12 sa Gilas Pilipinas binuo na, coach Tim Cone swak sa team

ni Anthony Servinio @Sports | January 31, 2024

Bunga ng makasaysayang gintong medalya sa 19th Asian Games Hangzhou, itinalaga ng Samahang Basketbol ng Pilipinas (SBP) si Tim Cone bilang head coach ng Gilas Pilipinas simula sa qualifiers para sa 2025 FIBA-Asia Cup ngayong Pebrero.  Kasabay nito ay agad naglabas ng 12 pangalan na bubuo ng koponan na haharapin ang Hong Kong, Chinese-Taipei at New Zealand sa Grupo B. 

Magbabalik mula sa nagtagumpay na koponan ay mga PBA MVP June Mar Fajardo at Scottie Thompson, Chris Newsome, CJ Perez, Calvin Oftana at Justin Brownlee.  Balik-Gilas din sina Kai Sotto, AJ Edu, Jamie Malonzo, Dwight Ramos, Carl Tamayo at Kevin Quiambao. 

Nilinaw ni Coach Cone na kailangan lang ipahinga ni Malonzo ang kanyang tuhod matapos ito mapilayan noong Game 3 ng kanilang PBA Commissioner’s Cup semifinals laban sa San Miguel Beer noong Linggo.  Sa kaso ni Brownlee, hihintayin nila ang hatol ng kinauukulan matapos masurian ng ipinagbabawal na gamot noong Asian Games.

Sina Fajardo at Perez na lang ang abala sa PBA Finals at hihintayin umuwi ang mga naglalaro sa Japan na sina Sotto, Edu at Ramos.  Nandito na sina Tamayo matapos pakawalan ng kanyang koponang Hapon at Quiambao na kagagaling lang ng Dubai kasama ng Strong Group Athletics.

Nakatakdang lumakbay ang Gilas sa Hong Kong para sa unang laro ngayong Pebrero 22.  Susunod ang pagdalaw ng Chinese-Taipei sa Pebrero 25 sa Philsports Arena.

Ang iba pang laro ay gaganapin sa Nobyembre at Pebrero ng 2025.  Tanging ang unang dalawa sa anim na bawat grupo ay tutuloy sa torneo habang paglalabanan ng anim na pumangatlo ang huling apat na puwesto.

Ang 2025 FIBA-Asia Cup ay gaganapin mula Agosto 5 hanggang 17 sa Saudi Arabia.

Filipinas hahataw sa Pinatar Cup sa Espanya

ni Anthony Servinio @Sports | January 31, 2024

Magbabalik ang Philippine Women’s Football National Team sa ikalawang sunod na taon sa 2024 Pinatar Cup sa Espanya mula Pebrero 24-27.  Haharapin ng Filipinas ang hamon ng Scotland, Finland at Slovenia. 

Matatandaan na malaking tulong ang paglahok sa torneo sa makasaysayang kampanya ng mga Pinay sa 2023 FIFA Women’s World Cup.  Ngayong taon ay nagbago ang patakaran ng torneo at dalawang laro lang ang nakatakda sa bawat koponan kumpara sa tatlo noong nakaraan. 

Unang haharapin ng #38 sa FIFA World Ranking Filipinas ang #25 Scotland sa 24 at susundan ito ng laban para sa kampeonato sa 27 kontra sa mananaig sa pagitan ng #27 Finland at #44 Slovenia.  Noong huling Pinatar Cup ay tinalo ng Scotland sa Pilipinas, 2-1, kung saan naitala ni Meryll Serrano ang nag-iisang goal ng koponan sa tatlong laro. 

Bago ang Pinatar Cup ay maglalaro ang Under-17 Filipinas sa Mima Cup sa parehong lugar mula Pebrero 5- 8 laban sa Inglatera, Scotland at Sweden.  Sa pagitan ng dalawang torneo ay magdaRaos ng kampo mula Pebrero 11-14 kung saan inaanyayahan ang mga nais maging bahagi ng Filipinas mula Under-17 hanggang Seniors. 

Dahil sa ipinakitang husay sa buong 2023, pinarangalan ng Philippine Sportswriters Association (PSA) ng Special Award ang koponan bilang Golden Lady Booters at si forward Sarina Bolden bilang Miss Football.  Tinanggap nina Team Manager Jefferson Cheng, PFF General Secretary Angelico Mercader at Director for Football Coach Vincent Santos ang mga tropeo sa PSA Awards noong Lunes ng gabi. 

Samantala, nahalal kamakailan bilang kasapi ng POC Athletes’ Commission ang beteranang goalkeeper ng Filipinas Inna Palacios.  Maglilingkod siya hanggang 2028 kasabay ng iba pang mga nagwagi na sina EJ Obiena ng Athletics, Jessie Lacuna ng Swimming,  Jack Danielle Animam ng Basketball at Nesthy Petecio ng Boxing. 

Strong Group sokpa na sa finals ng Dubai C'ship

ni Anthony Servinio @Sports | January 29, 2024

Umulit ang Strong Group Athletics ng Pilipinas laban sa Beirut ng Lebanon, 94-72, at pumasok sa finals ng 33rd Dubai International Basketball Championship Linggo ng madaling araw, oras sa Pilipinas, sa Al Nasr Stadium.  

Haharapin ng koponan ang defending champion Al Riyadi ng Lebanon na tinalo ang Al Ahly Tripoli ng Libya, 83-73, sa kabilang semifinal.

Halos walang pinagkaiba ang resulta sa una nilang pagtagpo sa elimination round, 95-73, noong Martes.  Nakasabay lang ang Beirut sa unang quarter kung saan kinailangan ng siyam na sunod na puntos nina Kevin Quiambao, Justine Baltazar at Dwight Howard upang umakyat sa butas at itayo ang 13-4 bentahe at tuloy-tuloy na ang kanilang arangkada. 

Naka-shoot si Howard sa pagbukas ng fourth quarter para sa pinakamalaking lamang ng SGA, 75-49.  Kahit inupo na sa huling limang minuto, nanguna pa rin si Howard na may halimaw na numerong 26 puntos at 20 rebound. 

Sumuporta si Quiambao na may 18 buhat sa tatlong tres.  Itinala ni Baltazar ang kanyang pinakamatinding laro sa torneo na 15 puntos habang may dagdag na 10 si Jordan Heading. 

Dominado ng Al Riyadi ang Al Ahly Tripoli na itinabla ang laro ng tatlong beses lang na ang huli ay 9-9.  Mula roon ay walang nakapigil sa mga kampeon na lumamang ng 56-30 sa huling minuto bago ang halftime at inalagaan nila ito ng mabuti sa gitna ng pagsikap humabol ang kalaro. 

Sumandal ang Al Riyadi sa 22 puntos ng dating NLEX import Manny Harris.  Sumunod ang mga beterano ng kanilang pambansang koponan Wael Arakji na may 16 at Karim Zeinoum na may 15 at tiyak na sila ang mga babantayan. 

Parehong perpekto sa 7-0 ang SGA at Al Riyadi.  Maliban sa kampeonato, nais ding bumawi ng SGA sa Lebanese club na tinalo sila sa quarterfinals ng parehong torneo noong nakaraang taon, 106-97.