Pag-renew ng lisensya ng registered nutritionist-dietitian, kada 3 taon

ni Atty. Persida Rueda-Acosta @Magtanong Kay Attorney | Enero 17, 2024

Dear Chief Acosta,

Isang Registered Nutritionist-Dietitian (RND) ang aking kapatid. Pinagkalooban siya ng sertipiko at lisensya bilang isang RND noong Hunyo 2020. Hindi niya matandaan ang saktong araw ng pagkakaloob ng sertipiko at lisensya sapagkat nawawala ang kanyang ID.  Nararapat bang asikasuhin na niya ang renewal ng kanyang sertipiko o lisensya? Salamat sa inyo. -- Peter

Dear Peter,

Ang sagot sa iyong katanungan ay matatagpuan sa Seksyon 20 ng Republic Act No. 10862, o mas kilala sa tawag na “Nutrition and Dietetics Law of 2016,” na nagsasaad na:

“Section 20. Issuance of Certificate of Registration and Professional Identification Card. - A certificate of registration shall be issued to those who have passed the licensure examination, subject to compliance with the registration requirements and payment of fees, as prescribed by the Commission. It shall bear the signature of the Chairperson of the Commission and the Chairperson and members of the Board, indicating that the person named therein is entitled to the practice of the profession with all the privileges appurtenant thereto. Until withdrawn, revoked, or suspended in accordance with this Act, the certificate registration shall remain in full force and effect.

A professional identification card, bearing the registration number and date, its validity and expiry duly signed by the Chairperson of the Commission, shall likewise be issued to every registrant who has paid the prescribed fee. It shall be renewed every three (3) years upon payment of the prescribed fees therefor and compliance with the CPD requirement.”

Ayon sa nasabing probisyon ng batas, ang certificate of registration ay ipinagkakaloob sa mga pumasa ng licensure exam upang maging isang Registered Nutritionist-Dietitian (RND).  Maliban dito, nagbibigay rin ng isang professional identification card kung saan nakalahad ang numero ng pagkakarehistro, araw ng pagiging epektibo nito, at araw ng kawalan ng bisa nito.  Ang nasabing ID ay pirmado ng chairperson ng Professional Regulation Commission (PRC) at nararapat na i-renew kada tatlong taon, sa pamamagitan ng pagbabayad ng mga karampatang fees at pagsunod sa iba pang requirements ng continuing professional development.

Sa iyong nabanggit na sitwasyon, mayroon lamang tatlong taon, magmula noong Hunyo 2020, ang iyong kapatid upang asikasuhin ang pagre-renew ng sertipiko o lisensya niya bilang isang RND. Nais din naming ipaalam sa iyo na kung ang isang tao ay lumabag sa nasabing batas, siya ay maaaring mapatawan ng parusang pagbabayad ng multa o pagkakakulong, o parehong pagbabayad ng multa at kulong, base sa Seksyon 39 ng Republic Act No. 10862.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Pagpili ng Nationality ng misis na may mister na American citizen

ni Atty. Persida Rueda-Acosta @Magtanong Kay Attorney | Enero 16, 2024

Dear Chief Acosta,

Ang asawa ko ay matagal nang nagtatrabaho sa ibang bansa at nitong nakaraang buwan ay naging American citizen na siya. Dahil kasal kami, nawala na rin ba ang aking Philippine citizenship nang ang asawa ko ay naging mamamayan ng ibang bansa? - Gina

Dear Gina, 

Para sa iyong kaalaman, ang batas na nakasasaklaw sa iyong sitwasyon ay ang Chapter V, Section 19 ng Republic Act No. 9710 o mas kilala sa tawag na The Magna Carta of Women, kung saan nakasaad na:

“SEC. 19. Equal Rights in All Matters Relating to Marriage and Family Relations. – The State shall take all appropriate measures to eliminate discrimination against women in all matters relating to marriage and family relations and shall ensure:

x x x 

(g) women shall have equal rights with men to acquire change, or retain their nationality. The State shall ensure in particular that neither marriage to an alien nor change of nationality by the husband during marriage shall automatically change the nationality of the wife, render her stateless or force upon her the nationality of the husband.  Various statutes of other countries concerning dual citizenship that may be enjoyed equally by women and men shall likewise be considered.” 

Sang-ayon sa nabanggit, malinaw na ang pagpapalit ng nasyonalidad ng asawang lalaki ay hindi dahilan upang kaagad na mabago ang nasyonalidad o mawala ang Philippine citizenship ng kanyang asawang babaeng Pilipino. Ayon sa batas, ang isang babaeng Pilipino ay may karapatan na panatilihin ang kanyang pagka-Filipino, kahit na nagpalit ng nasyonalidad ang kanyang asawa. 

Ibig sabihin, hindi mawawala ang iyong Philippine citizenship nang dahil lamang sa pagpapalit ng nasyonalidad ng iyong asawa. Ikaw ang may karapatang magpasya ukol sa iyong nasyonalidad, at hindi ang iyong asawa.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Termino ng isang korporasyon sa ilalim ng Revised Corporation Code

ni Atty. Persida Rueda-Acosta @Magtanong Kay Attorney | Enero 15, 2024

 Dear Chief Acosta,

Noong taong 2009, ang aking ama ay nagtatag ng isang korporasyon, na kung saan ako ay isa sa mga itinalagang incorporators. Alinsunod sa aming Articles of Incorporation, ito ay nakatakdang matapos sa susunod na taon. Nais kong malaman kung may probisyon sa kasalukuyang Corporation Code na makakaapekto sa aming corporate term? - Melissa

Dear Melissa,

Ang batas na sasaklaw patungkol sa estado ng inyong korporasyon ay ang Republic Act No. 11232 o mas kilala bilang Revised Corporation Code of the Philippines. Nakasaad sa Section 11 ng nasabing batas na:

“SEC. 11. Corporate Term. – A corporation shall have perpetual existence unless its articles of incorporation provides otherwise. 

Corporations with certificates of incorporation issued prior to the effectivity of this Code, and which continue to exist, shall have perpetual existence, unless the corporation, upon a vote of its stockholders representing a majority of its outstanding capital stock, notifies the Commission that it elects to retain its specific corporate term pursuant to its articles of incorporation: Provided, That any change in the corporate term under this section is without prejudice to the appraisal right of dissenting stockholders in accordance with the provisions of this Code.” 

Ayon sa nabanggit na probisyon ng kasalukuyang batas, ang termino ng isang korporasyon ay walang hanggan. Ang mga korporasyon na nabuo bago maipasa ang kasalukuyang batas ay magkakaroon ng kaparehong termino, liban lamang kung ang mga stockholders na kumakatawan sa majority ng outstanding capital stock ng nasabing korporasyon ay siyang mag-abiso sa Securities and Exchange Commission (SEC) na kanilang pinipili ang termino na nakasaad sa kanilang articles of incorporation.

Sa ganoong pagkakataon, ang termino na masusunod ay kung ano ang nakasaad sa articles of incorporation.

Sa inyong sitwasyon, ang termino ng inyong korporasyon ay mananatili sa kabila ng nakasaad na pagtatapos nito, alinsunod sa inyong articles of incorporation. Subalit, kung nais ninyong sundin ang terminong nakasaad sa articles of incorporation, marapat na ito ay ipagbigay-alam ninyo sa SEC sa pamamagitan ng boto ng inyong stockholders na kumakatawan sa majority ng outstanding capital stock.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.