Hawks at Clippers, malulupet dadagit pa ng isang panalo

ni Anthony E. Servinio - @Sports | June 18, 2021

Binura ng bisitang Atlanta Hawks ang 26 puntos na lamang ng Philadelphia 76ers upang matakas ang 109-106 na panalo sa Game Five ng Eastern Conference semifinals ng 2021 NBA Playoffs kahapon mula sa Wells Fargo Center. Uminit muli si Trae Young sa fourth quarter, kasama ang mahalagang free throw, at isang panalo na lang ang kailangan ng Hawks para makapasok sa East Finals.

Lamang ang 76ers sa third quarter, 72-46, subalit nagtiyaga ang Hawks at bumuhos ng 11 sunod-sunod na puntos para maagaw ang lamang sa bisa ng tatlong free throw ni Young na may 1:26 sa orasan, 105-104. Sinundan ito ng buslo ni Danilo Gallinari para lalong lumayo, 107-104, at hindi napasok ni Joel Embiid ang kanyang dalawang free throw na may 10 segundong nalalabi.

Nagdagdag pa ng dalawang free throw si Young upang magtapos na may 13 ng kanyang 39 puntos sa fourth quarter at sinundan ni John Collins na may 19 puntos at 11 rebound. Ginawa ni Embiid ang 17 ng kanyang 37 puntos sa first quarter na may kasamang 13 rebound habang pumukol ng pitong tres si Seth Curry para sa 36 puntos.

Sa Western Conference, inangat ni Paul George ang kanyang laro upang takpan ang pagliban ni Kawhi Leonard dahil pilay ang tuhod at nanalo ng ikatlong sunod ang bisitang Los Angeles Clippers sa numero unong Utah Jazz, 119-111. Maaaring wakasan ng Clippers ang seryeng best of seven sa Game Six ngayong Sabado sa Los Angeles.

Naghahanda na maglaro ang Phoenix Suns sa West Finals kontra sa Clippers o Jazz na wala ang kanilang beteranong gwardiya Chris Paul matapos siyang ipasok sa health at safety protocol. Hindi pa tiyak kung kailan siya makakabalik.

Samantala, iginawad ang 2021 Kia NBA Rookie of the Year kay LaMelo Ball ng Charlotte Hornets. Nakakuha siya ng 84 sa 99 boto ng mga hurado upang talunin ang mga ibang nominado na sina Anthony Edwards ng Minnesota Timberwolves, Tyrese Haliburton ng Sacramento Kings at Sadiq Bey ng Detroit Pistons.

Durant, inangat ang Nets sa 3-2; Ante, kinakabahan na

ni Anthony E. Servinio - @Sports | June 17, 2021

Kevin Durants vs Bucks-Brad Penner-USA Today Sports

Nakamit ng Brooklyn Nets ang napakahalagang panalo sa Game Five kontra Milwaukee Bucks, 114-108, sa Eastern Conference semis ng 2021 NBA Playoffs kahapon sa Barclays Center. Naglaro ng 48 minutong walang pahinga at nagtala ng triple double si Kevin Durant upang mag-isang angatin ang Nets sa 3-2 lamang sa seryeng best of seven at baka tapusin ito ngayong Biyernes sa Milwaukee.

Naglabas ng sorpresa ang Nets at biglang pinalaro ang pilay na si James Harden subalit hindi ito nakatulong at tumalon ang Bucks sa 32-15 lamang sa simula ng second quarter. Mula roon ay nagtrabaho ng todo si Durant hanggang maagaw ang lamang, 94-93, matapos ang kanyang tres na may 8:36 sa orasan.

Hanggang tabla na lang ang nagawa ng Milwaukee na may 2:24 sa orasan, 104-104, at sinagot ito ng mga free throw ni Harden at anim pang puntos ni Durant upang magtapos na may 49 puntos. Sinundan siya ni Jeff Green na may 27 puntos.

Double-double si Giannis Antetokounmpo na 34 puntos at 12 rebound at dumagdag ng 25 si Khris Middleton. Dalawang koponan ang makakamit ng 3-2 lamang sa kanilang mga serye ngayong araw, sa laban ng Atlanta Hawks sa Philadelphia 76ers. Ang bisitang Los Angeles Clippers at numero unong Utah Jazz.

Samantala, inilabas na ng NBA ang mga kasama sa mga 2021 All-NBA Teams sa pangunguna ni 2021 Kia NBA Most Valuable Player Nikola Jokic ng Denver Nuggets. Kasama ni Jokic sa First Team sina Stephen Curry ng Golden State Warriors, Luka Doncic ng Dallas Mavericks, Kawhi Leonard ng Clippers at Antetokoumpo ng Bucks.

Ang pumangalawa sa botohan sa MVP Joel Embiid ng 76ers ang namuno sa Second Team na kabilang sina LeBron James ng Los Angeles Lakers, Damian Lillard ng Portland Trail Blazers, Chris Paul ng Phoenix Suns at 2021 Kia NBA Most Improved Player Julius Randle ng New York Knicks. Ang Third Team ay binubuo nina 2021 Kia NBA Defensive Player of the Year Rudy Gobert ng Jazz, Bradley Beal ng Washington Wizards, Jimmy Butler ng Miami Heat, Paul George ng Clippers at Kyrie Irving ng Nets.

Leonard, George at Jackson pinasama ang loob ng Jazz

ni Anthony E. Servinio - @Sports | June 14, 2021

Nabuhayan ang kampanya ng Los Angeles Clippers matapos makuha ang kumbinsidong 132-106 panalo sa bisitang Utah Jazz sa Game Three ng Western Conference semifinals sa pagpapatuloy ng 2021 NBA Playoffs kahapon sa Staples Center. Maaaring maitabla ng Clippers ang seryeng best of seven sa Game Four ngayong Martes sa Los Angeles pa rin.

Umarangkada agad ang Jazz sa 8-0 lamang upang buksan ang aksyon subalit nabura ito agad ng Clippers sa likod nina Paul George, Kawhi Leonard at Reggie Jackson upang makuha ang first quarter, 27-23. Mula roon ay hindi na pinaporma ang Utah at unti-unting lumayo ang Clippers.

Dalawang tres nina Leonard at Nicolas Batum ang tumuldok sa 10 sunod-sunod na puntos para sa 116-95 lamang papasok sa huling limang minuto. Tila iyon ang nagsilbing maagang knockout at lumobo lalo ang lamang ng Los Angeles sa 128-100 at 1:37 sa orasan.

Nagtapos si Leonard na may 34 puntos at 12 rebound habang hindi malayo si George na may 31 puntos buhat sa anim na tres. Malaki ang tulong nina Jackson at Batum na parehong may tig-17 puntos.

Sa gitna ng maalat na shooting ng Jazz, nakagawa pa rin ng 30 si Donovan Mitchell at sinundan ni Joe Ingles na may 19. Nag-ambag ng 14 puntos si Sixth Man Jordan Clarkson.

Samantala, nakahanda nang ilabas ng Phoenix Suns ang walis sa Game Four nila laban sa Denver Nuggets simula 8:00 ng umaga. Lamang sa seryeng best of seven ang Suns, 3-0, at isang panalo na lang ang kailangan nila para maging unang koponan na papasok sa West Finals.

Sa isa pang Game Four sa East semis, sisikapin ng Milwaukee Bucks na maitabla ang kanilang serye kontra sa bisitang Brooklyn Nets sa 3:00 ng umaga. Matapos pabayaan ang Nets na gumawa ng 115 at 125 puntos sa kanilang unang dalawang laro, nagtrabaho ang depensa ng Bucks upang makuha ang Game Three, 86-83.