady. Anyway, nu’ng pumasok si Vince Dizon (DPWH secretary), ini-require ng First Lady kay Vince na tapusin ‘tong building. Ngayon, tapos na, tapos na, tapos na.”

Layunin ng Philippine Film Heritage Building na maging pangunahing repositoryo ng mga pelikulang Pilipino sa bansa. Dito ilalagak ang mga film collections, memorabilia, at preservation facilities, habang magsisilbi rin itong bagong headquarters ng FDCP, Cinematheque Centre Manila, at Philippine Film Archive.

---

‘Di lang sa mga staff… RYAN, TUMULONG DIN SA MGA BIKTIMA NG LINDOL

Bukod sa pamimigay ng kanyang ipon sa PA (personal assistant) at driver niya, umabot din ang pagtulong ni Ryan Bang sa mga estudyante ng Mahayahay Elementary School sa Davao na naapektuhan ng lindol noong Hunyo.

Aniya, “Nadurog talaga ‘yung puso ko sa sobrang awa sa mga bata. ‘Di naman malaki pero hangga’t kaya ko, ginawa ko ay konting tulong para sa kapwa Pilipino.”

Maraming naantig na manonood sa taos-pusong pagtulong ni Ryan at pinuno ang comment section ng kanyang vlog ng mga mensaheng pumupuri sa kanyang pagkabukas-palad at pagmamahal sa Pilipinas kahit ipinanganak siya sa South Korea.

Sey ng mga netizens…

“Ryan, mahal ka namin. ‘Wag kang magbago kahit kailan. Isa kang biyaya sa lahat ng Pilipino.”

“Happy birthday, pambansang Koreanong pusong Pinoy. Napaka-generous mo, wala kang katulad. Sana’y umabot ka ng 100 taon para marami ka pang matulungan.”

“I am smiling the whole time while watching this vlog. Truly, Ryan has a very pure and kind heart. Super-ramdam sa aura ang kabutihan ni Ryan.”

Bago magtapos ang kanyang vlog, nangako si Ryan na hindi ito ang huling pagkakataon na magbibigay siya ng tulong. Ibinahagi niya na plano niyang magsimulang mag-ipon muli upang patuloy niyang matulungan ang mga Pilipino, lalo na ang mga bata.

“Mag-iipon po ako ulit para sa tutulungang mga kapwa-Pilipino. Nadudurog kasi ‘yung puso ko. S’yempre, ‘yung future ng bansa natin ay nasa mga kabataan.

“Thank you kay Lord na ginagamit ako para magpasaya at makatulong sa mga Pilipino. Thank you so much sa pagmamahal n’yo sa akin, madlang people, at sa mga sumusuporta sa akin kahit hindi malinaw ang pananalita ko,” ang taos-pusong pasasalamat ni Ryan Bang.

---

IPINAGDIWANG ng ina ni Sarah Lahbati na si Esther Lahbati ang kanyang kaarawan kasama ang pamilya, at si Sarah ang nagbigay ng birthday treat.

Ibinahagi ni Esther sa Instagram (IG) ang mga larawan ng kanilang family celebration sa isang restaurant.

Sa caption, nagpasalamat si Esther, “#3rd Birthday celebrations. Thank you, Sarah, for the birthday treat.”

Ipinakita ng mga larawan ang isang simple ngunit masayang salu-salo at mga group photo ng pamilya.

Ipinunto rin ng ulat na nananatiling malapit ang relasyon nina Sarah at ng kanyang ina, at madalas silang magbahagi ng family moments sa social media.

Well, lagi pa ring nababanggit sa mga artikulo ang paghihiwalay nila ni Richard Gutierrez ngunit wala itong kaugnayan sa mismong birthday celebration.

KAI, NAPILI PARA KUMANTA SA TAGALOG VERSION NG THEME SONG NG MOANA

ni Beth Gelena @Bulgary | July 8, 2026

Photo: IG Kai Montinola

Kinuha ng Disney ang aktres at mang-aawit na si Kai Montinola upang kantahin ang Hangganan Ko, ang Tagalog version ng iconic theme song na How Far I’ll Go, para sa live-action adaptation ng Moana.

Ipinalabas ang kanta sa mga digital streaming platforms bago ang debut ng pelikula sa mga sinehan sa Pilipinas ngayong Hulyo 8.

Sinabi ni Kai na ang pagkanta ng Hangganan Ko ay may espesyal na kahulugan para sa kanya dahil matagal na niyang hinahangaan ang kuwento ni Moana tungkol sa paghahanap ng lakas ng loob sa kabila ng kawalan ng katiyakan.

“Ang paborito kong bahagi ng paglalakbay ni Moana ay ang ‘di n’ya pag-iisip na perpekto s’ya. Nagduda s’ya nu’ng una, pero pinili n’yang harapin ang takot na ‘yun at du’n s’ya nakatadhana na gumawa ng mas malalaking bagay,” aniya.

Ayon kay Allie Benedicto, marketing director ng Emerging Southeast Asia ng The Walt Disney Company, layunin ng kolaborasyon na mas ilapit ang mensahe ng pelikula sa mga Pilipinong manonood sa pamamagitan ng isang lokal na bersiyon ng isa sa mga pinakapaboritong kanta sa Disney.

“Matagal nang tumatak sa mga manonood na Pilipino ang Moana dahil sa mga temang pampamilya, katapangan at koneksiyon sa karagatan. Bilang isang bansang may malalim na pagmamahal sa musika, tuwang-tuwa kaming makipagtulungan kay Kai Montinola sa Tagalog version ng How Far I’ll Go,” sabi ni Allie.

Dagdag pa niya, “Si Kai ay sumasagisag sa mga kabataang Pilipino ngayon na puno ng tapang ngunit puno ng pangarap, kaya naman s’ya ang perpektong kumanta ng

Hangganan Ko para sa henerasyon ngayon ng mga tagahanga at manonood ng pelikulang Disney.”

Bilang bahagi ng mga lokal na promosyon ng pelikula, kakanta nang live si Kai sa SM Mall of Asia (MOA) ngayong Hulyo 8 at sa SM Seaside City Cebu sa Hulyo 12.

Inaasahan ding maglalabas ang Disney ng music video ngayong buwan.

Orihinal na isinulat ni Lin-Manuel Miranda at inawit ni Auliʻi Cravalho sa animated film noong 2016, ang How Far I'll Go ay nanalo ng Grammy Award para sa Best Song Written for Visual Media at nakakuha ng mga nominasyon sa Academy Awards at Golden Globe Awards.

Ang live-action na Moana ay pinagbibidahan ni Catherine Lagaʻaia bilang Moana kasama si Dwayne Johnson, na gumaganap bilang Maui. 

---

Misis ni Bossing, excited na rin…

MMFF MOVIE NINA VIC AT VICE, SURE NA RAW NA NO. 1 SA BOX OFFICE

NASASABIK na si Pauleen Luna sa tambalan ng kanyang mister na si Bossing Vic Sotto at ni Vice Ganda.

Opisyal na kasing nagsama ang mga pinakamalalaking komedyante para sa isang pelikulang pinamagatang The Greatest Showdown (TGS).

Ang pinakahihintay na proyekto ay nakatakdang ipalabas sa mga sinehan bilang entry para sa 2026 Metro Manila Film Festival (MMFF), na ikinatuwa ng marami. 

Si Jun Robles Lana ang direktor ng napakalaking pelikula ng taon.

Ibinahagi ni Pauleen ang kanyang matinding pananabik sa Instagram (IG), kung saan binanggit niya kung gaano siya ka-surprise na makitang magkasama ang dalawang box-office stars. 

Ibinahagi ng celebrity mom ang isang sulyap sa opisyal na anunsiyo ng proyekto. Sa unang larawan, makikita ang kanyang asawang si Vic kasama ang box-office

phenomenon na si Meme Vice na parehong nakangiti.

Sa isa pang larawan, makikitang hawak ni Vic ang kamay ni Vice Ganda sa entablado habang nagsasalita sa kanyang mikropono, at pinapanood sila ng mga naghihiyawang tagahanga mula sa balkonahe sa itaas ng mall.

Visual pa lang ay sapat na para magpabaliw sa mga tagahanga. 

“Nakakagulat pa ring makita ang 2-in-1 na frame na ito! @praybeytbenjamin,” masiglang pahayag ni Pauleen sa kanyang caption.

Tiyak, bongga ang bardagulang ito nina Vice at Bossing.

Sa loob ng maraming taon, laging nagna-No. 1 ang parehong pelikula nina Bossing Vic at Vice, kaya marami talagang excited na magsama sila sa isang pelikula.

Idineklara agad ng mga fans na ang The Greatest Showdown ang mangunguna sa darating na MMFF 2026.

Ang tanong, matatapos na ba ang noontime war sa dalawang komedyante, at sino ang mangunguna sa kanila sa billing?

Uhmmm... Nagtatanong lang po!