Utah Jazz, balik sa liderato, Lebron, magreretiro na?

ni Anthony E. Servinio / MC - @Sports | May 05, 2021

Kinuha ng Utah Jazz ang unang hakbang upang mabawi ang liderato ng buong NBA matapos ang 110-99 pagsugpo sa San Antonio Spurs kahapon sa Vivint Arena. Pansamantalang lumamang ng kalahating laro ang Jazz (47-18) sa Phoenix Suns (46-18) habang nakapulot ng mahalagang tagumpay ang defending champion Los Angeles Lakers sa Denver Nuggets, 93-89, upang makasiguro sa playoffs.

Sa gitna ng pagliban ng mga All-Star Donovan Mitchell at Mike Conley Jr., inangat ng kanilang mga kakampi ang husay sa pangunguna nina Bojan Bogdanovic na may 25 puntos at Rudy Gobert na may 24 puntos at 15 rebound. Nag-ambag ng 16 puntos si Gilas Pilipinas Jordan Clarkson.

Nagpabaya ang Lakers at sinayang ang kanilang 14 puntos na lamang sa 4th quarter, 83-69, subalit isinalba sila ng buslo ni Talen Horton-Tucker sa huling 15 segundo para sa huling talaan. Namuno sa Lakers si Anthony Davis na may 25 puntos at sinundan ni Alex Caruso na may 11 puntos habang lumiban si LeBron James bunga ng maga sa bukong-bukong.

Marami ang nakapansin na malaki na ang ibinagal at hinina nang laro ni James matapos itong mamahinga ng mahigit isang buwan dahil sa right ankle injury.

Ayon sa ulat, maaaring ito na ang hudyat na dapat nang magretiro sa pagba-basketball ang tumatandang basketball superstar matapos magtamo ng injury noong Marso 20 at hindi nakapaglaro ng 20 laro. Nitong Biyernes, kapansin-pansin na hindi na nararamdaman sa team ang kanyang talento bagkus sinasabing ito pa ang nagiging pabigat ngayon sa Lakers dahil imbes na maipanalo ang laban ay lalo pang silang nasadlak sa balag ng alanganin sa kanilang standing sa Western Conference. Sa kanyang pagbabalik, natalo ng dalawang sunod ang Lakers sa Sacramento Kings at Toronto Raptors

Inalagaan ng Philadelphia 76ers ang kapit nila sa liderato ng East matapos ibaon ang naghihingalong Chicago Bulls, 106-94. Nanguna sa 76ers (44-21) sina Tobias Harris na may 21 puntos at Seth Curry na may 20 puntos

Nagmukhang bayani sa komiks ang kuya ni Seth na si Stephen Curry at pumukol ng walong tres para sa 41 puntos sa loob ng 35 minuto at buhatin ang Golden State Warriors sa New Orleans Pelicans, 123-108.

Injury ni Nets Star Harden, lumala, Irving humalili sa laro

ni Anthony E. Servinio / MC - @Sports | April 22, 2021

Humaba sa pito ang sunod-sunod na panalo ng mainit na New York Knicks matapos iligpit ang bisitang Charlotte Hornets, 109-97, sa pagpapatuloy ng NBA kahapon sa Madison Square Garden. Lalong gumanda ang pag-asa ng Knicks (32-27) na makabalik sa playoffs sa susunod na buwan matapos huling makapasok noong 2013.

Bumanat ng 18 ng kanyang 24 puntos sa third quarter si RJ Barrett para tuluyang lumayo ang New York, 88-77, habang tinulungan siya nina 2011 MVP Derrick Rose at rookie Immanuel Quickley na parehong may 17 puntos. Kampeon ang Knicks noong 1970 at 1973 na parehong kontra sa Los Angeles Lakers subalit hindi pa ito nauulit at natalo sila ng dalawang beses sa NBA Finals noong 1994 sa Houston Rockets at 1999 sa San Antonio Spurs.

Samantala, lumala ang hamstring strain injury ni Brooklyn Nets star James Harden kaya hindi pa umano sigurado kung kailan ang pagbabalik nito sa team, ayon sa koponan.

Isiniwalat ng Nets na lalong napuwersa at lumala ang injury ni Harden habang nagsasagawa ng on-court rehab session. “Following an evaluation today which included an MRI, Harden will remain out indefinitely,” ayon sa statement ng team. “Updates regarding his status will be provided as appropriate.”

Kinailangan ng tiyaga na may halong suwerte ang kapitbahay ng Knicks na Brooklyn Nets upang talunin ang New Orleans Pelicans, 134-129. Mainit sa 15 ng kanyang 32 puntos si Kyrie Irving sa fourth quarter subalit ang kanyang depensa kay Zion Williamson sa huling 2.6 segundo ang nagsiguro sa kanilang ika-39 panalo.

Walang kabang ipinasok ni Paul George ang dalawang free throw na may 4.8 segundong nalalabi para maagaw ng bisitang Los Angeles Clippers ang 113-112 panalo sa Portland Trail Blazers. Nagising ang Atlanta Hawks sa kanilang matamlay na simula at dinomina ang bisitang Orlando Magic, 112-96, ang kanilang ika-limang panalo sa huling anim na laro.

Humataw ang Minnesota Timberwolves mula sa 107-107 na tabla sa huling siyam na minuto upang mabigo ang biglang nanlamig na Sacramento Kings, 134-120.

Jazz, gumanti sa Thunder; Durant, namahala sa Nets

ni Anthony E. Servinio - @Sports | April 15, 2021

Isang araw matapos mapatid ang kanilang 24 sunod na panalo sa Vivint Arena, bumalik sa tagumpay ang numero unong Utah Jazz kahapon at ibinuhos ang sama ng loob sa Oklahoma City Thunder, 106-96. Matamlay ang simula ng Jazz at akala ay babagsak ng dalawang sunod sa kanilang tahanan subalit nagising sila sa second half para sa kartadang 41-14.

Nanguna sa Utah sina Bojan Bogdanovic na may 23 puntos at Donovan Mitchell na may 22. Nagawang lumamang ang Thunder sa first quarter, 31-14, subalit unti-unting binawasan ito ng Jazz.

Sinigurado ng Phoenix Suns na hindi sila maiiwan ng Jazz at pinalamig ang bisitang Miami Heat, 106-86, para manalo ng ika-10 beses sa huling 11 laro. Double-double si Deandre Ayton na 19 puntos at 13 rebound at tinulungan ni Cameron Johnson na may 15 puntos.

Tumabla ang Brooklyn Nets kasama ang Philadelphia 76ers para sa liderato ng Eastern Conference sa 37-17 matapos talunin ang kulelat na Minnesota Timberwolves, 127-97, sa larong natuloy matapos ipagpaliban noong isang araw dahil sa malawakang protesta sa Minnesota bunga ng pagpatay ng pulis kay Daunte Wright, isang Aprikanong Amerikanong kabataan. Gumawa ng 31 puntos si Kevin Durant at 23 puntos si Joe Harris habang hindi naglaro sina Kyrie Irving at James Harden.

Nakaiwas sa malaking disgrasya ang defending champion Los Angeles Lakers at nakatakas sa Charlotte Hornets, 101-93, salamat sa mga mahalagang puntos nina Kyle Kuzma, Dennis Schroder at Alex Caruso sa huling tatlong minuto at humahabol ang Hornets. Nanguna sa atake si Kuzma na may 24 puntos at sinundan ni Schroder na may 19 habang 10 sa 13 ni Caruso ay sa fourth quarter.

Gumagana muli ang Boston Celtics sa kanilang naisin na makapasok sa playoffs at tinalo ang Portland Trail Blazers, 116-115, at umakyat sa 29-26 at lampasan ang Heat sa East. Bumida si Jayson Tatum sa 5 puntos sa huling minuto upang magtapos na may 32 habang 24 si Jaylen Brown at nakahinga ng maluwag ang Boston matapos hindi pumasok ang tres ni Damian Lillard sa huling busina.