8 team sa NBA In-Season Tournament, kumpleto na

ni Anthony Servinio @Sports | November 29, 2023

Kumpleto na ang walong koponan na paglalabanan ang pinakaunang NBA In-Season Tournament matapos ang huling araw ng group stage. Nakuha ng Milwaukee Bucks, Boston Celtics, New York Knicks at Sacramento Kings ang tiket sa bisa ng mga hiwalay na tagumpay.

Naka-shoot si Malik Monk na may pitong segundong nalalabi upang itulak ang Kings sa 124-123 panalo sa Golden State Warriors at walisin ang apat na laro sa West Grupo C. Nanguna si De’Aaron Fox na may 29 habang 21 puntos si Monk.

Tinulungan ng Celtics ang sarili at tinambakan ang Chicago Bulls, 124-97, sa likod ng 30 ni Jaylen Brown. Nagtabla ang Boston, Orlando Magic at Brooklyn Nets sa taas ng East Grupo C sa 3-1 subalit nangibabaw ang Celtics dahil mas malaki ang kanilang kabuuang nilamang sa apat na laro.

Perpekto din ang Bucks sa East Grupo B at dinurog ang Miami Heat, 131-124. Malupit muli si Giannis Antetokounmpo sa kanyang 33 puntos at 10 rebound.

Nahabol ng Knicks ang Wild Card ng East bilang may pinakamataas na kartada sa tatlong pumangalawa sa mga grupo. Iniwan ng New York ang Charlotte Hornets, 115-91, sa halimaw na 25 puntos at 20 rebound ni Julius Randle.

Ang mga magtatapat sa knockout quarterfinals sa East ay ang Milwaukee laban New York at Indiana Pacers kontra Boston. Sa West, magkikita ang Los Angeles Lakers at Phoenix Suns kasabay ng Sacramento at New Orleans Pelicans.

Ang mga magwawagi ay tutuloy sa semifinals na gaganapin sa Las Vegas sa Disyembre 8. Sa parehong lugar din ang laban para sa korona at $500,000 sa Disyembre 10.

Lahat ng laro ng torneo maliban sa finals ay bibilangin sa kinagawiang 82 laro ng bawat koponan. Magkakaroon din na hiwalay na MVP at iba pang mga karangalan.

UP Fighting Maroons, syut na sa finals ng UAAP Men's

ni Anthony E. Servinio @Sports | November 26, 2023

Winakasan ng University of the Philippines ang paghahari ng Ateneo de Manila University sa 86th UAAP Men's Basketball, 57-46, kahapon sa MOA Arena. Hihintayin pa ng Fighting Maroons ang makakalaro nila sa seryeng best-of-three sa De La Salle University o National University.

Depensa muli ang naging susi ng UP at kinailangan nila ito sa gitna ng malamyang simula. Kontrolado ng kampeon Blue Eagles ang first half, 25-22, at determinado silang hindi basta ipamigay ang korona.

Sumandal ang Fighting Maroons kay MVP Malick Diouf at rookie Francis Lopez upang ihatid ang mga mahalagang puntos. Biglang lumamig ang shooting ng Ateneo na naging hudyat ng kanilang pagbagsak.

Parehong nagtala ng tig-12 puntos sina Diouf at Lopez. Sumuporta si Janjan Feicilda sa kanyang 10 puntos. Samantala, haharapin ng University of Santo Tomas ang defending champion NU para sa titulo sa Women's Division. Sinelyuhan ng Growling Tigresses ang tiket matapos talunin ang UP, 87-83.

Pinatunayan ng UST bakit sila ang numero uno sa puntusan at first quarter pa lang ay rumatrat ng 36 kumpara sa 27 lang ng UP. Nagawang humabol ng Lady Maroons subalit hindi nila kakampi ang orasan.

Limang Tigress ang nag-ambag ng 10 o higit sa pangunguna na Kent Pastrana na my 18 puntos. Sumunod si Bridgette Santos na may 14. Malaking bawi ito para sa UST na sinayang ang 45-25 bentahe at tuluyang nagwagi ang UP sa overtime, 88-80, sa unang laro ng seryeng twice-to-beat noong Miyerkules.

UP swak na sa Final 4, Ateneo nakaangat pa

ni Anthony E. Servinio @Sports | November 9, 2023

Mga laro sa Sabado – Araneta

9 a.m. UP vs. DLSU (W)

11 a.m. NU vs. UE (W)

2 p.m. UP vs. FEU (M)

4 p.m. NU vs. UST (M)

Pasok na ang University of the Philippines sa Final Four ng 86th UAAP Men’s Basketball Tournament matapos talunin ang host University of the East, 79-72, sa Araneta Coliseum Miyerkules. Doble ang selebrasyon at balik sa Women’ s Final Four ang UP sa kasabay na 70-55 panalo sa Far Eastern University sa Mall of Asia Arena.

Naging mahirap na kalaro ang UE at bumira ng tres si Jack Cruz-Dumont upang lumapit ng isang puntos lang, 72-73. Nakahinga ang Fighting Maroons sa buslo ni Francis Lopez, 75-72, at nabawi ang bola sa shot clock violation ng Warriors na may 19 segundong nalalabi.

Biglang gumuho ang Warriors at tinapos ng UP ang laro mula sa free throw para umangat sa 9-2 panalo-talo. Bumalik si MVP Malick Diouf mula sa pilay na pulso at nagbagsak ng 19 puntos at 15 rebound habang ginawa ni CJ Cansino ang 10 ng kanyang 17 sa second half.

Sinamahan ng Lady Maroons ang maagang nakapasok na defending champion National University. Nakahugot ng mahusay na numero kay Kaye Pesquera na may 17 at ang trio nina Christie Bariquit, Achrissa Maw at Rizza Lozada na may tig-11 puntos patungo sa kanilang ika-siyam tagumpay sa 11 laro.

Samantala, tinapos na ng defending champion Ateneo de Manila University ang kanilang bihirang tatlong sunod na talo at bigyan ng maagang bakasyon ang University of Santo Tomas, 67-59. Umangat ang Blue Eagles sa 5-6 habang muling hindi mapapabilang ang Tigers sa Final 4 sa pangatlong sunod taon at bumaba sa 1-10.

Sa iba pang resulta sa kababaihan, wagi ang Ateneo sa Adamson University, 69-61, at lumapit din sa Final Four. Nanatiling numero uno ang NU sa 73-64 panalo sa De La Salle University.