Bucks vs. Suns sa finals, magsipusta na kayo!

ni Anthony E. Servinio - @Sports | July 05, 2021

Magkasabay silang pumasok sa liga noong 1968 at ngayon ay maghaharap ang Milwaukee Bucks at Phoenix Suns para sa 2021 NBA World Championship! Nakamit ng Bucks ang inaasam na tiket patungong NBA Finals matapos talunin ang palaban na Atlanta Hawks, 118-107, sa Game Six ng Eastern Conference Finals kahapon sa State Farm Arena.

Bumida si Khris Middleton sa third quarter kung saan mag-isa niyang ipinasok ang 13 sunod-sunod na puntos upang lumayo ang Bucks, 60-45, at lalong lumaki ito sa 22 matapos ang tres ni Pat Connaughton upang buksan ang fourth quarter, 94-72.

Nagpabaya ng maaga ang Milwaukee at kinuha ng Atlanta ang pagkakataon upang lumapit, 101-107, subalit sinagot ito ng buslo ni Jrue Holiday at dalawang free throw ni Middleton upang ibalik sa 10 ang lamang ng Bucks papasok sa huling tatlong minuto, 111-101.

Nagtapos si Middleton na may 22 ng kanyang kabuuang 32 puntos sa third quarter at sinundan ni Holiday na may 27. Hindi pinalaro si Giannis Antetokounmpo subalit nagbihis si Trae Young para sa Hawks sa gitna ng kanyang iniindang pasa sa buto sa bukong-bukong

Kahit nandoon si Young sa first five, inunahan agad ng bisitang Bucks ang Hawks at tumalon sa 7-0 na maagang lamang. Inabot ng pitong minuto bago nakapuntos si Young sa bisa ng three-point play upang magbanta, 16-18, subalit kumapit ang Milwaukee para makuha ang first quarter at hindi na lumingon, 28-24.

Nanguna ang reserbang si Cam Reddish para sa Hawks sa kanyang 21 puntos buhat sa anim na tres. Sumunod sina Bogdan Bogdanovich na may 20 puntos at Young na may pito ng kanyang 14 puntos sa fourth quarter.

Nakatakda ang Game One ng 2021 NBA Finals ngayong Miyerkules (Hulyo 7) sa Phoenix Suns Arena simula 9:00 ng umaga, oras sa Pilipinas. Sa Phoenix din ang Game Two sa Biyernes (Hulyo 9) bago lilipat ang seryeng best of seven sa Fiserv Forum para sa Game Four sa Hulyo 12 at Game Five sa Hulyo 15.

Umaasa ang Bucks na hihilom na ang pilay sa tuhod ni Antetokoumpo bago ang Game One. Sa likod ng mga alamat na sina Lew Alcindor (Kareem Abdul-Jabbar) at Oscar Robertson, winalis ng Milwaukee sa apat na laro ang Baltimore Bullets (ngayon ay Washington Wizards) para sa kanilang nag-iisang NBA World Championship noong 1971 – ang ikatlong taon ng prangkisa na isang marka na malamang hindi na malalampasan o mapapantayan bilang pinakamabilis na makuha ang unang kampeonato.

Isa na lang sa Bucks, aalagwa sa grand finale

ni Anthony E. Servinio - @Sports | July 03, 2021

Nagtulungan ang Milwaukee Bucks upang maukit ang 123-112 panalo sa bisitang Atlanta Hawks sa Game Five ng Eastern Conference Finals ng 2021 NBA Playoffs kahapon sa Fiserv Forum. Umabante ang Bucks sa seryeng best of seven, 3-2, at maaaring tapusin ang lahat ngayong Linggo at makapasok sa NBA Finals sa unang pagkakataon buhat noong 1974.

Malaking puwang ang nilikha ng hindi paglaro ni Giannis Antetokounmpo dahil sa pilay na tuhod noong Game Four subalit inangat nina Brook Lopez, Jrue Holiday, Khris Middleton at ang kapalit ni Giannis na si Bobby Portis upang takpan ito. Nagsanib puwersa sina Lopez at Holiday upang itulak ang Milwaukee sa 30-10 lamang sa first quarter at mula roon ay naglaro ng matalino ang Bucks upang mapigil ang mga banta ng Hawks na naglaro na wala rin ang kanilang pilay na superstar na si Trae Young.

Minsan dumalaw sa Pilipinas noong 2012, nagtapos si Lopez na may 33 puntos at sinundan ni Middleton na may 26 puntos at 13 rebound. Hindi malayo si Holiday na may 25 puntos at 13 assist habang nag-ambag si Portis ng 22 puntos.

Nanguna sa Hawks si Bogdan Bogdanovic na pumukol ng pitong tres para sa 28 puntos. Nagsumite ng tig-19 puntos sina John Collins at reserba Danilo Gallinari.

Itataya na ng Hawks ang lahat sa Game Six ngayong Linggo sa kanilang tahanan State Farm Arena upang maitabla at manatiling buhay sa serye. Kung kailangan, ang Game Seven ay babalik sa Fiserv Forum sa Martes.

Nakasalalay pa rin ang kapalaran ng mga koponan sa bilis ng paghilom ng pilay ng kanilang mga superstar. Umaasa si Young na papayagan na siya maglaro sa Game Six at tumulong maihatid ang Atlanta sa kanilang unang NBA Finals matapos ang isang kampeonato noong 1958 at tatlong pagkabigo noong 1957, 1960 at 1961 bilang Saint Louis Hawks lahat kontra sa Boston Celtics.

Sa kaso ni Antetokounmpo, walang nakitang sira sa kanyang tuhod maliban sa masakit ito at walang klarong pasya kung kailan siya makababalik.

Angas nina Booker at Payton ng Suns, tumibag sa Clippers

ni Anthony E. Servinio - @Sports | July 02, 2021

Tapos na ang 16 taong paghihintay ni All-Star Chris Paul na makalaro sa NBA Finals. Namayani ang beteranong point guard sa 130-103 panalo ng kanyang Phoenix Suns kontra sa Los Angeles Clippers at wakasan ang Western Conference Finals ng 2021 NBA Playoffs sa anim na laro kahapon sa Staples Center, 4-2.

Dominado ng bisitang Suns ang buong laro at isang beses lang nakalamang ang Clippers sa first quarter, 20-19. Inilatag nina Devin Booker at Deandre Ayton ang pundasyon ng tagumpay sa first half, 66-57, at mula roon ay walang nakapigil sa umaapoy na laro ni Paul.

Bumanat ng 12 puntos sa 3rd quarter si Paul para itulak ang Suns sa 97-83 na lamang at lalong ginanahan ang kanyang mga kakampi. Tila sumuko na ang Clippers pagsapit ng huling dalawang minuto at ipinasok ng parehong koponan ang mga reserba subalit hindi nagpreno ang Phoenix at lumobo pa lalo ang agwat sa 130-102 sa huling minuto.

Nagtapos si Paul na may 41 puntos sa 35 minuto. Sinundan siya nina Booker na may 22 puntos at Jae Crowder na may 19 puntos habang double-double si Ayton na 16 puntos at 17 rebound. Nanguna sa Clippers si Marcus Morris Sr. na may 26 puntos habang 21 puntos si Paul George. Naubusan ng milagro ang koponan matapos bumangon sa mga nakaraang serye laban sa Dallas Mavericks at numero unong Jazz.

Maliban sa masakit na balikat, matatandaan na nawala si Paul sa unang dalawang laro ng serye dahil sa COVID-19 protocol subalit matibay ang kanyang mga kakampi at nagwagi ng dalawang beses. Magpapahinga saglit ang Suns at hihintayin ang kanilang magiging kalaro.

Magtatapat ang Milwaukee Bucks at bisitang Atlanta Hawks sa napakahalagang Game Five sa East Finals ngayong araw sa Fiserv Forum simula 8:30 ng umaga. Malaking hamon sa parehong koponan ang paano nila lalampasan ang napipintong pagliban ng kanilang mga superstar Giannis Antetokoumpo ng Bucks (tuhod) at Trae Young ng Hawks (bukong-bukong).