3 SAPATOS WORTH P133 K!
ni Ador V. Saluta - @Adore Me! | June 25, 2021
Sa isang vlog kung saan naglaro si Bayani Agbayani ng Uutangan o Ililibre, ibinunyag ng komedyante ang ilan sa mga kaibigan niya sa industriya na may mabuting kalooban.
Ilan dito sina Luis Manzano at Sharon Cuneta na pinatotohanan niya ang pagiging mapagbigay.
Pabirong inihayag ng komedyante na minsan daw ay nagagamit sila ng ilang personalidad sa kanilang vlog, subali't ni singkong duling ay wala man lang silang napala.
Pero, bago magalit ang mga netizens sa ilang artistang tinutukoy ni Bayani, nauna na nitong sinabi na mga showbiz friends niya ang mga ito, gaya nina Luis Manzano at Megastar Sharon Cuneta, na kanyang pinahahalagahan bilang mga totoong kaibigan.
Una niyang pinasaringan si Luis sa isang vlog kung saan naglaro sila ng Uutangan o Ililibre. 'Pag si Luis daw, uutangan.
“Uutangan, kasi maraming pera ‘yan. Marami kayang mga taxi ‘yan. Saka, maraming mga commercials. Minsan nga, nagagamit kami sa mga vlogs niyan, hindi naman kami binibigyan kahit singko,” pabirong sabi ni Bayani tungkol kay Luis.
Walang kasimbait naman daw si Luis, sabi ni Bayani, na ayon sa kanya, palagi siyang inililibre ng pagkain at binibigyan pa umano ng mga produktong ineendorso nito.
“Basta ‘Huy, punta kayo rito. Papakainin ko kayo,’ tapos iba-vlog na lahat ng gagawin namin. Aakbay lang ako sa kanya, kukunan na ng camera. Kahit sino sa amin. Tapos, makikita mo, ‘Uy, nasa vlog pala ako,’” masaya nitong kuwento.
Dagdag pa ni Yani, “Sasabihin niya, ‘Punta kayo ng dressing room ko, ha?’ ‘Bakit?’ ‘Basta.’ Tapos iba-vlog niya na ‘yun. Pumupunta po siya ngayon dito sa aking dressing room. Grabe! Parang si Alex Gonzaga.
"Pero mabait po ‘yang mga ‘yan,” dagdag na kuwento ni Yani.
“Si Luis, ‘yung mga sponsors niyan, tatawagan pa ako. ‘Kuya, ano’ng gusto mo rito?’ Dadalhin niya na lang sa taping, tapos ibibigay niya sa akin. Pero dapat talaga, utangan ‘yan,” alala pa ni Bayani.
Bukod kay Luis, isa sa mga itinuturing niyang bespren sa showbiz ay si Sharon. Kahit daw matagal silang hindi nagkikita, hindi nagbabago ang Megastar sa kanya once na siya'y maalala o sila'y magkita.
“Ang maganda lang kay Tita Shawie, alam mo, kahit hindi kayo nagkikita, maaalala ka niya,” sey ni Bayani.
Ayon sa komedyante, hinding-hindi raw niya makakalimutan ang regalong sapatos sa kanya ni Sharon.
Pahayag ni Bayani, “Tita Shawie, ipagmamalaki ko na ‘to. Itong Prada, Gucci at Givenchy — tatlong mahal na sapatos, binigyan ako ni Tita Shawie. Hindi na kami nagkikita, ah?”
Kung susumahin daw ang halaga ng mga iniregalong sapatos sa kanya ni Sharon, aabot umano sa P133,000!
“Tumawag lang siya, ‘Umorder ka ng tatlong sapatos.' Tapos, nakita ko, P45,000, P42,000, P46,000. ‘Tita Shawie, hindi ko po kaya ‘to. Isa lang po ang bibilhin ko.’ ‘Ano’ng bibilhin mo? Ako ang magbabayad niyan. Umorder ka na.’ Binayaran. Hindi kami nagkikita nang matagal na panahon, ah? Kaya uutangan si Tita Shawie?” masayang kuwento ni Bayani.
