Bagyong Egay, nag-iwan ng 14 patay, P2B pinsala

ni Mai Ancheta @News | July 30, 2023

Nag-iwan ng pinsalang tinatayang dalawang bilyong pisong halaga ng mga istruktura at produktong agrikultura ang Super Typhoon Egay matapos manalasa sa ilang lugar sa bansa.

Batay sa inisyal na pagtaya ng National Disaster Risk Reduction and Management Council, nasa mahigit P1,101,137,970 ang mga nasirang istruktura habang nasa mahigit P833 milyon ang nalugi sa agrikultura.

Ayon kay NDRRMC Spokesman Edgar Posadas, inaasahang tataas pa ang halaga ng pinsalang iniwan ng Bagyong Egay dahil mayroon pa silang bina-validate na impormasyon sa Region 1.

Umabot na rin sa 14 ang opisyal na naitalang namatay dahil sa pananalasa ng bagyo, at

hindi kasama ang mga nasawi sa lumubog na passenger boat sa Binangonan, Rizal.

Marami rin ang naitalang nawawala kabilang ang apat na personnel ng Philippine Coast Guard (PCG) at pitong crew ng isang tugboat na kanila sanang sasaklolohan sa Aparri, Cagayan.

Siyam katao rin ang naiulat na nawawala dahil sa Bagyong Egay sa mga lalawigan ng Benguet, Abra, at Apayao.

13 dedbol kay 'Egay'

ni BRT @News | July 29, 2023

Iniulat ng National Disaster Risk Reduction and Management Council (NDRRMC) na nadagdagan pa ang bilang ng mga napaulat na nasawi sa pananalasa ng Bagyong Egay.

Batay sa pinakahuling datos na inilabas ng ahensya kahapon, pumalo na sa 13 ang bilang ng iniwang patay ng naturang bagyo.

Mula sa naturang bilang, anim ang beripikado na kung saan 5 ang naitala sa CAR, habang ang isa naman ay nagmula sa Region 6.

Sa ngayon, nasa pitong mga napaulat na nasawi naman ang kasalukuyan pang isinasailalim ng kagawaran sa validation.

Samantala, iniulat din ng NDRRMC na mayroon din itong naitalang 12 indibidwal na nasugatan, habang 20 katao naman ang napaulat na nawawala.

State of calamity sa Abra at Mountain Province

ni Mai Ancheta @News | July 29, 2023

Inilagay sa state of calamity ang mga lalawigan ng Abra at Mountain Province dahil sa matinding pinsalang iniwan ng Bagyong Egay.

Inaprubahan ng sangguniang panlalawigan ng nabanggit na mga lugar ang rekomendasyon ng kanilang disaster councils na magdeklara ng state of calamity upang mapabilis ang relief at rehabilitasyon ng mga iniwang pinsala ng kalamidad.

Batay sa report ng Mountain Province Disaster Office, nag-iiwan ng tinatayang P350 milyong halaga ng pinsala sa mga pananim at ari-arian ang Bagyong Egay sa 10 munisipalidad.

Maraming mga bahay at mga pananim ang nalubog sa baha sa Abra bukod pa sa mga imprastrakturang napinsala dahil sa bagyo.

Naunang nagdeklara ng state of calamity ang lalawigan ng Ilocos Norte at Dagupan City dahil sa matinding pinsalang idinulot ng bagyo.