Parusa sa pag-display ng certificate of registration ng pharmacist

sa botikang hindi niya pinagtatrabahuhan

ni Atty. Persida Rueda-Acosta - @Magtanong Kay Attorney | April 30, 2022

Dear Chief Acosta,

Napag-alaman ko po na pinaskil at ginagamit ng aking tiyahin ang aking certificate of registration bilang isang pharmacist sa kanyang botika, kahit na hindi naman ako roon nagtatrabaho. Ano po ang maaaring maging kaparusahan niya sa paggamit ng aking lisensya?

Misa

Dear Misa,

Para sa inyong kaalaman, ang batas na sumasaklaw sa inyong katanungan ay ang Section 45 ng Republic Act (R. A.) No. 10981, o kilala rin sa tawag na “Philippine Pharmacy Act,” kung saan nakasaad na:

“Section 45. Penal Provisions. - Any person who shall commit any of the following acts shall, upon conviction, be sentenced to pay a fine of not less than two hundred fifty thousand pesos (₱250,000), but not exceeding five hundred thousand pesos (₱500,000) or imprisonment of not less than one (1) year and one (1) day but not more than six (6) years, or both, at the discretion of the court: x x x;

(c) Displaying of the pharmacist’s COR by pharmacy owners/operators in a pharmaceutical establishment where the pharmacist is not employed and practicing;” (Binigyang-diin)

Sang-ayon sa nabanggit, ang isang taong dini-display sa isang establisimyento ang certificate of registration ng isang pharmacist, na hindi naman nagtatrabaho sa nasabing establisimyento, ay maaaring maparusahan ng pagbabayad ng fine na hindi bababa sa dalawandaan at limampung libong piso (₱250,000) at hindi lalagpas sa limandaang libong piso (₱500,000) o / at pagkakakulong ng hindi bababa sa isang taon at isang araw ngunit hindi lalagpas sa anim na taon, sang-ayon sa magiging desisyon ng korte. Kaya naman, maaaring maparusahan ng mga nabanggit na kaparusahan ang inyong tiyahin dahil sa pagpaskil niya ng inyong certificate of registration sa kanyang botika, kahit na kayo ay hindi naman nagtatrabaho roon.

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.

12-Anyos, paulit-ulit sumakit ang ulo, dibdib, at hinika bago namatay sa Dengvaxia

ni Atty. Persida Rueda-Acosta - @Daing mula sa hukay | April 29, 2022

Ang mga lola at lolo ay mahahalagang miyembro ng pamilya na may hindi matatawarang pagmamahal at pagmamalasakit sa kanilang mga mahal sa buhay. Kapag ang kanilang mga apo ang nangangailangan ng pagkalinga, marami sa kanila ang ramdam ang bilis ng kanilang pagtalima at init ng pagtanggap sa nasabing mga apo. Kabilang sa mapagmahal na lolo si G. Luisito Briones, Sr., ng Magalang, Pampanga, lolo ni Justine Briones, na nagpalaki, sumama at gumabay sa kanya sa maikling paglalakbay nito sa buhay.

Ani G. Briones, “Ako at ang aking asawa ang nag-alaga at nagpalaki kay Justine at sa kapatid nito mula nang siya ay Grade 1 dahil ang aking anak na si Luisito Briones, Jr. at asawa nitong si Honey Rose ay nagpasyang maghiwalay. Ang ama ni Justine ay kasalukuyang nagtatrabaho sa Saudi Arabia at ang ina naman niya ay nakatira sa Angeles City.”

Si Justine, 12, namatay noong Enero 1, 2019, ang ika-107 sa mga naturukan ng Dengvaxia at nakaranas ng sintomas na kasama sa common pattern of four serious adverse effects (anaphylactic allergic reaction, viscerotropism (pamamaga, paglaki at pagdurugo ng laman-loob), neurotropism (pamamaga at pagdurugo ng utak), and increase in severity of dengue disease) na sumasang-ayon sa Sanofi Declaration of Four (4) Identified and Expected Risks in its Submission for Authorization sa Food and Drug Administration (FDA) {22 Disyembre 2015} — na sumailalim sa forensic examination ng PAO Forensic Team, pagkatapos hilingin ng kanilang mga pamilya. Siya ay tatlong beses naturukan ng Dengvaxia; una noong June 6, 2016; pangalawa noong December 16, 2016 at pangatlo noong November 7, 2017. Ang nagsabing pagtuturok ay nangyari sa kanilang paaralan. Ayon sa kanyang lolo at ina, si Justine ay masayahin, masigla at malusog na bata. Kailanman ay hindi siya nagkaroon ng dengue o iba pang malubhang karamdaman, na nangangailangan siyang madala sa ospital, bukod nitong kamakailan kung saan siya ay malubhang nagkasakit na naging sanhi ng kanyang pagpanaw.

Noong Disyembre 25, 2018, dinalaw ni Aling Honey Rose si Justine at kapatid nito para ihatid ang kanyang mga regalo sa kanila. Aniya, wala siyang napansin na kakaiba kay Justine, bukod sa matamlay ito, ngunit kumakanta pa rin. Gayunman, sa sumunod na mga araw ng Disyembre 2018, ganito ang nangyari kay Justine:

• Disyembre 26 - Napansin ni Mang Luisito na nahihirapang huminga si Justine na tila hinihika. Masakit diumano ang kanyang dibdib, ulo at tiyan, kaya pinainom siya ng paracetamol.

• Disyembre 27, alas-8:00 ng umaga - Dahil hindi bumuti ang kanyang kalagayan, dinala siya ng kanyang lolo sa isang ospital sa Pampanga at dalawang beses na isinailalim sa x-ray. Pinauwi rin siya dahil walang kakaiba sa resulta ng x-ray.

• Disyembre 28 at 29 - Hindi nagbago ang kalusugan ni Justine. Sumasakit pa rin ang kanyang ulo, tiyan at dibdib, at hirap siyang huminga. Kinabukasan, dinala ulit siya sa naturang ospital. Niresetahan siya ng gamot para sa ubo at lagnat, at saka pinauwi. Pagdating sa bahay, oras-oras na hinihika si Justine. Pinapausukan siya, subalit hindi nawala ang kanyang hika. Nagpatuloy ito hanggang sa sumunod na araw.

• Disyembre 3 - Magkasabay na hinihika at sumasakit ang ulo ni Justine. Sumakit din ang kanyang dibdib. Hirap na hirap siya at nagtatalon sa sobrang sakit. Nagsabi siya sa kanyang lola na hindi na niya kaya ang sakit na nararamdaman; nawalan siya ng malay. Nakadumi at nakaihi na rin siya sa kanyang salawal. Dinala siya muli sa nabanggit na ospital, kung saan nilagyan siya ng tubo at sinabihan ang kanyang pamilya na kailangan siyang ilipat sa ibang ospital na kanila namang ginawa. Sa nilipatang ospital, pinump si Justine at sinabihan ang kanyang lolo na ililipat na siya sa intensive care unit (ICU). Ipinaalam ng kanyang lolo sa kanyang mga magulang ang kanyang kalagayan.

Sinabi nito na ayon sa doktor, nasa 20-30% lamang ang tsansang mabuhay si Justine. Naging hysterical ang ama ni Justine nang malaman ang sinapit ng anak. Samantala, si Aling Honey Rose naman ay dali-daling pumunta sa nilipatang ospital. Aniya, “Du’n ko nakita ang sobrang paghihirap ni Justine. Sobrang hirap siya habang nasa ICU hanggang sa tuluyan siyang pumanaw nang alas-11:55 ng umaga noong January 1, 2019.”

Anang kanyang ina at lolo, “Napakasakit para sa amin ng pagpanaw ni Justine. Pumanaw siya nang Bagong Taon kung saan ang bawat pamilya ay dapat nagsasaya. Masigla at malusog siyang bata, kaya nakapagtataka na matapos niyang maturukan ng Dengvaxia ay biglang nagbago ang estado ng kanyang kalusugan.”

Ang higit pang ikinasasakit ng loob ng lolo ni Justine ay ang pagbalewala ng desisyon niya sa pagtuturok ng Dengvaxia. Hindi niya umano pinirmahan ang consent form, ngunit binakunahan pa rin siya at nalaman lamang ito nang siya ay magtapos sa elementarya dahil ibinigay ang kanyang Dengue Vaccine Immunization Card.

Dahil dito, mariin siyang naninindigan na kailangang may managot sa naging kapabayaan ng mga taong nagbakuna kay Justine. Sa dulo ng laban para sa paninindigang ito, inaasahan niya at ng buo niyang pamilya na sa tulong ng aming tanggapan ay makakamit nila ang katarungan.

Isa na namang buhay ang nawala dahil sa kapabayaan ng ilang tao na sana’y nangangalaga sa kalusugan ng mga kabataan. Tulad ng paninindigan ng pamilya ni Justine na lumaban sa mga higanteng kalaban, magpapatuloy ang aming tanggapan sa pagbibigay ng tulong-legal hanggang sa makamit ng mga batang ito ang hustisyang nararapat para sa kanila.

Karapatan ng buyer sa public auction sale

ni Atty. Persida Rueda-Acosta - @Magtanong Kay Attorney | April 28, 2022

Dear Chief Acosta,

Ako po ay nakabili ng lupa sa isang public auction sale sa aming lalawigan. Mangyari ay matapos ang isang taon ng paghihintay, hindi po biniling muli ng tunay na may-ari ang lupa at akin na po itong ipinarehistro sa aking pangalan. Matapos ito, tumawag po sa akin ngayon ang may-ari at sinasabi niyang kailangan niyang makuha ulit ang lupa. Ipaglalaban diumano po niya ang kanyang karapatan dito sa korte dahil mula pa sa kanyang mga ninuno ito kung hindi ko ito ibebenta muli sa kanya. Nais ko lamang po malaman kung maaari pa nila itong tubusin sa akin kahit lagpas na ang isang taong palugit at ito ay nairehistro ko na sa aking pangalan. May kailangan po ba akong bayarang bond para sa aking pagpaparehistro? Maraming salamat po.

Jolo

Dear Jolo,

Para sa inyong kaalaman, kinikilala ng ating batas at ng ating Kagalang-galang na Korte Suprema sa mga kasong Cua Lai Chu vs. Laqui (G.R. No. 169190, 11 February 2010, Ponente: Honorable Former Associate Justice Antonio T. Carpio), at Philippine National Bank vs. Sanao Marketing (G.R. No. 153951, 29 July 2005, Ponente: Honorable Former Associate Justice Dante O. Tinga), ang karapatan ng isang purchaser o buyer sa public auction sale/ foreclosure sale bilang absolute owner ng ari-ariang kanyang binili kung hindi ito tinubos ng tunay na may-ari sa loob ng isang (1) taon o sa loob ng panahon ng palugit na ibinibigay ng batas, matapos mairehistro ang sale na naganap, sa wastong Registry of Deeds.

Makalipas ang isang (1) taong palugit upang matubos ang ari-arian at hindi ito nagawa ng tunay na may-ari, maaari nang iparehistro ng purchaser o buyer at ipalipat sa kanyang pangalan ang ari-arian sa wastong Registry of Deeds nang walang pag-aalinlangan. Sa pagkakataong ito, siya rin ay may karapatan na mapasakamay ang kanyang nabiling ari-arian.

Hindi na kinakailangang magbigay pa ng bond ang purchaser o buyer sang-ayon sa Section 7 ng Act No. 3135 o batas para sa pagpaparehistro ng lupa sa puntong ito. Ang mga karapatang pag-aari at pagkamit ng ari-arian ay nailipat na sa purchaser o buyer matapos ang isang (1) taon at ang pag-issue ng writ of possession ay ministerial duty na lamang ng Korte.

Samakatuwid, kahit pa mahalaga ang ari-arian sa tunay na may-ari at hindi nila ito gustong mapunta sa ibang tao, hindi ito magiging sapat na dahilan upang pasubalian pa ang karapatan ng purchaser o buyer sa public auction sale/ foreclosure sale, gaya ninyo, kung hindi nila ito tinubos sa loob ng isang (1) taon na binigyan sila ng pagkakataon ng batas na gawin ito.

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.