Ex-military officer Parlade, bagong deputy director-general ng NSC

ni Lolet Abania | September 9, 2021

Itinalaga ni Pangulong Rodrigo Duterte si retired military officer Antonio Parlade Jr. bilang deputy director-general ng National Security Council, batay sa pahayag ng Malacañang ngayong Huwebes.

Ayon kay Presidential Spokesperson Harry Roque, pinirmahan ni Pangulong Duterte ang appointment paper ni Parlade nitong Miyerkules.

“Deputy Director-General [DDG] Parlade faithfully served the Armed Forces of the Philippines for many years until his retirement from the service. We are therefore confident that his length of fruitful service in the military would immensely contribute to the crafting of plans and policies affecting national security,” ani Roque.

“We wish DDG Parlade well in his new assignment,” dagdag ng kalihim.

Matatandaang isa si Parlade sa mga spokespersons ng National Task Force to End Local Communist Armed Conflict (NTF-ELCAC).

Naging kontrobersiyal si Parlade matapos ang mga binitawan nitong mainit na pahayag hinggil sa pagkakaugnay umano ng ilang personalidad sa communist movement.

Ayon kay Senador Panfilo Lacson, ang designation ni Parlade bilang spokesperson ng naturang ahensiya ay paglabag sa constitutional prohibition hinggil sa pagtatalaga ng isang aktibong miyembro ng Armed Forces sa isang civilian position sa gobyerno.

Gayunman, nag-resign si Parlade sa NTF-ELCAC bago pa umabot sa kanyang retirement noong Hulyo.

Bago pa mag-retire... Parlade, nagbitiw na sa NTF-ELCAC

ni Lolet Abania | July 1, 2021

Nagbitiw na sa puwesto si Lieutenant General Antonio Parlade, Jr., ang kontrobersiyal na pinuno ng Southern Luzon Command (SolCom) ng military sa National Task Force to End Local Communist Armed Conflict (NTF-ELCAC).

Ayon kay Parlade, nag-resign siya sa tungkulin sa NTF-ELCAC isang buwan na ang nakararaan para mabawasan ang pressure sa mga lider ng task force na kinukuwestiyon ng mga mambabatas hinggil sa kanyang designasyon bilang kanilang spokesperson.

“Yes, I have submitted my letter of resignation addressed to the President almost a month ago,” ani Parlade sa isang text message.

“I want to ease the pressure to the NTF ELCAC principals who are being questioned by legislators for designating me in spite my being in the active service,” sabi niya.

Una nang sinabi ni Department of National Defense Secretary Delfin Lorenzana na nagbitiw na si Parlade sa NTF-ELCAC maraming linggo na ang nakararaan.

Ayon kay Lorenzana, hindi lamang niya batid kung kukunin ulit si Parlade ng NTF-ELCAC matapos ang retirement sa military service sa July 26.

“He has resigned from ELCAC many weeks ago. I don’t know if he will be hired by the NTF,” saad ni Lorenzana.

Samantala, kinumpirma ni Presidential Spokesperson Harry Roque ngayong Huwebes, July 1, na tinanggap ni Pangulong Rodrigo Duterte ang resignation ni Parlade bilang NTF-ELCAC spokesperson.