ni Anthony E. Servinio - @Sports | June 26, 2021
Nabuhay ang kampanya ng Los Angeles Clippers at tinalo ang mainit na Phoenix Suns, 106-92, sa Game Three ng Western Conference Finals ng 2021 NBA Playoffs kahapon sa Staples Center. Kahit bigo, lamang pa rin ang Suns sa seryeng best of seven, 2-1.
Bumuhos ng lakas ang Clippers sa second half kung saan binura nila ang 48-46 lamang ng Suns matapos ang first half upang itayo ang kanilang pinakamalaking lamang sa 4th quarter, 89-71, at 10 minuto sa orasan. Bahagyang nakalapit ang Phoenix, 83-89, subalit agad napigil ang banta ng limang magkasunod na puntos ni Reggie Jackson at dalawang free throw ni Paul George, 96-83.
Nanguna para sa Clippers si George na may 27 puntos at 15 rebound. Sumunod si Jackson na may 23 puntos habang double-double din si Ivica Zubac na 15 puntos at 16 rebound.
Bumalik sa aksyon si Chris Paul at agad naparamdam siya sa kanyang 15 puntos at 12 assist subalit nabitin sila. Tumulong ang bayani ng Game Two na si Deandre Ayton sa kanyang 18 puntos at dumagdag ng 15 si Devin Booker na naglaro na may maskara matapos mabasag ang ilong sa parehong laro.
Naputol ang siyam na sunod-sunod na tagumpay ng Suns simula sa huling tatlong laban sa dating kampeon Los Angeles Lakers, ang 4-0 na pagwalis sa Denver Nuggets at unang dalawang laro ng kasalukuyang serye. Ang Game 4 ay gaganapin ngayong Linggo sa Staples Center muli at hahanapin ng Clippers ang 2-2 na tabla.
Samantala, walang nasa isip ng Milwaukee Bucks kundi makabawi sa harap ng kanilang mga tagahanga ngayong araw sa Game Two ng East Finals sa Fiserv Forum laban sa ganadong Atlanta Hawks simula 8:30 ng umaga. Iiwasan ng Bucks na matalo ng pangalawang sunod sa bisitang Hawks na wagi sa Game One noong isang araw, 116-113.
