Tatakbo sa BSKE na 'nagpaparamdam' na, 6 yrs. kulong — COMELEC

ni BRT @News | August 23, 2023

Binalaan ng Commission on Elections (Comelec) ang mga kakandidato sa 2023 Barangay and Sangguniang Kabataan Elections (BSKE) na iwasang masangkot sa maagang pangangampanya.

Ayon kay Comelec Chairman George Garcia, maaari lamang mangampanya ang mga kandidato sa official campaign period para sa halalan na itinakda sa Oktubre 19-28.

Paliwanag ni Garcia, ang premature campaigning ay may katumbas na kulong na isa hanggang anim na taon at diskwalipikasyon.

“Bawal umikot. ‘Yung pamimigay ng ayuda na wala namang ayudang dapat ipamigay at

hindi naman regular na ginagawa ay pangangampanya na ‘yan,” aniya pa sa isang panayam,

Batay sa calendar of activities na inilabas ng Comelec, magsisimula ang election period sa Agosto 28.

Ang botohan naman ay nakatakda sa Oktubre 30.

Taguig, nanindigang 'di na kailangan ng Writ of Execution sa 10 barangay

ni Gina Pleñago @News | August 19, 2023

Hindi umano kailangan ng Taguig ang isang writ of execution upang ipatupad ang hurisdiksiyon sa Fort Bonifacio Military Reservation na binubuo ng parcels 3 at 4 ng Psu-2031.

Malinaw umanong nakasaad sa desisyon ng Supreme Court na ang 10 barangay sa Parcels 3 at 4 ay kumpirmado at deklaradong nasa teritoryong sakop ng Taguig, na fibal at executory.

Kaugnay nito, awtomatiko umanong maaalis ang mga nasabing barangay sa teritoryo ng Makati City.

Ikinalat umano ng Makati ang sinasabing “initial assessment” mula sa Office of the Court Administrator (OCA) ng SC na naka-address sa Executive Judge ng RTC Makati kung saan ang opinyon sa "desisyon ng SC" ay mayroong writ of execution bago ang pagdinig sa korteng pinagmulan” na ipatutupad ng DILG.

Binigyang-linaw ng Taguig na ang nasabing opinyon at pahayag ay walang puwersa sa batas at hindi nagbubuklod sa Taguig.

Pondo ng SK, nauubos — NYC.. Paggastos sa liga at beauty contest, stop

ni BRT @News | August 14, 2023

Bibigyan ng bagong direksyon ang Sangguniang Kabataan (SK) lalo na sa paggamit ng kanilang pondo na dapat umano'y nakatuon sa mga programa na naaayon sa nation-building policies ng gobyerno.

Sa isang Pulong-Balitaan, kinuwestiyon ng National Youth Commission (NYC) ang paggamit ng SK sa kanilang pondo.

Kalimitan umano sa pondo ng SK ay nauubos sa pa-liga o pa-beauty contest.

Dahil dito, inilahad ni NYC Usec. Ronald Cardema na magpapasa sila ng resolusyon hinggil sa tamang paggamit ng SK sa kanilang pondo na dapat nakatuon sa nation-building.

“Magpasa kami ng resolution ngayon directing the SKs, especially the upcoming SKs na ang inyong pondo gagamitin n'yo doon sa policies ng ating bansa for nation-building,” ani Cardema.

Kabilang umano sa dapat bigyang prayoridad ng SK sa kanilang pondo ang disaster preparedness, barangay clean-up tulad ng anti-vandalism, at feeding program para sa mga malnourished na kabataan sa kanilang komunidad.

Nais din umano nilang patutukan sa SK ang pagtataguyod ng isang ‘help desk’ kung saan makakatakbo ang mga kabataang biktima ng karahasan o pang-aabuso.

Una nang nabatid mula kay Department of Justice (DOJ) Sec. Jesus Crispin Remulla na higit sa kalahating benepisyaryo ng kanilang Witness Protection Program ay napupunta sa mga batang nagagahasa.

Maglulunsad din umano sila ng isang national nation-building event kada buwan para sa mga magiging bagong-halal na SK official.

“Mapatunayan nila na sila ang pag-asa ng bayan. 'Yung mga sitwasyon sa bansa na alam n'yo sa utak n'yo na wala ng pag-asa 'yan, bubuhayin natin 'yung titulo nila na pag-asa sila ng bayan. Gugulatin natin ang lipunan na naayos pala kada buwan ang ating bansa sa pamamagitan ng Sangguniang Kabataan,” ani Cardema.