AFC Asian Cup, target ng Malditas vs. Hong Kong

ni Anthony E. Servinio - @Sports | September 24, 2021

Isang tabla lang ang kailangan ng Philippine Women’s Football National Team laban sa Hong Kong ngayong araw at pasok na sila sa inaasam na 2022 AFC Women’s Asian Cup. Nakatakda ang mahalagang qualifier ng 6 p.m. mula sa JAR Stadium ng Tashkent, Uzbekistan.

Kasalukuyang lamang ang Malditas sa Grupo F na may 3 puntos habang may tig-1 puntos ang Hong Kong at Nepal. Napadali ang trabaho nila matapos magtabla na walang naitalang goal ang Hong Kong at Nepal noong Miyerkules.

Todo ganado pa rin ang Malditas galing sa kanilang makapigil hiningang 2-1 tagumpay sa Nepal noong Sabado. Humabol ang mga Pinay mula sa 0-1 pagkalugmok at gumawa ng dalawang magkasunod na goal sa huling mga minuto ang mga bayaning sina Tahnai Annis at Camille Wilson upang maiwasang mapahiya.

Nagwagi ang Hong Kong sa Pilipinas, 2-0, noong 2001 AFC Women’s Asian Cup sa Chinese-Taipei. Subalit mula roon ay malaki ang inunlad ng Women’s Football matapos tumuklas at nagdatingan ang mga Filipinang manlalaro galing sa U.S. at Europa.

Pasok na sa 2022 AFCWomen’s Asian Cup ang defending champion Japan, Australia at Tsina sa bisa ng kanilang mataas na pagtatapos sa huling edisyon noong 2018 sa Jordan. Pasok din ang punong abalang India na huling lumahok noong 2003 sa Thailand.

Ang torneo ay magsisilbing qualifier para sa mga kinatawan ng kontinente sa 2023 FIFA Women’s World Cup sa Australia at New Zealand. Pasok na ang Australia bilang isa sa mga punong abala kaya may lima pang tiket na nakalaan para sa Asya.

Azkals, kahilera ng Group A sa AFF Suzuki Cup sa Disyembre

ni Anthony E. Servinio - @Sports | September 23, 2021

Nabunot ang Pilipinas sa Grupo A sa 2020 ASEAN Football Federation (AFF) Suzuki Cup na ginanap noong Martes ng hapon online. Matapos ang halos 2 taong paghihintay at ilang beses na ipinagpaliban, matutuloy na ang torneo sa Dis. 5, 2021 hanggang Enero 1, 2022.

Sasamahan ng Azkals sa grupo ng Thailand, Myanmar, Singapore at ang magwawagi sa playoff sa pagitan ng Brunei at Timor Leste. Binubuo ang Grupo B ng defending champion Vietnam, Malaysia, Indonesia, Cambodia at Laos.

Dahil sa pandemya, hindi muna iikot ang mga laro sa mga kalahok na bansa tulad noong dati. Sa halip, gagawin ang torneo sa isang lugar lang. Nag-alok na ng kanilang kahandaan na magsilbing punong abala ang Thailand, Singapore at Cambodia. Ihahayag sa linggo ng AFF ang kanilang mapipiling bansa.

Bubuksan ng Azkals ang kampanya sa Disyembre 8 laban sa Singapore. Susundan ito ng mga laro kontra Brunei o Timor Leste (Disyembre 11), Thailand (Disyembre 14) at Myanmar (Disyembre 18). Hati si Coach Scott Cooper sa resulta ng bunutan. “Thailand is the strongest team in the group, Singapore is always well organized, Myanmar has got talent and Timor Leste and Brunei will always fight so we should not take any team lightly,” wika ni Coach Cooper.

Sisikapin ng Azkals na makuha ang makasaysayang unang kampeonato ng Pilipinas. Simula 2010, palaging pasok ang Pilipinas sa semifinals maliban noong 2016 subalit lagi silang nabibitin.

Samantala, sasabak ang Under-23 Azkals sa qualifiers para sa 2022 AFC Under-23 Asian Cup simula ngayong Oktubre 27 hanggang 31 sa Singapore. Haharapin ng mga Pinoy ang Timog Korea, Timor Leste at punong abala Singapore para sa isang tiket sa Grupo H.

Karamihan ng mga manlalaro ay kukunin mula sa Azkals Development Team sa Philippines Football League (PFL). Ang 2022 AFC Under-23 Asian Cup ay gaganapin sa susunod na Hunyo sa Uzbekistan.

Silver plate si Fernandez kay Raducanu sa U.S. Open final

ni Anthony E. Servinio - @Sports | September 13, 2021

Kinumpleto ni Emma Raducanu ng Gran Britanya ang kanyang pagwalis ng 2021 US Open Tennis Championship Women’s Singles matapos talunin sa dalawang set si Leylah Fernandez ng Canada, 6-4 at 6-3, sa finals Linggo ng umaga mula sa Arthur Ashe Stadium ng USTA Billie Jean King National Tennis Center sa New York. Sa loob ng dalawang linggo, nasaksihan ang perpektong pag-usbong ng 18-anyos na dalagita mula sa qualifying round hanggang sa kampeonato kung saan hindi siya natalo ng kahit isang set sa loob ng 10 laro.

Umakyat sa 5-2 na lamang si Raducanu sa pangalawang set at handa na mauwi ang tropeo subalit nadulas siya at kinailangan gamutin ang kanyang dumudugong tuhod. Saglit nabuhayan ang pag-asa ni Fernandez at lumapit, 3-5, subalit iyon na ang huling narinig sa kanya at walang nakapigil sa martsa ni Raducanu sa aklat ng kasaysayan.

Pumasok sa laban si Fernandez na paborito sa bisa ng kanyang mas mataas na #73 sa mundo ayon sa pinakahuling ranggo ng Women’s Tennis Association (WTA) kumpara sa #150 na si Raducanu. Ilang bigating seeded players ang tinumba ni Fernandez habang puro mga kapwa unseeded ang mga tinalo si Raducanu.

Gamit ang kanyang bumobombang serbisyo, nakuha ng 5’9” na si Raducanu ang unang set. Nararapat lang na tinuldukan niya ang isang oras at 51 minuto na laban sa pamamagitan ng isang malakas na ace na sinundan agad ng kanyang pagbunyi.

Isa na ang Briton sa pinakabatang kampeon sa 135 taon na kalahok ang kababaihan sa US Open. Tanging ang mga Amerikanang sina Tracy Austin na 16 noong 1979 at Serena Williams na 17 noong 1999 ay mas bata.

Siya rin ang pangalawa mula sa kanyang bansa na nagwagi sa torneo matapos si Virginia Wade noong 1968. Isang kasapi sa International Tennis Hall of Fame, kampeon din si Wade sa 1972 Australian Open at 1977 Wimbledon subalit mula doon ay walang nanalong Briton ng mga Grand Slam hanggang dumating si Raducanu.