Sa wakas, naka-isang panalo na ang Tamaraws vs. Eagles

ni Anthony E. Servinio @Sports | October 15, 2023

Mga laro ngayong Linggo – MOA

9:00 AM NU vs. DLSU (W)

11:00 AM UE vs. AdU (W)

1:00 PM NU vs. DLSU (M)

4:20 PM UE vs. AdU (M)

Unang panalo ang naitala sa wakas ng Far Eastern University at pinabagsak ang walang iba kundi ang defending champion Ateneo de Manila University sa overtime, 66-61, sa pagpapatuloy ng 86th UAAP Men’s Basketball Tournament Sabado sa MOA Arena. Umangat sa 5-0 ang numero unong University of the Philippines at tinambakan ang kulelat na University of Santo Tomas, 110-79.

Muntikan na ang Tamaraws at sinayang nila ang 54-39 lamang maaga sa fourth quarter at mainit na bumalik ang Blue Eagles upang ipilit ang overtime, 57-57. Sinigurado ng mga gwardiyang sina LJ Gonzales at Xyrus Torres na hihinto sa apat ang kanilang mga talo.

Winasak ng dalawang shoot ni Gonzales ang 59-59 tabla at sinigura ni Torres ang resulta sa dalawang free throw na may 23 segundo sa orasan. Nagtapos na may 21 puntos at pitong rebound si Gonzales habang 13 si Torres.

Ito na rin ang unang panalo ni Coach Dennis Miranda na itinalaga bago ang UAAP. Unang nakilala siya bilang mahusay na point guard ng Tamaraws na naging daan para sa karera sa PBA.

Bumida sa Fighting Maroons si Harold Alarcon na may 21 puntos. Sumunod ang mga reserbang sina Joel Cagulangan na may 16 puntos at siyam na assist at Lowell Briones na may 14 puntos na parehong naglaro ng tig-17 minuto.

Bunga ng mga resulta, solong pangalawang puwesto ang naghihintay para sa magwawagi ngayong araw sa pagitan ng National University (3-1) at De La Salle University (3-1) sa parehong palaruan simula 1:00 ng hapon.

Pagbagsak sa doping ni Brownlee.. "Atin pa rin ang gold" — Tolentino

ni VA / MC @Sports | October 14, 2023

May malaking dagok ngayon ang pagkapanalo ng Gilas Pilipinas sa 19th Asian Games men's basketball championship.

Ito'y matapos na bumagsak si Gilas Pilipinas naturalized player Justin Brownlee ang itinuturing na bayani sa pagkapanalo ng bansa ng gold medal sa basketball sa unang pagkakataon magmula noong 1962 sa dope test.

Inanunsiyo ng International Testing Agency (ITA) noong Huwebes ng gabi na bumagsak si Brownlee sa “in-competition anti-doping” test.

Base sa resulta, nagpositibo si Brownlee sa Carboxy-THC, isang prohibited substance na Carboxy-THC ng World Anti-Doping Agency na karaniwang dulot ng paggamit ng cannabis. “A sample collected from basketball player Justin Brownlee from the Philippines has returned an Adverse Analytical Finding for Carboxy-THC, a specified Prohibited Substance, according to the Prohibited List of the World Anti-Doping Agency (WADA),” ayon sa statement ng ITA.

“The sample was collected by the ITA at the Asian Games Hangzhou 2022 during an in-competition anti-doping control performed on 7 October 2023,” ayon sa nakasaad sa website ng ITA. “The athlete has been informed of the case. He has the right to request the analysis of the B-samples.”

Ang kaso ni Brownlee ay itataas sa Anti-Doping Division of the Court of Arbitration for Sport para sa kaukulang hatol batay sa Olympic Council of Asia’s Anti-Doping Rules.

Matatandaang matapos umiskor ng 36-puntos sa quarterfinal win kontra Iran, muling pinangungunahan ni Brownlee ang Gilas nang sorpresahin ng mga ito ang host at defending champion China sa semis para umabot ng finals.

Isinalansan ni Brownlee ang 17 sa kabuuang 33 puntos na output sa 4th period upang ungusan ang China, 77-76 na naunang lumamang ng 20-puntos.

Dahil sa kabiguan, hindi nakaabot ang China sa finals ng men’s basketball sa ikatlong pagkakataon sa kasaysayan ng Asian Games.

At sa huling laro kontra Jordan para sa gold medal, nagtala si Brownlee ng double double 20 puntos at 10 rebounds sa kanilang 70-60 na panalo.

Samantala, gaya ni Brownlee nagpositibo rin sa dope test si Sami Bzai ng Jordan sa isang non-specified prohibited substance na dehydrochloromethyl-testosterone metabolite. Wala pa ring pahayag ang Hangzhou Games organizing committee kung may implikasyon ang resulta ng dope test sa final results.

Samantala, mananatili ang basketball gold sa 'Pinas at hindi makakaapekto sa panalo ng bansa sa men’s 5x5 l competition sa nagdaang Hangzhou 19th Asian Games. “The gold remains with us,” ayon kay Philippine Olympic Committee (POC) president Rep. Abraham “Bambol” Tolentino.

Aniya, kung dalawa pa sa Gilas Pilipinas teammates ang nasuring positibo, at saka lamang mababawi ang gold medal.

Tinukoy niya ang Article 11.2 ng Anti-Doping Rule of the International Olympic Committee - “Consequences for Team Sports” that “If more than two members of a team in a Team Sport is found to have committed an anti-doping rule violation … the CAS [Court of Arbitration for Sport] Anti-Doping Division may impose an appropriate sanction on the team (e.g., loss of points, Disqualification from a Competition, Event or the Olympic Games Rio 2016, or other sanction) as provided in the applicable rules of the relevant International Federation, in addition to any consequences imposed upon the individual Athletes committing the antidoping rule violation.”

Unang bumagsak si mountain bike cycling athlete Ariana Evangelista sa “Adverse Analytical Finding” bago ang games.

Si Brownlee ay may hanggang October 19 para i-contest ang result ng A Sample base sa procedures ng IOC, ITA at World Anti-Doping Agency. “All Brownlee needs is to prove his innocence in contesting the result if he allows testing his B Sample,” aniya. May 2-year suspension kung ang B Sample ay lalabas na positive.

10 schools, babanat sa NAASCU sa Cuneta

ni Anthony E. Servinio @Sports | October 14, 2023

Mga laro sa Sabado – MOA

9 a.m. ADMU vs. FEU (W)

11 a.m. UP vs. UST (W)

2 p.m. ADMU vs. FEU (M)

4 p.m. UP vs. UST (M)

Sampung paaralan ang magtatagisan sa pagbubukas ng ika-21 National Athletic Association of Schools, Colleges and Universities (NAASCU) ngayong Oktubre 23 sa Cuneta Astrodome. Hahanapin ng defending champion St. Clare College of Caloocan ang pang-anim na sunod at pangkalahatang ika-7 kampeonato sa Seniors Basketball subalit hindi ito magiging madali at nagpalakas ang lahat ng mga kalahok.

Sisikapin na alisin sa trono ang Saints ng pumangalawa noong nakaraang taon Enderun Colleges at mga naglaro sa Final Four na Our Lady of Fatima University at AMA University. Nais makabawi ng Philippine Christian University at Manuel L. Quezon University habang magbabalik sa liga ang City University of Pasay, New Era University, Holy Angel University at University of Makati.

Lahat ng mga koponan ay apektado ng pagtatapos o paglipat ng kanilang mahahalagang manlalaro subalit natakpan ito ng masipag na paghanap ng kanilang mga kapalit. Tiyak may mga sorpresa ang mga lumiban noong nakaraang taon habang magbabalik ang UMak sa liga matapos maghain ng liban matapos ang 2010-2011.

Ang bagong taon ay hudyat din ng pagbabalik-aksiyon sa Juniors at Women’s Division na huling ginanap noong 2019. Ang St. Clare Junior Saints at Enderun Lady Titans ang mga nagkampeon noon.

Anim ang maglalaro sa Juniors na St. Clare, Enderun, AMA, Fatima, PCU at New Era. Ang anim na nabanggit ay kasali rin sa Women’s at idagdag ang UMak bilang ika-pito.

Matapos ang unang araw sa Cuneta ay iikot ang mga laro sa mga paaralan na wala nang health at safety protocol na kabaligtaran noong Season 20. Ang Novadeci Convention Center, ang eksklusibong tahanan ng NAASCU noong 2022 ay magdaraos ng laro sa playoffs.