Clippers vs. Utah Jazz na sa West Semifinals

ni Anthony E. Servinio - @Sports | June 08, 2021

Nanalo na rin sa wakas ang Los Angeles Clippers sa kanilang tahanan Staples Center sa Game Seven ng kanilang serye kontra sa Dallas Mavericks, 126-111, sa tampok na laro sa NBA Playoffs kahapon. Saglit lang ang kanilang magiging pahinga at lalakbay upang harapin ang numero unong Utah Jazz sa seryeng best of seven sa Western Conference semis simula sa Miyerkules.

Sa serye kung saan laging wagi ang bisita sa unang anim na laro, tiniyak ng Clippers na hindi na ito mauulit at umarangkada sa 3rd quarter sa likod ng tatlong tres ni Marcus Morris Sr. Mula roon ay nagtulungan ang mga All-Star Kawhi Leonard at Paul George na paabutin ng 19 ang lamang, 105-87, at nararapat lang na ibaon ni Morris ang pandiin na tres, 120-107 at 1:16 sa orasan.

Pitong tres ang pinasok ni Morris na kambal ni Markieff Morris ng LA Lakers para sa 23 puntos upang suportahan sina Leonard na may 28 puntos at 10 rebound at George na may 22 puntos at 10 assist. Kinapos si Luka Doncic sa 46 puntos at 14 assist para sa Mavs.

Sa Eastern Conference semis, ginulat ng bisitang Atlanta Hawks ang Philadelphia 76ers, 128-124, upang buksan ang seryeng best of seven. Magkikita muli ang dalawang panig sa Miyerkules para sa Game 2 sa Wells Fargo Center.

Binuhos ng Atlanta ang unang 11 puntos ng second quarter upang itayo ang kanilang pinakamalaking lamang, 53-27, subalit ayaw mapahiya ang Philadelphia sa sariling tahanan at humabol hanggang maging dalawang puntos nalang ang pagitan matapos ang dunk ni Ben Simmons at 10 segundo sa orasan, 124-126. Agad binigyan ng foul si Bogdan Bogdanovic at walang kaba niyang ipinasok ang dalawang free throw upang masigurado ang panalo.

Umapoy si Trae Young para sa 25 ng kanyang 35 puntos sa first half pa lang na may kasamang 10 assist habang may tig-21 sina Bogdanovic at John Collins. Kahit may pilay sa tuhod, naglaro si Joel Embiid at nagbagsak ng 39 puntos at sinundan nina Seth Curry na may 21 at Tobias Harris na may 20 puntos.

Harden, napilay, pero Nets, alagwa sa GAME 1

ni Anthony E. Servinio - @Sports | June 07, 2021

Ipinamalas ng Brooklyn Nets ang lalim ng koponan upang manalo sa Game 1 ng Eastern Conference semifinals laban sa bisitang Milwaukee Bucks, 115-107, sa NBA Playoffs kahapon mula sa Barclays Center. Inangat ng buong koponan ang kanilang galing upang takpan ang biglang pagkawala ni James Harden matapos ang unang 43 segundo dahil napilay sa hita.

Umabot ang lamang na 19 sa 4th quarter, 115-96, matapos ang tres ni Joe Harris. Sapat na ito kahit hindi na pumuntos ang Nets sa nalalabing 3:43 at binuhos ng Bucks ang 11 sunod-sunod na puntos para bawasan ang agwat. Ginamit ng Milwaukee ang pagkawala ni Harden upang lumamang 20-11, subalit mula roon ay unti-unting lumapit at tuluyang lumayo ang Brooklyn sa likod nina Kevin Durant na may 29 puntos at 10 rebound at Kyrie Irving na may 25 puntos. Malaking bagay din ang kontribusyon nina Harris na may 19 puntos galing sa limang tres at Blake Griffin na may 18 puntos at 14 rebound.

Nanguna sa Bucks si MVP Giannis Antetokounmpo sa 34 puntos at 11 rebounds at sinundan ni Brook Lopez na may 19 puntos. Susuriin ang pilay ni Harden at titingnan kung makalalaro siya sa Game 2 ngayong Martes sa Barclays pa rin.

Magbubukas ngayong araw ang kabilang serye sa East semis sa pagitan ng numero unong Philadelphia 76ers kontra sa bisitang Atlanta Hawks simula 1:00 ng madaling araw. Paborito ang 76ers subalit nakasalalay ang tagumpay sa kalagayan ng tuhod ni Joel Embiid na napilay sa gitna ng serye laban sa Washington Wizards kung saan nagwagi ang 76ers, 4-1.

Malalaman din ang huling koponan sa Western Conference semis sa pagdalaw ng Dallas Mavericks sa Los Angeles Clippers simula 3:30 ng umaga. Tabla ang serye sa 3-3 kung saan ang bisitang koponan ang laging nananalo.

Samantala, tatlong team ang tiyak na magkakaroon ng bagong coach sa susunod na NBA. Hiwalay na ibinalita na hindi babalik sina Coach Steve Clifford sa Orlando Magic at Coach Terry Stotts sa Portland Trail Blazers habang inakyat bilang Presidente ng Boston Celtics si Coach Brad Stevens kapalit ng nag-retiro na si Coach Danny Ainge.

Suns, nilusaw si Lebron, Nuggets, nakaabang na

ni Anthony E. Servinio - @Sports | June 05, 2021

Magkakaroon ng bagong kampeon ngayong taon sa NBA at winakasan ng Phoenix Suns ang paghahari ng Los Angeles Lakers, 113-100, sa Game Six ng kanilang seryeng best of seven kahapon sa Staples Center. Haharapin ng Suns ang Denver Nuggets na pumasok din sa Western Conference semifinals matapos ang 126-115 tagumpay sa kanilang Game Six kontra Portland Trail Blazers.

Lamang ng buong laro ang Suns at sobrang talas ni All-Star Devin Booker sa first quarter kung saan siya mag-isang bumuhos ng 22 puntos para sa 36-14 na lamang. Naglaro para sa Lakers si Anthony Davis subalit hindi niya nakaya at umalis na may 6:35 sa first quarter bunga ng pilay sa hita na nangyari noong Game Four.

Umabot ng 29 ang lamang ng Phoenix sa second quarter, 48-19, subalit hindi basta sumuko ang Lakers. Huling nagbanta ang mga kampeon matapos ang tres ni Dennis Schroder, 93-104, pero sinagot ito agad ng mga puntos nina Booker at Mikal Bridges upang masigurado ang panalo.

Namuno si Booker na may 47 puntos at 11 rebound at sinundan ni Jae Crowder na may 18 puntos kahit pinalabas siya sa huling 30 segundo dahil sa technical foul. Kahit walong puntos lang, malaki ang 12 assist ni beterano Chris Paul.

Kinapos ang 29 puntos ni LeBron James at nalasap niya ang unang talo sa serye ng kanyang kinabibilangang koponan sa Round One ng playoffs. Sumunod sa kanya si Schroder na may 20 at Kentavious Caldwell-Pope na may 19.

Bumanat ng todo ang Nuggets sa huling walong minuto kung saan ibinura nila ang 106-102 lamang ng Blazers sa pamamagitan ng magkasunod na tres nina Nikola Jokic at Monte Morris, 108-106. Mula roon ay gumawa ng tig-limang puntos ang dalawa at tinuldukan ng tres ni Aaron Gordon para sa 124-115 na lamang at 52 segundo sa orasan.

Determinado ang Portland na maglaro ng Game Seven at lumayo sa third quarter, 82-68, subalit kinapos sila kung kailan talagang kailangan. Nagtapos si Jokic na may 36 puntos at sinundan ni Michael Porter Jr. na may 26 habang dumagdag si Morris ng 22 bilang reserba.