Brazil at Russia, malupet na kalaban ni Bejino sa Freestyle

ni Anthony E. Servinio - @Sports | September 02, 2021

Nakatutok ang pansin ngayong Huwebes kay swimmer Gary Bejino sa kanyang paglahok sa 400M Freestyle S6 ng Tokyo 2020 Paralympics mula sa Tokyo Aquatics Center. Magsisimula ang karera ng alas-8:00 ng umaga at haharapin niya muli ang mga pamilyar na karibal sa patuloy na paghanap ng unang medalya ng Pilipinas.

Tulad ng kanyang mga naunang sabak, nagsumite ng pinakamabagal na oras sa anim na kalahok sa unang qualifying heat na 5:33.47. Paborito dito si Talisson Henrique Glock ng Brazil (5:05.84) at ang dalawang kinatawan ng Russian Paralympic Committee na sina Andrei Granichka (5:08.26) at Viacheslav Lenskii (5:14.14) habang ang iba pang kalahok ay sina Leo McCrea ng Switzerland (5:26.51) at Lorenzo Perez ng Cuba (5:19.37).

Ang walong pinakamabilis sa 13 ang tutuloy sa finals na gaganapin agad ng 4 p.m. Ang World Record na 4:47.75 at Paralympic Record na 4:48.31 ay parehong hawak ni Anders Olsson ng Sweden.

Sa gitna ng kabiguan na makapasok sa finals ng mga naunang karera, buo pa rin ang tiwala ni Philippine Paralympic Committee (PPC) Presidente at Chef de Mission Mike Barredo sa bagitong Paralympian. Naniniwala ang beteranong opisyal na kung bibigyan si Bejino ng mas matinding pagsasanay ay makababalik siya sa Paris 2024 Paralympics.

Inamin ni Barredo na bunga ng pandemya, halos walang ensayo ang mga pambansang Paralympian sa buong 2020 matapos silang ilikas mula sa Philsports Complex sa Pasig City at gawin itong lugar para sa quarantine. Nagpasalamat si Barredo sa Philippine Sports Commission (PSC) na gumawa ng paraan upang makapag-ensayo sa bubble ang mga Paralympian ng isa hanggang dalawang buwan bago umalis patungong Japan.

Sa kaso ni Jeannette Aceveda na lalaro sana sa Standing Discus Throw F11, determinado siya na gawin ang lahat upang makalahok din sa Paris 2024. Ayon kay Barredo, kinalimutan na ni Aceveda ang nangyari at nanatili ang buong suporta sa kanyang layunin.

Sa karera ng medalya, patuloy ang masaganang ani ng Tsina na 63 ginto, 39 pilak at 32 tanso. Mas marami pa ang kanilang ginto kahit ipagsama ang mga ginto ng mga humahabol na Gran Britanya (29-23-28) at Russian Paralympic Committee (26-16-34).

Mabigat ang makakalaban nina Gawilan at Mangliwan

ni Anthony E. Servinio - @Sports | August 29, 2021

Malaking bawi ang layunin ngayong araw ng mga beteranong Paralympian Ernie Gawilan ng Swimming at Jerrold Pete Mangliwan ng Athletics sa pagpapatuloy ng aksyon ng Tokyo 2020 Paralympics. Matapos ang isang araw ng pahinga kahapon, handa na ang dalawa na ipagpatuloy ang paghahanap ng unang medalya ng Pilipinas sa pandaigdigang palaro.

Sasalang si Gawilan sa kanyang paboritong 400M Freestyle T52 simula 8:00 a.m. sa Tokyo Aquatics Center. Maganda ang pag-asa ng Pinoy dahil walo sa siyam na kalahok ang tutuloy sa finals sa 4:00 p.m.

Dala ang sinumiteng oras na 4:51.00, mabigat ang makakalangoy ni Gawilan sa pangalawang qualifying heat sa pangunguna ni Mark Malyar ng Israel na may hawak ng World Record na 4:33.64. Ang iba pang kalaban ay sina Inaki Basiloff ng Argentina (4:41.71), Francisco Bicelli ng Italya (4:44.90) at Chen Liang-da ng Chinese-Taipei (5:10.75).

Nasa unang Heat sina Andrii Trusov ng Ukraine (4:40.07), Evan Austin ng U.S. (4:42.28), Andrei Gladkov ng Russian Paralympic Committee (4:47.20) at Toh Wei Soong ng Singapore (5:01.97). Lumalabas na ang 2018 Asian Para Games gold medalist Gawilan ang may ika-7 pinakamabilis na oras, mas mabilis sa mga kapwa-Asyanong sina Toh at Chen.

Samantala, kakalimutan ni Mangliwan ang bangungot ng karera sa 400M T52 noong Biyernes ng gabi sa paglahok sa 1,500M T52 Wheelchair Race Finals simula 7:40 ng gabi sa Olympic Stadium. Pito lang ang nakalista subalit lahat sila ay kilala na ni Mangliwan matapos magharap sa 400M kung saan nadiskwalipika siya bunga ng pagpasok sa lane ng kalaro.

Malaki ang bubunuin ni Mangliwan na may pinakamabagal na isinumiteng oras na 4:09.95. Mabigat ang mga makakatapat sa pangunguna ni Tomoki Sato na may hawak ng World Record na 3:25.08 at defending champion Raymond Martin ng U.S. na may-ari ng Paralympic Record na 3:40.63 noong Rio 2016.

Sina Sato at Martin ang nakakuha ng ginto at pilak sa 400M noong Biyernes. Ang iba pang kakarera ay sina Thomas Geierspichler ng Austria (3:48.54), Hirokazu Ueyanabaru ng Japan (3:49.25) na tanso sa 400M, Leonardo de Jesus Perez ng Mexico (3:50.04) at Isaiah Rigo ng U.S. (3:43.41) na kasamang na-diskwalipika ni Mangliwan sa 400M.

Ang 27-anyos na si Martin ay may lahing Filipino at beterano ng nakaraang dalawang Paralympics. Umani ng 4 na ginto sa London 2012 sa 100M, 200M, 400M at 800M T52 at dinagdagan ang koleksiyon ng 2 ginto sa 400M at 1,500M at pilak sa 100M T52 sa Rio 2016.

Lumalayo na ang Tsina sa paramihan ng medalya na may 19 ginto, 10 pilak at 17 tanso. Umangat ang Russian Paralympic Committee sa 2nd place (10-7-11) at pangatlo ang Gran Britanya (9-10-10).

Gawilan, makakabawi pa; Mangliwan, nadiskaril

ni Anthony E. Servinio - @Sports | August 28, 2021

Hindi natapos ni Jerrold Pete Mangliwan ng Pilipinas ang kanyang karera sa 400M T52 Finals kagabi sa Tokyo Olympic Stadium. Na-diskwalipika si Mangliwan matapos na pumasok siya sa lane ng kalaro.

Napunta ang ginto kay Tomoki Sato ng Japan sa oras na 55.39 segundo na isang bagong Paralympic Record na dating hawak ng kababayan niyang si Tomoya Ito na 57.25 sa Beijing 2008 Paralympics. Sinundan siya ng silver nina Raymond Martin ng Estados Unidos (55.59) at isa pang Hapon na si Hirokazu Ueyonabaru (59.95) para sa bronze medal.

Pumang-apat si Gianfranco Iannotta ng U.S.(1:00.57) habang pang-lima si Leonardo de Jesus Perez ng Mexico (1:01.66) at pang-anim si Thomas Geierspichler ng Austria (1:02.68). Na-diskwalipika din si Isaiah Rigo ng U.S. sa parehong paglabag.

Nagsumite si Mangliwan ng ika-7 pinakamabilis na oras na 1:03.41 matapos ang dalawang qualifying heats noong umaga Biyernes. Kung hindi lumabag sa patakaran ng karera, magtatapos sana ang Pinoy na ika-lima. Babawi ngayon si Mangliwan sa kanyang dalawa pang nakatakdang karera. Lalaro siya sa 1,500M T52 sa Linggo at 100M T52 sa Setyembre 3.

Sa larangan ng Swimming, lumaban subalit nabitin ang isa pang beteranong Paralympian na si Ernie Gawilan sa 200M Individual Medley SM7 sa Tokyo Aquatics Center. Umoras ng 2:50.49 si Gawilan upang magtapos sa ika-5 sa kanyang qualifying Heat pero kinapos siya ng walong segundo para mapabilang sa walong pinakamabilis na lalangoy sa finals.

Panalo sa Heat at pasok sa finals sina Mark Malyar ng Israel (2:32.86), Inaki Basiloff ng Argentina (2:33.23), Andrii Trusov ng Ukraine (2:34.35) at Rudy Garcia-Tolson ng Estados Unidos (2:39.78). Umabante mula sa pangalawang heat sina Evan Austin ng Estados Unidos (2:35.40), Carlos Daniel Serrano ng Colombia (2:36.11), Christian Sadie ng Timog Aprika (2:36.75) at Pipo Carlomagno ng Argentina (2:42.43) habang na-diskwalipika ang may hawak ng World Record na si Yevhenii Bohodaiko ng Ukraine.

May dalawa pang pagkakataon bumawi ni Gawilan sa kanyang paboritong 400M S7 ngayong Linggo simula 8:00 ng umaga. Susundan ito ng langoy niya sa 100M Backstroke S7 sa Lunes simula din sa parehong oras.

Walang nakatakdang laro ang Pilipinas ngayong Sabado. Gagamitin itong pagkakataon nina Gawilan, Bejino at Mangliwan upang maghanda para sa mabigat nilang kalendaryo sa mga susunod na araw at ituloy ang paghanap sa unang medalya ng Pilipinas.