Canada dinale ang Slovenia kinumpleto ang semis slot

ni Anthony E. Servinio @Sports | September 8, 2023

Mga laro ngayong Biyernes – MOA

4:45 p.m. Serbia vs. Canada

8:40 p.m. USA vs. Alemanya

Kinumpleto ng Canada ang apat na mga kalahok sa semifinals ng 2023 FIBA World Cup matapos ang 100-89 panalo sa Slovenia Miyerkules ng gabi sa punong Mall of Asia Arena. Sigurado na ang Canada sa pinakamataas nilang naabot sa kasaysayan ng torneo at sisikapin ngayong araw na makapasok sa championship laban sa malakas na Serbia at susundan ng salpukan ng Team USA at walang talong Alemanya.

Tabla ang first half, 50-50, at kumilos ang mga Canadian sa third quarter at lumayo, 80-71. Biglang uminit ang laban nang palabasin si Dillon Brooks.

Wala pang isang minuto ay si Luka Doncic ang itinapon matapos ang kanyang pangalawang technical foul na may 6:37 sa orasan. Sinubukan humabol ng Slovenia subalit masyadong malaki ang 94-77 bentahe ng Canada.

Halimaw si Shai Gilgeous-Alexander na nanguna sa lahat ng kategorya 31 puntos, 10 rebound, apat na assist at dalawang agaw. Kahit hindi itinapos ang laro, nanguna si Doncic sa kanyang 26 puntos habang 22 si Klemen Prepelic. Nangako si Doncic na babawi sila sa Lithuania na inilaro kahapon para sa ika-lima hanggang ika-walong puwesto.

Nakatutok ang Team USA na mauwi ang kanilang ika-anim na kampeonato matapos ang 1954, 1986, 1994, 2010 at 2014 at umalis sa tabla kasama ang dating Yugoslavia na may lima din. Nakamit ng Alemanya ang tanso noong 2002 sa Indianapolis, Indiana at nais din nila ito higitan.

Sa bisa ng tagumpay ng Canada ay inihatak din nila ang Alemanya at Serbia papasok sa Paris 2024 Olympics. Nauna na ang Japan, Australia, Timog Sudan, Canada, Amerika at host Pransiya habang may apat pang upuan para sa mga magwawagi sa mga Olympic Qualifying Tournament sa 2024 kung saan kasali ang Gilas Pilipinas.

LATVIA umangat, ginulat ang 7th place na Italya

ni Anthony E. Servinio @Sports | September 8, 2023

Mga laro ngayong Biyernes – MOA

4:45 PM Serbia vs. Canada

8:40 PM USA vs. Alemanya

Patuloy ang pagpapasikat ng baguhang Latvia at pinabagsak nila ang Italya, 87-82, sa consolation round ng 2023 FIBA World Cup kahapon sa Mall of Asia Arena. Maglalaro na ang Latvia para sa ika-limang puwesto sa Sabado at kahit ano ang resulta, sila na ang magtatapos ng pinakamataas sa mga koponan na nasa pinakaunang World Cup ngayong taon.

Sa gitna ng banta ng Italya, bumanat ng pandiin na three-points si Andrejs Grazulis na may 24 segundong nalalabi upang makahinga ang Latvia, 87-82. Mula roon ay nagmintis ng tres si Stefano Tonut at sinungkit ni Aigars Skele ang bola para mapreserba ang resulta.

Walang mintis si Grazulis sa kanyang tatlong tres at nagtapos na may 28 puntos at anim na rebound. Sumunod si Skele na may 12 puntos at siyam na rebound.

Bumaba ang mga Italyano sa laban para sa ika-pitong puwesto. Nanguna sa kanila si Luigi Datome na may 20 puntos at Nicolo Melli at Tonut na parehong may 11 puntos. Hindi naglaro si Simone Fontecchio.

Ang Pilipinas ang may hawak ng marka na pangatlong puwesto sa kanilang unang World Cup noong 1954 sa Brazil, ang ikalawang edisyon ng torneo. Maaaring pantayan ng Latvia ang ika-limang puwesto ng Puerto Rico noong 1959 sa Chile at Poland noong 1967 sa Uruguay.

Naging malaking katanungan ang kakayahan ng Latvia matapos umayaw sa torneo si Kristaps Porzingis ng Boston Celtics na lumipad pa rin sa Pilipinas upang manood ng mga laro. Mas kilala ang Latvia sa 3x3 bilang unang kampeon sa Tokyo Olympics.

Tutukan FIBA semifinals na, puwestuhan sa 5th-8th place

ni Anthony E. Servinio @Sports | September 7, 2023

Mga laro ngayong Huwebes – Mall of Asia

4:45 p.m. Italya vs. Canada/Slovenia

8:30 p.m. Lithuania vs. Alemanya/Latvia

Ibinuhos ng Team USA ang kanilang galit sa Italya, 100-63 at pumasok sa semifinals ng 2023 FIBA World Cup Martes ng gabi sa Mall of Asia Arena. Galing ang mga Amerikano sa nakakahiyang 104-110 pagkatalo sa Lithuania noong Linggo na nagsilbing panggising sa kanila.

Mahalaga ang malakas na simula at agad hindi pinaporma ng depensa ang mga Italyano sa first quarter, 24-14, at lalong lumaki sa halftime, 46-24. Kabaliktaran ito sa laban sa Lithuania kung saan pinabayaan ng mga Amerikano na tumira ng tumira sa three-points ang kalaban at naubusan sila ng hangin kahahabol sa second half.

Bumida sina Mikal Bridges na may 24 at Tyrese Haliburton na may 18 puntos. Hindi masyadong pumuntos si Paolo Banchero at nalimitahan sa 8 puntos lang subalit malaki ang ambag niya sa depensa.

Matatandaan na bago ang World Cup ay pinag-agawan ng USA Basketball at Federazione Italiana Pallacanestro ang serbisyo ng 2023 NBA Rookie of the Year. Umoo si Banchero sa Italya subalit biglang nagbago ng isip noong Hunyo kaya naglabas ng maanghang na pahayag ang presidente ng FIP Gianni Petrucci at nagalit sa kanya.

Nanguna sa Italya si Simone Fontecchio na may 18 puntos kahit umupo na siya sa huling 8 minuto bunga ng ika-lima at huling foul at lamang ang mga Amerikano, 83-49.

Susunod para sa Team USA sa Biyernes ang nagwagi kagabi sa Alemanya at Latvia.

Kung papalarin, naghihintay sa kanila sa championship ang isa sa Serbia, Canada o Slovenia sa Set. 10.

Samantala, gaganapin ngayong araw ang Consolation Round para matukoy ang magtatapos sa ika-5 hanggang ika-8 puwesto. Haharapin ng Lithuania ang natalo sa pagitan ng Alemanya at Latvia habang ang natalo sa Canada at Slovenia ay lalabanan ang Italya.