Fil-Am Clarkson, 6th Man Awardee; Bucks, nakalayo sa playoffs

ni Anthony E. Servinio - @Sports | May 26, 2021

Ginawaran si Pinoy Pride Jordan Clarkson ng Utah Jazz bilang 2021 Kia NBA Sixth Man Award kahapon, hudyat ng simula ng pagkilala ng liga sa mga manlalaro at personalidad ng katatapos na regular season. Pinatunayan ni Clarkson na siya ang pinakamahusay na reserba at hindi kailangan maging first five upang makatulong sa tinamasang tagumpay ng koponan.

Nakakuha siya ng 65 na boto para sa First Place mula sa 100 media mula sa buong daigdig upang talunin ang kakamping si Joe Ingles na may 34 boto habang napunta kay Derrick Rose ng New York Knicks ang nalalabing isang boto. Isusulat sa balota ang tatlong pangalan para sa First, Second at Third Place.

Nagtala si Clarkson ng 18.4 puntos sa loob ng 68 laro, pangalawa sa Jazz sa likod ng 26.4 ni All-Star Donovan Mitchell at pinakamataas sa kanyang pitong taon sa NBA. Bago lumipat sa Utah noong 2019, naglaro din si Clarkson sa Los Angeles Lakers mula 2014 hanggang 2018 at Cleveland Cavaliers mula 2018 hanggang 2019 kung saan pinayagan siya maglaro sa Gilas Pilipinas sa 2018 Asian Games sa Indonesia.

Ang iba pang tumanggap ng boto ay sina Jalen Brunson at Tim Hardaway Jr. ng Dallas Mavericks, Montrezl Harrell ng defending Los Angeles Lakers, Carmelo Anthony at Enes Kanter ng Portland Trail Blazers, Chris Boucher ng Toronto Raptors, Bobby Portis ng Milwaukee Bucks, TJ McConnell ng Indiana Pacers, Miles Bridges ng Charlotte Hornets, Shake Milton ng Philadelphia 76ers, Thaddeus Young ng Chicago Bulls at Facundo Campazzo ng Denver Nuggets. Si Harrell ang nagwagi ng Sixth Man noong 2020 subalit naglaro siya noon para sa Los Angeles Clippers.

Sa 2021 NBA Playoffs, pinalamig ng Milwaukee Bucks ang bisitang Miami Heat sa Fiserv Forum, 132-98, upang lumayo sa kanilang seryeng best of seven, 2-0. Nagpaulan ng 10 tres ang Bucks sa first quarter pa lang upang umabante at hindi na lumingon, 46-20.

Playoffs: Nanginig sa Grizzlies ang Jazz; Lakers, tinusta ng Suns

ni Anthony E. Servinio - @Sports | May 25, 2021

Pangalawang araw pa lang at malaking gulat ang dumating sa 2021 NBA Playoffs matapos talunin ng bisitang Memphis Grizzlies ang numero uno sa buong liga Utah Jazz, 112-109, sa pagbukas ng seryeng best of 7 kahapon sa Vivint Arena. Kumapit ng husto ang mga batang Grizzlies sa gitna ng matinding paghabol ng Jazz – ang koponan na tinalo nila sa unang pagkakataon matapos mabigo sa lahat ng kanilang tatlong tapatan noong regular season.

Hindi nagpakita ng pagod ang Memphis na dumaan sa State Farm Play-In Tournament para lang mapabilang sa playoffs at umabot sa 17 ang lamang sa huling 9 na minuto, 94-77, subalit bumanat ang Utah at lumapit, 109-110, matapos ang limang free throw ni Bojan Bogdanovic at siyam na segundo sa orasan. Nagpabaya ang depensa ng Jazz at nakatakas si Dillon Brooks para tuldukan ang laban ng kanyang ika-30 at ika-31 puntos at nakakuha siya ng malaking tulong kay Ja Morant na may 26 puntos at Jonas Valanciunas na may 15 puntos at 13 rebound.

Hinigpitan ang depensa ng numero uno sa Eastern Conference Philadelphia 76ers at naitala nila ang pinaghirapang 125-118 tagumpay sa bisitang Washington Wizards. Sinabayan ng 76ers ang mabilis na laro ng Wizards subalit nagawa nilang bagalan ang tiyempo upang maiwasang mapahiya sa harap ng kanilang mga tagahanga.

Ipinasok ni Trae Young ang malapitang buslo na may 0.9 segundong nalalabi upang makalusot ang bisitang Atlanta Hawks kontra sa New York Knicks, 107-105, at makauna sa kanilang serye.

Samantala, hindi naging maganda ang simula ng defending champion Los Angeles Lakers at nasunog sila sa Phoenix Suns, 99-90. Lumamang ang Suns matapos ang first quarter, 32-25, at mula doon ay hindi nila binitawan ito at pinalaki pa sa 16 sa simula ng fourth quarter, 86-70, sa tres ni Devin Booker.

Jazz, habol na sagupain ng Grizzlies at Warriors

ni Anthony E. Servinio - @Sports | May 22, 2021

Bumida nang todo ang tambalang Russell Westbrook at Bradley Beal at giniba ng Washington Wizards ang bisitang Indiana Pacers, 142-115, upang makamit ang 8th at last place sa NBA Eastern Conference Playoffs sa State Farm Play-In Tournament kahapon sa Capital One Arena. Umarangkada ang Wizards sa second quarter at lumamang ng hanggang 38 sa 4th quarter, 131-93.

Nagtapos si Beal na may 25 puntos at nag-ambag si Westbrook ng 18 puntos. Susunod para sa Washington ang no.1 Philadelphia 76ers sa seryeng best of seven sa Lunes. Galing ang Wizards sa mapait na talo sa Boston Celtics noong Miyerkules, 100-118, at hindi na nila pinakawalan ang tsansa na makabalik sa playoffs matapos ang huli noong 2018. Mabigat na paborito ang Philadelphia. Paglalabanan ngayon ng Golden State Warriors at bisitang Memphis Grizzlies ang last place sa Western Conference at karapatang harapin ang no. 1 Utah Jazz.

Samantala, inilabas ng NBA ang mga nominado para sa taunang award sa pangunguna nina Stephen Curry ng Warriors, Nikola Jokic ng Denver Nuggets at Joel Embiid ng 76ers para sa Most Valuable Player. Si Curry ang no. 1 sa puntos na 32.0 bawat laro at may dalawang MVP noong 2015 at 2016 habang hinahanap nina Jokic at Embiid ang unang tropeo.

Si kabayang Jordan Clarkson ng Utah ay nominado sa Sixth Man of the Year kasama ang kakamping si Joe Ingles at 2009 MVP Derrick Rose ng New York Knicks. Isa pang Jazz na si Rudy Gobert ang nominado sa Defensive Player of the Year kasama sina Draymond Green ng Warriors at Ben Simmons ng 76ers.

Para sa Coach of the Year, kasama si Coach Quin Snyder ng Jazz laban kay Coach Monty Williams ng Phoenix Suns at Coach Tom Thibodeu ng Knicks. Pag-aagawan nina LaMelo Ball ng Charlotte Hornets, Tyrese Haliburton ng Sacramento Kings at Anthony Edwards ng Minnesota Timberwolves ang Rookie of the Year habang mamimili kay Julius Randle ng Knicks, Michael Porter Jr. ng Nuggets at Jerami Grant ng Detroit Pistons ang Most Improved Player.