Clarkson gumagana sa Jazz, Pacers ginantihan ang Celtics

ni Anthony E. Servinio @Sports | January 10, 2024

Photo: Utah Jazz / IG

Gumana muli ang laro ni Gilas Pilipinas Jordan Clarkson at tinulungan ang bisitang Utah Jazz na gulatin ang Milwaukee Bucks, 132-116, sa tampok na laro sa NBA kahapon sa Fiserv Forum.  Nakaganti rin ang Indiana Pacers sa numero unong Boston Celtics, 133-131, salamat sa mga free throw ni Benn Mathurin. 

Tumanggap ng foul si Mathurin galing kay Kristaps Porzingis na may 0.6 segundo sa orasan at kalmang ipinasok ang dalawang free throw upang ibalik sa Pacers ang lamang, 133-131.  May pagkakataon ang Celtics subalit hindi nila nakumpleto ang huling tira sabay tunog ng busina. 

Nanguna si Mathurin na may 26 puntos bilang reserba at nahanap muli ang kanilang malupit na opensa.  Malaking bawi ito para sa Pacers na natalo sa Boston noong isang araw, 101-118.  Bumira ng 21 si Clarkson bilang reserba upang tulungan si Lauri Markkanen na may 21 din at 14 rebound.  First quarter pa lang ay umarangkada ang Jazz, 41-23, at nasayang ang triple double ni Giannis Antetokounmpo na 25 puntos, 10 rebound at 11 assist at hinanap ng Bucks ang shooting nang lumiban na si Damian Lillard. 

Kinailangan ng Chicago Bulls ang overtime upang masugpo ang Charlotte Hornets, 119-112.  Inangat ni Coby White ang kanyang laro para magtapos na may 27 habang parehong double-double ang mga malalaking kakamping sina Andre Drummond na 21 at 15 rebound at Nikola Vucevic na 21 at 10 rebound. 

Samantala, hindi na maglalaro ngayong taon si Ja Morant ng Memphis Grizzlies at ooperahan siya sa balikat.  Siyam na beses nang naglaro si Morant matapos magsilbi ng 25 laro suspensiyon bunga ng paglabas ng baril sa publiko. 

Tinapos din ng NBA ang suspensiyon ni Draymond Green ng Golden State Warriors na nawala ng 12 laro bunga ng kanyang paghampas sa mukha ni Jusuf Nurkic ng Phoenix Suns noong Disyembre.                                 

Lakas ng depensa ng Celtics pinagana ng lupet ni Tatum

ni Anthony E. Servinio @Sports | January 8, 2024

Ipinakita ng numero unong Boston Celtics ang kahalagahan ng depensa upang makamit ang 118-101 panalo kontra sa numero unong opensa ng NBA Indiana Pacers kahapon sa Gainbridge Fieldhouse.  Bumida din si Gilas Pilipinas Jordan Clarkson sa 120-109 pagwagi ng Utah Jazz sa kulang na Philadelphia 76ers. 

 Ang mabuting depensa ay nagbunga ng malupit na opensa at namayagpag si Jayson Tatum para sa 38 puntos at 13 rebound habang 31 si Jaylen Brown.  Dominado ng Boston ang rebound, 56-38, at napigil sa anim ang magkasunod na tagumpay ng Pacers. 

Ang 101 ang pinakamababang naitala ng Pacers ngayong taon at malayo sa kanilang numerong 127.6 bago ang laro.  Umangat ang Celtics sa 28-7 at lumaki ang agwat sa humahabol na Minnesota Timberwolves na 25-9. 

Matapos malimitahan sa dalawang puntos lang noong isang araw sa 97-126 pagkabigo laban sa Celtics, bumawi ng todo si Clarkson at bumira ng 18 puntos bilang reserba.  Mahalagang tulong ito kay Lauri Markkanen na may 33 at Collin Sexton na may 22 at naramdaman ng 76ers ang pagliban ni MVP Joel Embiid at ang kanyang inaasahang 30 puntos at 10 rebound. 

Hindi nagpahuli at gumanap ng malaking papel si kabayan Jalen Green sa 112-108 panalo ng Houston Rockets sa bisita Milwaukee Bucks.  Double-double si sentro Alperen Sengun na 21 puntos at 11 rebound at sumunod sina Jalen at Jeff Green na parehong may 16. 

Nabitin ang huling hirit ng Bucks na humabol mula sa 73-89 sa simula ng fourth quarter.  Nasayang ang 48 puntos at 17 rebound ni Giannis Antetokounmpo, ang tumatakbong numero uno sa online botohan sa NBA.com at NBA app para sa 2024 All-Star na gaganapin sa tahanan ng Pacers sa Pebrero.                     

Valencia Champ Allali abangan sa Manila Int'l Marathon 2024

ni Anthony E. Servinio @Sports | January 5, 2024

Humandang masaksihan ang pinakamabilis na karera sa kasaysayan ng Pilipinas sa parating na Manila International Marathon 2024 ngayong Pebrero 24 sa Quirino Grandstand.  Isang pulutong ng banyagang mananakbo sa pangunguna ni Nasser Allali ng Pransiya ang determinadong magtala ng bagong marka para sa makasabog-bagang 42.195 kilometro. 

Umoras ang Montreal 1976 at Moscow 1980 Olympic gold medalist Waldemar Cierpinski ng Silangang Alemanya ng 2:14:39 sa unang edisyon ng patakbo noong 1982 at hanggang ngayon ay nananatiling matatag ang marka.  Ang alamat na si Eduardo “Vertek” Buenavista ang may hawak ng pambansang marka na 2:18:44 na naabot niya noong 2004 sa Japan. 

Sariwa pa si Allali sa pagtakbo sa malupit na Valencia Marathon noong nakaraang buwan sa Espanya.  Kahit nagtapos siya ng ika-86, nagtala siya ng bagong personal na marka na 2:17:06.

Ang oras ng Pranses ay tiyak na mas matindi kung ihahambing sa mga pambatong Pinoy at mga Aprikanong naninirahan sa bansa na hindi makalapit sa marka ni Cierpinski.  Handa nilang harapin ang hamon ng tinatayang mahigit 50 mga bisita na magmumula sa mga kapitbahay sa Timog Silangang Asya, Hong Kong, Macau, India, Amerika, Alemanya, Netherlands at Belgium.

Magiging malaking tulong ang halos patag na ruta na daraan ng kahabaan ng Roxas Boulevard at Gil Puyat hanggang Ayala Triangle.  Maliban sa Full Marathon, magkakaroon din ng karera sa 21, 10 at limang kilometro. 

Ayon kay Technical Director na si MSgt. Manuel Oyao ng DND panahon na upang magkaroon ng bagong marka para sa Marathon. Umaasa rin siya na ito ang magiging daan upang makaakit ng mas marami at mas malalakas na banyagang kalahok sa 2025.

Ginaganap ang pagpapalista online sa manilamarathon.com. Maaari ring magpalista sa ECYY Sports Hub sa 126 Pioneer Street, Mandaluyong City at KolourPro sa Scout Santiago kanto ng Scout Limbaga, Quezon City hanggang Pebrero 16.