Kasong kriminal sa sapilitang pagkuha ng gamit bilang bayad-utang

ni Atty. Persida Rueda-Acosta @Magtanong Kay Attorney | September 26, 2023

Dear Chief Acosta,

Mayroon akong pagkakautang sa aking kapitbahay na halagang 50,000 pesos. Noong dumating ang araw ng aming napagkasunduan para akin itong bayaran, kalahati lamang nito ang naibigay ko. Dahil dito, siya ay nagalit at sapilitan niyang kinuha ang aking pampasadang tricycle na umabot pa sa kanyang pananakit sa akin sapagkat ayaw ko itong ibigay. Pilit kong binabawi ang aking tricycle sapagkat wala na akong gagamiting pangkabuhayan ngunit ako ay nanatiling bigo. May nalabag bang batas ang aking kapitbahay sa kanyang ginawa? - Ernesto

Dear Ernesto,

Para sa iyong kaalaman, mayroong batas na nakasasaklaw sa iyong katanungan. Ayon sa Article 287 ng ating Revised Penal Code, na inamyendahan ng Republic Act No. 10951:

“Art. 287. Light coercions. – Any person who, by means of violence, shall seize anything belonging to his debtor for the purpose of applying the same to the payment of the debt, shall suffer the penalty of arresto mayor in its minimum period and a fine equivalent to the value of the thing, but in no case less than fifteen thousand pesos (₱15,000).

Any other coercions or unjust vexations shall be punished by arresto menor or a fine ranging from one thousand pesos (₱1,000) to not more than forty thousand pesos (₱40,000), or both.”

Sang-ayon sa nabanggit, ang krimen na light coercion ay magagawa kung: (1) ang offender ay kumuha ng bagay na pagmamay-ari ng ibang tao; (2) ang pagkuha ay bilang kabayaran sa pagkakautang sa kanya; at (3) ginawa niya ito sa pamamagitan ng karahasan.

Sa sitwasyon ninyo ng iyong kapitbahay, ang kanyang sapilitang pagkuha ng iyong tricycle upang gawing kabayaran sa iyong pagkakautang, na labag sa iyong loob at nagawa sa pamamagitan ng karahasan, ay maaaring magdulot ng kasong kriminal sa kanya, sang-ayon sa Article 287 ng Revised Penal Code.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Pagtataguyod sa kapakanan ng mga PWD

ni Atty. Persida Rueda-Acosta @Magtanong Kay Attorney | September 25, 2023

Dear Chief Acosta,

Isa ako sa mga persons with disability na naninirahan sa isang siyudad dito sa Luzon.

Kadalasan na pangamba ko ay ang kawalan ng gaanong atensyon sa mga tulad ko sa aming lugar para sa aming ibang pangangailangan. Nais ko lamang malaman kung may batas ba na naglalayon na tumutok sa kapakanan o pangangailangan ng mga tulad naming PWDs? Salamat. – Lili

Dear Lili,

Ang sagot sa iyong katanungan ay matatagpuan sa Seksyon 40 ng Republic Act No. No. 7277 o mas kilala bilang “Magna Carta for Disabled Persons”, na inamyendahan ng Republic Act No. 10070. Ayon dito:

“Section 40. Role of National Agencies and Local Government Units.

(a) Local government units shall promote the establishment of organizations of persons with disabilities (PWDs) in their respective territorial jurisdictions. National agencies and local government units may enter into joint ventures with organizations or associations of PWDs to explore livelihood opportunities and other undertakings that shall enhance the health, physical fitness and the economic and social well-being of PWDs.

(b) Local government units shall organize and establish the following:

(1) Persons with Disability Affairs Office (PDAO)

A PDAO shall be created in every province, city and municipality. The local chief executive shall appoint a PWD affairs officer who shall manage and oversee the operations of the office, pursuant to its mandate under this Act. Priority shall be given to qualified PWDs to head and man the said office in carrying out the following functions:

i. Formulate and implement policies, plans and programs for the promotion of the welfare of PWDs in coordination with concerned national and local government agencies.”

Ayon sa nasabing probisyon ng batas, ang lokal na pamahalaan ay inaatasan na iengganyo ang pagkakaroon ng isang organisasyon ng mga persons with disabilities sa kanilang nasasakupan. Ganoon din, ang national government ay pinapayagan na pumasok sa mga joint ventures sa mga organisasyon o asosasyon ng mga PWD na makapagpapalawig ng mga oportunidad na makapagpapatibay sa kalusugan ng PWDs at kanilang economic and social well-being. Karagdagan dito, inaatasan din ang lokal na pamahalaan na mag-organisa at magtayo ng opisina na tinatawag na Persons with Disability Affairs Office (PDAO) na magtataguyod sa kapakanan ng mga PWD. Kung kaya sa iyong nabanggit na sitwasyon, ang inyong lokal na pamahalaan ay may responsibilidad na magkaroon ng isang organisasyon o opisina na siyang tututok sa mga pangangailangan ng PWDs sa inyong lugar at siyang mangangalaga sa inyong mga kapakanan.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Pagbebenta sa ari-ariang isinanla

ni Atty. Persida Rueda-Acosta @Magtanong Kay Attorney | September 24, 2023

May mga pagkakataon na ang iba sa ating mga kababayan, kapag sila ay nagigipit sa pinansyal na aspeto, ay napipilitang mangutang at ginagamit ang kanilang mga ari-arian upang maging garantiya sa kanilang pagkakautang.

Kung hindi makabayad ang nangutang, maaaring gamitin ng taong pinagsanglaan ang nakaprendang ari-arian at ipabenta ito para magkaroon ng pondo kung saan kukunin ang kabayaran sa halaga ng pagkakautang.

Upang bigyan ng kaayusan ang nasabing pagbebenta ng bagay na isinangla, ipinasa ng Korte Suprema para sundan ng lahat ng clerks of courts na tatayong ex-officio sheriff sa mga extra-judicial foreclosure of mortgage. Ito ay ang A.M. No. 99-10-05-0 Re: Procedure in Extrajudicial Foreclosure of Mortgage, 14 December 1999.

Ang extra-judicial foreclosure of mortgage ay isang paraan kung saan ang pinagsanglaan ng isang ari-arian, matapos na hindi makabayad ang nangutang ay ibebenta ang ari-ariang isinangla (mortgaged property) upang maging kabayaran ng halagang inutang.

Nakapaloob sa nasabing issuance ng Korte Suprema ang mga proseso na susundan ng bawat panig upang maging maayos ang pagbebenta ng mortgaged property. Kadalasan na gumagawa nito ay mga financing institutions gaya ng bangko.

Sang-ayon sa A.M. No. 99-10-05-0, ang lahat ng aplikasyon para sa extra-judicial foreclosure of mortgage ay kailangang maisumite sa Executive Judge sa pamamagitan ng Office of the Clerk of Court ng Regional Trial Court na nagsisilbi bilang Ex-Officio Sheriff sa mga extra-judicial foreclosure of mortgage. Pagkatanggap ng nasabing aplikasyon, ang mga sumusunod ang prosesong dapat na maipatupad:

1. Obligasyon ng clerk of court na tanggapin at ilagay sa docket ang nasabing aplikasyon at tatakan ito ng file number, at oras at petsa ng nasabing araw ng aplikasyon;

2. Pagkatapos na tanggapin ang nasabing aplikasyon, ang kaukulang filing fees ay babayaran ng naghain ng aplikasyon;

3. Kapag ang ibebentang ari-arian ay real property, tungkulin din ng clerk of court na suriin kung ang naghain ng aplikasyon ay sumunod sa mga requirements bago ang public auction ay maisagawa sa direksyon ng sheriff o notary public alinsunod sa Seksyon 4 ng Act No. 3135, as amended;

4. Ang clerk of court ay magsasagawa ng certificate of sale pagkatapos ng pagsang-ayon ng Executive Judge o ng Vice-Executive Judge kung wala ang huli;

5. Pagkatapos ng pagbigay ng certificate of sale sa pinakamataas na bidder, itatago ng clerk of court ang kumpletong record ng extra-judicial foreclosure sale, habang hinihintay ang redemption period ng nagsangla sa loob ng isang taon mula sa araw ng nasabing sale at public auction;

6. Ang lahat ng notices ng auction sale ay kinakailangang maipagbigay-alam sa publiko at mailathala sa isang newspaper of general circulation;

7. Lahat ng aplikasyon para sa extra-judicial foreclosure of mortgage ay ira-raffle sa lahat ng sheriff, kasama ang mga nakatalaga sa Office of the Clerk of Court at Sheriff IV na nakatalaga sa mga branches ng Regional Trial Court;

8. Ang auction sale ay dapat na lahukan ng hindi bababa sa dalawang bidders. Kung kulang ang bidders, ang auction sale ay ipagpapaliban sa ibang petsa. Sa susunod na petsang itinalaga para sa auction sale, itutuloy ang pagbebenta kahit pa kulang sa dalawang bidders;

9. Ang mga pangalan ng bidders ay iuulat ng sheriff o ng notary public na nagsagawa ng auction sale sa clerk of court bago ang pagbibigay ng certificate of sale.