Kings, Kampeon vs. Celtics sa NBA Summer League

ni Anthony E. Servinio - @Sports | August 19, 2021

Nanaig ang Sacramento Kings sa Boston Celtics, 100-67, upang mauwi ang korona sa 2021 NBA Summer League kahapon mula sa Thomas & Mack Center ng Las Vegas, Nevada. Kasama sa mga bagong kampeon si dating PBA MVP Jimmy Alapag na isa sa mga assistant coach ni head coach Bobby Jackson.

Tumalon ang Celtics sa maagang 15-4 na lamang ngunit hindi nagpatinag ang Kings at bumangon upang makuha ang first quarter, 24-20. Mula doon ay hindi na pinaporma ng Sacramento ang Boston at unti-unting lumayo at ang huling iskor ay siya ring pinakamalaking agwat na 33 puntos.

Nagsabog ng 21 puntos si forward Louis King upang mapili na MVP ng torneo. Tinulungan siya nina Jahmi’us Ramsey na may 16 puntos at Matt Coleman III na may 14 puntos. Matindi ang depensa ng Sacramento at nalimitahan ang opensa ng Boston na gumawa ng pinagsamang 400 puntos sa unang apat na laro. Tanging sina Carsen Edwards na may 15 puntos at Aaron Nesmith na may 12 puntos ang uminit para sa Celtics.

Layunin ngayon ng Kings na makabalik sa NBA Playoffs kung saan huli silang naglaro noong 2006. Ang nag-iisang kampeonato ng prangkisa ay dumating noong 1951 bilang Rochester Royals. Tinalo ng New Orleans Pelicans ang Minnesota Timberwolves, 87-59, sa malapit na Cox Pavilion para makamit ang ikatlong puwesto. Nanguna para sa Pelicans si Daulton Hommes na may 17 puntos.

Samantala, inilabas na ng NBA ang mga pambungad na laro para sa makasaysayang ika-75 taon ng liga simula Oktubre 20, petsa sa Pilipinas. Bubuksan ang bagong torneo sa pagdalaw ng Brooklyn Nets sa 2021 World Champion Milwaukee Bucks at susundan ng laro ng Golden State Warriors sa Los Angeles Lakers.

PFL tournament, sisimulan sa Setyembre sa Cavite

ni Anthony E. Servinio - @Sports | August 18, 2021

Napili ng Philippines Football League (PFL) ang Setyembre 25 bilang bagong araw ng pagbubukas ng torneo para sa 2021. Noong una ay dapat magbubukas ang liga sa Agosto 21 subalit ipinagpaliban ito dahil isinailalim ang Kalakhang Maynila sa Enhanced Community Quarantine (ECQ) at Modified ECQ para sa probinsiya ng Cavite kung saan gaganapin ang mga laro.

Maaga pa lang ay isang magandang kombinasyon ng mga beterano at kampeon sa kolehiyo ang ipinakilala ng Dynamic Herb Cebu Football Club para sa unang sabak sa PFL tourney na hatid ng Qatar Airways. Pinapirma ng bagong koponan ang mga coach at 23 manlalaro sa Cebu City.

Ilan sa mga bubuo ng Dynamic Herb ay sina Daniel Gadia at Nicolas Ferrer galing ng Stallion FC Laguna at mga rookie galing ng UAAP na sina Kintaro Miyagi ng UP at Mauro Acot ng De La Salle University. Para sa mahalagang posisyon ng goalkeeper, lumipat si Ace Villanueva mula Kaya FC Iloilo at ang baguhan na si Jack Zambrano ng UP.

Nasa listahan din ang 2019 CeSAFI Most Valuable Player Steven Patalinghug at John Roy Melgo ng University of San Carlos. Ang iba pang mga Filipino sa koponan ay sina Jaime Rosquillo, Rapi Llorente, Ranulfo Colina, Keenen Cergneux, Lorenzo Genco, Ian Miranda, Michael Pacite, Baris Tasci, Yoji Selman at Evren Tasci na karamihan ay tubong-Cebu o nag-aral doon.

Ang mga banyaga ay sina Jamal Mesbahi na tubong Yemen at dating University of Southern Philippines Foundation varsity. Sasamahan siya nina Kore Koremaruis ng Cote d’Ivoire, Mohamed Soumah ng Guinea, Emman Ekundhaiyur ng Nigeria at Ren Okuda ng Japan na lahat ay matagal na naglalaro sa mga torneo sa Cebu. Tatayong head coach si Oliver Colina na gumabay sa Kaya FC Iloilo noong 2020 AFC Cup bago tuluyang ipinagpaliban ang torneo.

Dobleng dagok dinanas ng Rockets vs. Raptors

ni Anthony E. Servinio - @Sports | August 14, 2021

Nagwagi ang Toronto Raptors sa Houston Rockets, 92-76, sa pagpapatuloy ng 2021 NBA Summer League kahapon sa Thomas & Mack Center ng Las Vegas, Nevada. Ito ang unang talo ng Rockets at tumanggap pa ng dobleng dagok matapos mapilay sa hita ang Fil-Am gwardiya Jalen Green ng pangalawang napili sa nakaraang NBA Draft.

Nadulas at inilabas si Green na may 2:28 na nalalabi sa second quarter at lamang ang Raptors, 43-33. Bago siya napilay, nakapagtala na siya ng 13 puntos sa 12 minuto ng aksyon at humahabol ang Houston matapos lumamang ang Toronto, 41-19.

Dahil sa talo, lumabo ang pag-asa ng Rockets na maglaro para sa kampeonato ng torneo. Ang dalawang may pinakamataas na kartada matapos ang apat na laro ang maghaharap sa Agosto 18 at may limang koponan na walang pang talo.

Nanguna para sa Toronto si Ish Wainwright na may 20 points buhat sa apat na tres. Sinundan siya ni Precious Achiuwa na may 19 puntos. Sinubukan buhatin ni Josh Christopher ang Rockets sa kanyang 14 puntos habang nag-ambag ng 11 si Marcus Foster. Haharapin ng Houston ang Orlando Magic sa kanilang huling laro sa Lunes at tututukan ang paghilom agad ni Green na gumawa ng pinagsamang 48 puntos sa kanilang mga panalo sa Cleveland Cavaliers at Detroit Pistons.

Ang Boston Celtics ang unang umakyat sa 3-0 sa bisa ng kanilang 108-71 tagumpay laban sa Orlando Magic sa malapit na Cox Pavilion. Nasa 2-0 ang New Orleans Pelicans, Miami Heat, Minnesota Timberwolves, Utah Jazz at ang Sacramento Kings tampok si assistant coach Jimmy Alapag.

Samantala, tinambakan ng Seattle Storm ang Connecticut Sun, 79-57, upang maging kampeon ng pinakaunang WNBA Commissioner’s Cup sa Footprint Center na bagong pangalan ng Phoenix Suns Arena. Ang Commissioner’s Cup ay bagong pakulo ng WNBA bilang bahagi ng pagdiriwang ng ika-25 taon ng liga.