Northern at Eastern Samar, binaha

ni Eli San Miguel - Trainee @News | November 21, 2023

Nagdulot ng pagbaha sa mga lalawigan ng Northern at Eastern Samar dahil sa pag-ulan na dulot ng shear line, ngayong Martes.

Patuloy na binabaha ang kabuuang 55 barangay sa bayan ng Catarman na siyang kabisera ng Northern Samar.

Nagdulot ang 12 oras na walang-tigil na pag-ulan ng mga 2 metro ng baha sa mga mababang lugar, na nagtulak sa mga residente na gumamit ng mga bangka habang naglalakbay sa bayan.

Patuloy naman ang mga awtoridad sa pagpapatupad ng mga operasyon sa pag-rescue sa buong bayan.

Habagat at LPA, joint forces.. M. Mla., lubog sa baha

ni Mai Ancheta @News | September 24, 2023

Nagmistulang ilog ang maraming lugar sa Metro Manila matapos bumaha dahil sa malakas na pag-ulan kahapon.

Dahil dito, maraming motorista ang hindi makadaan at makabiyahe dahil sa mataas na tubig-baha gaya ng ilang bahagi ng EDSA sa tapat ng gate 3 ng Kampo Aguinaldo.

Hindi umubra ang mga maliliit na sasakyan na dumaan sa lugar kaya nagkabuhol-buhol ang daloy ng trapiko.

Mataas din ang tubig-baha sa 29th Avenue, Cubao, Quezon City, bahagi ng P. Tuazon sa Project 4, Espana sa Lungsod ng Maynila, at sa Taft Avenue.

Lagpas tuhod din ang tubig-baha sa Ramon Magsaysay boulevard eastbound at hindi kayang matawid ng maliliit na sasakyan kaya usad-pagong ang mga sasakyan.

Ang naranasang ulan ay dahil sa low pressure area at habagat.

Grabeng trapik, mga sasakyan tumirik.. SLEX, lubog sa baha

ni Mai Ancheta @News | July 14, 2023

Naperwisyo ang maraming motorista dahil sa naranasang matinding trapik malapit sa Bicutan exit ng South Luzon Expressway dahil sa hanggang binting taas ng baha.

Miyerkules pa lamang ng gabi ay nakaranas na ng matinding trapik ang mga motorista dahil sa sirang drainage na sinabayan ng walang tigil na pag-ulan hanggang nitong Huwebes.

May mga sasakyan na tumirik dahil sa mataas na baha at ang mabagal na pag-usad ng mga sasakyan ay umabot hanggang sa Southwoods Exit, Alabang Exit at Skyway exit.

Pasado ala-1 naman ng hapon nitong Huwebes ay bumper-to-bumper din ang trapik sa bahagi ng Magallanes at Osmeña highway kaya maraming motorista ang hindi nakarating sa kanilang destinasyon sa takdang oras.

Ayon sa Toll Regulatory Board (TRB), isang drainage outlet ang nasira sa bahagi ng Bicutan noon pang Pebrero habang nagsasagawa ng expansion ang isang mall at hanggang ngayon ay hindi pa ito nakukumpuni.

Dahil bumuhos ang malakas na ulan nitong Miyerkules at Huwebes, nagdulot ito ng matinding pagbaha na namerhuwisyo sa maraming motorista.

Nagtutulungan ang mga tauhan ng Metro Manila Development Authority (MMDA) at Skyway sa pag-pump ng tubig upang bumaba ang baha sa lugar.

Nakipag-ugnayan na ang Skyway Corporation sa Department of Public Works and Highways (DPWH) at iba pang stakeholders upang malutas ang problema sa pagbaha sa bahagi ng SLEX.