Ex-Pres. Noynoy Aquino, nailibing na sa Manila Memorial Park

ni Ronalyn Seminiano Reonico | June 26, 2021

Nailibing na si dating Pangulong Benigno "Noynoy" Aquino III sa Manila Memorial Park sa Parañaque City ngayong Sabado nang hapon.

Inilagak ang abo ni ex-P-Noy sa tabi ng puntod ng kanyang mga magulang na sina Benigno Aquino Jr. at dating Pangulong Corazon Aquino.

Bago ito ay binigyan ng arrival/military honors ang dating pangulo pagdating sa Memorial Park mula sa Church of Gesu ng Ateneo de Manila University kung saan idinaos ang funeral mass kung saan si Lingayen, Dagupan Archbishop Socrates Villegas ang nagbigay ng Homily.

Daan-daan ang nagluksa at nakiramay sa magkakapatid na Aquino na sina Kris Aquino, Victoria Elisa Aquino-Dee, Ballsy Aquino-Cruz, at Pinky Aquino-Abellada at karamihan sa mga ito ay nakasuot ng itim at dilaw na damit. May iba ring nagdala ng kulay dilaw na ribbon.

Samantala, nagsagawa rin ng water salute ang Bureau of Fire Protection para sa dating pangulo.

Abo ni P-Noy, dinala sa Ateneo campus para sa public viewing

ni Ronalyn Seminiano Reonico | June 25, 2021

Dinala ang urn ni dating Pangulong Benigno "Noynoy" Aquino III sa Ateneo de Manila University campus sa Quezon City ngayong Biyernes nang umaga para sa public viewing mula alas-10 hanggang 10 PM.

Nasa loob ng Church of the Gesu ang urn at mula sa Green Meadows Subdivision ay mabilis itong nadala sa Ateneo campus.

Samantala, 100 katao per batch lamang ang maaaring pumasok sa simbahan upang magbigay ng kanilang last respect sa dating pangulo para maiwasan ang dagsa ng mga tao. Una na ring nanawagan ang pamilya Aquino sa mga nais makiramay na sundin ang health protocols at ang social distancing.

Noong Huwebes nang umaga pumanaw ang dating pangulo sa edad na 61. Ayon sa pahayag ng pamilya Aquino na binasa ng kapatid ni P-Noy na si Pinky Aquino-Abellada, alas-6:30 AM idineklarang patay ang dating pangulo dahil sa renal disease secondary to diabetes.