Gawilan, sasabak na; Bejino, nasa 17th place

ni Anthony E. Servinio - @Sports | August 27, 2021

Natikman agad ni Gary Bejino ang taas ng kalidad ng kompetisyon sa 2020+1 Tokyo Paralympics Swimming. Nagtapos ang 25 anyos na bagitong Paralympian sa 6th place sa pangalawang Heat ng 200M Individual Medley SM6 kahapon ng umaga sa Tokyo Aquatics Center.

Lumangoy sa Lane 7, umoras si Bejino ng 3:17.19, malayo sa isinumiteng oras na 3:08.64. Gaya ng inaasahan, nanaig ang mga paborito sa pangunguna nina Andrei Granichka ng Russian Paralympic Committee (2:45.95), Jia Hongguang ng Tsina (2:48.28) at Talisson Henrique Glock ng Brazil (2:49.49) na tumuloy lahat sa finals.

Tanging ang 8 pinakamabilis mula sa 17 na lumangoy sa tatlong Heat ang papasok sa finals na pangungunahan ni Nelson Crispin ng Colombia na wagi sa pangatlong Heat sa oras na 2:43.07. Nagtapos si Bejino sa ika-17 at huling puwesto subalit nananatiling buo ang loob na bumawi sa mga susunod na karera sa 50M Butterfly S6, 400M Freestyle S6 at 100M Backstroke S6.

Sasabak sa aksyon ngayong araw ang kapwa-swimmer na si Ernie Gawilan sa 200M Individual Medley SM7 simula 9:00 ng umaga, oras sa Pilipinas. Katulad ni Bejino, malaking hamon ang haharapin ni Gawilan dahil siya ang may pinakamabagal na isinumiteng oras sa anim na kalahok sa Heat One na 2:52:43.

Makakatapat ng Pinoy sina Mark Malyar ng Israel (2:33.34), Inaki Basiloff ng Argentina (2:34.24), Andrii Trusov ng Ukraine (2:35.28), Rudy Garcia-Tolson ng U.S. (2:41.45) at Egor Efrosinin ng Russian Paralympic Committee (2:43.32). Ang World Record at Paralympic Record na 2:30.72 ay hawak ni Yevhenii Bohodaiko ng Ukraine na lalangoy sa pangalawang Heat.

Nagwagi ng gold medal si Gawilan sa parehong karera noong 2018 Asian Para Games sa Indonesia sa oras na 2:52.43. Ang walong pinakamabilis sa 13 atleta ang papasok sa finals ng 5:50 p.m. sa parehong araw.

Sisimulan din ni Wheelchair Racer Jerrold Pete Mangliwan ang kampanya sa Athletics sa 400M T52 simula 9:40 ng umaga sa Olympic Stadium. Nakalista ang tubong Tabuk City, Kalinga na si Mangliwan sa Heat One kung saan ang 3 pinakamabilis ay tutuloy agad sa finals simula ng 7:15 p.m.

Nagsumite si Mangliwan na oras na 1:02.17 na siyang pinakamabagal sa 5 kalahok. Ang maagang paborito sa karera ay sina Raymond Martin ng U.S. (55.19) at Hirokazu Ueyonabaru ng Japan (55.19) kasama sina Alejandro de Jesus Perez ng Mexico (1:00.01) at Thomas Geierspichler ng Austria (1:00.44).

Ang World Record na 55.13 ay hawak ni Tomoki Sato ng Japan na kakarera sa Heat 2. Kung hindi makakatapos sa unang tatlong puwesto, ang dalawang may pinakamabilis na oras sa mga nalalabing atleta ang bubuo sa walo na lalaro sa finals.

Nais ni Mangliwan na lampasan ang ika-7 puwesto sa parehong karera noong 2016 Rio Paralympics kung saan umoras siya ng 1:04.93. Sina Gawilan at Mangliwan ang tanging may karanasan sa Paralympics sa limang ipinadalang atleta sa Pilipinas.

"Ang umaayaw ay hindi magwawagi," Paralympian

ni Anthony E. Servinio / MC - @Sports | August 25, 2021

Pormal nang magsisimula ang kompetisyon sa 2020 Tokyo Paralympics ngayong araw ng Miyerkules matapos ang makulay na pambungad na palabas at parada kagabi sa Olympic Stadium. Igagawad ngayong araw ang mga unang medalya sa larangan ng Swimming, Track Cycling at Fencing.

“Ang umaayaw ay hindi magwawagi. Kaya hindi tayo umaayaw,” ayon kay Wheelchair racer Jerrold Mangliwan, na nagkapolio sa edad 2 at hindi patitinag kahit sino pa ang kalaban. “Kung titignan natin yong record nila (ang kalaban), malakas po sila. Pero malakas din po tayo,” ayon naman kay discus thrower Jeanette Aceveda habang nasa Athletes Village sa Tokyo.

Si Aceveda ay naka-3 golds noong 2013 ASEAN Para Games sa Naypyidaw, Myanmar at aniya mabigat ang susuungin nilang pagsubok pero 'di aatras dahil suportado sila ng Philippine Sports Commission. “Salang-sala na po yan sa bansang pinanggalingan nila so battle of the champions na po yan. Eh, hindi po tayo susuko,” ayon sa 50-anyos na bulag at may 3 anak na binuhay niya sa pagiging massage therapist sa iba't ibang malls sa Marikina.

Sa pangunguna ni Wheelchair Racer Jerrold Pete Mangliwan na nagdala ng watawat, pumasok sa Olympic Stadium ang Pilipinas na ika-115 sa listahan ng 163 na kalahok na bansa. Unang pumasok sa Opening Ceremony kagabi ang Refugee Paralympic Team na binubuo ng mga atletang napilitang lumikas sa kanilang mga bansa bunga ng kaguluhan o politika, pangalawa ang Gresya kung saan unang ginanap ang Olympics at panghuli ang host Japan.

Panalo ang porma ng mga Pinoy sa parada suot ang kanilang Barong Tagalog na likha ng Bordado ni Apolonia ng Taal, Batangas. Sinamahan ito ng salakot at maskara na gawa sa telang pina na may disenyong araw at tatlong bituin.

Umani ng papuri ang mga atletang Filipino mula sa pamunuan dahil sa ipinakita nilang pagsunod ng mga health at safety protocol buhat pagdating nila sa Japan noong Linggo ayon kay Chef de Mission Dean Francis Diaz. Masaya at ganado din ang mga atleta matapos makatanggap ng mga regalo mula sa mga sponsor kabilang ang isang bagong cellphone.

Si Mangliwan, ang unang sasabak sa Biyernes, sa T52 men’s 400-meter race. “Nakita na namin yong record ng kalaban ni coach Joel kaya nakita namin may malaking pag-asa ako makapasok sa event na to,” ayon kay Mangliwan. “Yun ang pinaka-goal ko is to make it to the finals po talaga. Kung makuha ko po yung goal ko na yon, all out na po doon.” “Bali gusto din po natin makapasok sa finals. At siyempre po, manalo. Ibibigay namin yong best namin,” ayon kay Aceveda na lalaro na blindfolded.

May 4,000 Para athletes at officials sa may 163 mga bansa ang lalahok sa Tokyo Para Games. Sasakay sila sa automated self-driving buses sa loob ng Athletes Village bilang service vehicle. Ang galaw ng mga sasakyan ay minomonitor ng computers at video cams hanggang sa bus stops. “Medyo magulo dahil walang driver pero masasanay din kalaunan,” aniya.

Sa Huwebes nakatakdang sumabak si Gary Bejino ng Swimming sa 200M Individual Medley SM6 sa Tokyo Aquatics Center simula ng 9:30 ng umaga. Nanalo ng pilak si Bejino sa nasabing karera sa 2018 Asian Para Games sa Indonesia kung saan umoras siya ng 3:08.64.

PH Paralympians, sisimulan nang subukin ang kahandaan

ni Anthony E. Servinio - @Sports | August 24, 2021

Matapos ang matagumpay na 2020 Tokyo Olympics, masusubukan ang kahandaan at husay ng punong abalang Japan sa pagbubukas ngayong Martes ng 2020 Tokyo Paralympics sa Olympic Stadium simula 7:00 ng gabi, oras sa Pilipinas. Isa ang Pilipinas sa 163 bansa na nagpadala ng kinatawan at gagawin ng mga magiting na atletang Filipino ang lahat para mag-uwi ng bagong karangalan.

Gaya ng Olympics, limitado lang ang mga lalahok sa pambungad na parada ayon sa laki ng delegasyon. Itinalaga si Wheelchair Racer Jerrold Pete Mangliwan na tagadala ng watawat ng Pilipinas at sasamahan siya ng ilang piling opisyal.

Sa Miyerkules ang unang atletang Pinoy na lalaro sa katauhan ni Achelle Guion sa Women’s Powerlifting Under 45 kilos. Si Guion ay beterana ng 2012 London Paralympics kung saan nagtapos siya sa ika-walong puwesto sa noon ay Under 44 kilos. Ang flag-bearer na si Mangliwan ay sisimulan ang kanyang kampanya sa Agosto 27 sa 400M T52 at nais niyang higitan ang ika-pitong puwesto niya noong 2016 Rio Paralympics. Lalaro din siya sa 1,500M T52 sa Agosto 29 at 100M T52 sa Setyembre 3.

Ang kasama ni Mangliwan sa Athletics na si Discus Thrower Jeannette Aceveda ay lalaro sa Agosto 31. Ang 50-anyos na si Aceveda ay beterana ng 2018 Asian Para Games sa Indonesia kung saan sumabak siya sa Discus at Shot Put. Sa Agosto 27 din ang unang sabak ng pambato sa Swimming na si Ernie Gawilan sa 200M Individual Medley SM7. Sasali rin siya sa paboritong 400M Freestyle sa Agosto 29 at 100M Backstroke sa Agosto 30.

Apat na karera ang lalanguyin ni Gary Bejino simula sa 200M Individual Medley sa Agosto 26. Nakatakda rin siya sa 400M Freestyle S6 sa Setyembre 2 at 100M Backstroke S6 at 50M Butterfly S6 sa Setyembre 3. Si Allain Keanu Ganapin ng Taekwondo ang huling lalaro sa Setyembre 3 sa Under 75 kilos K44. Dahil dito, naiwan sa Pilipinas si Ganapin at Coach Dindo Simpao at susunod sila kapag malapit na ang araw ng kompetisyon bilang bahagi ng mahigpit na health at safety protocol.

Kailangan umalis agad ang mga atleta sa loob ng 48 oras ng pagwakas ng kanilang kompetisyon at limitado din ang kanilang mga galaw habang nasa loob ng Japan. Ang 2020 Paralympics ay tatakbo hanggang Setyembre 5.