21 patay, 3 sugatan sa salpukan ng bus at truck sa Egypt

ni Ronalyn Seminiano Reonico | April 15, 2021

Dalawampu't isa ang patay at 3 ang sugatan matapos salpukin ng truck ang isang bus sa southern Egypt noong Martes, ayon sa awtoridad.

Sa highway sa southern province ng Assiut naganap ang insidente kung saan nag-overtake diumano ang bus sa truck na naging dahilan ng pagkakabanggaan ng dalawa. Parehong nagliyab ang dalawang sasakyan, ayon kay Assiut Gov. Essam Saad.

Kaagad namang isinugod sa ospital ang mga biktima.

Ayon sa awtoridad, under reconstruction ang naturang kalsada kung kaya’t walang traffic signs.

Tinatayang aabot sa 18 katao ang nasunog at ang dalawang drivers ay kabilang din sa mga pumanaw.

Samantala, ayon sa ulat, madalas nagaganap ang traffic accidents sa Egypt at base sa statistics ng naturang bansa, tinatayang aabot sa 10,000 ang naitalang road accidents noong 2019 kung saan 3,480 ang namatay.

Transport minister ng Taiwan, magre-resign dahil sa train crash

ni Ronalyn Seminiano Reonico | April 5, 2021

Magbibitiw sa puwesto bilang transport minister ng Taiwan si Minister Lin Chia-lung matapos ang madugong insidente kung saan marami ang nasawi sa train crash noong nakaraang linggo sa eastern city ng Hualien.

Kumpirmadong 50 katao ang nasawi at 200 ang sugatan matapos bumangga sa isang truck ang express train na may lulang 500 pasahero noong Biyernes.

Ayon kay Lin sa kanyang Facebook page, magbibitiw siya sa puwesto pagkatapos ng pagsasagawa ng rescue operations.

Aniya, “I should have accepted all the criticism over the past few days, but we have not done well enough.”

Kasalukuyan pa ring iniimbestigahan ng awtoridad ang insidente.

SUV, inararo papasok ang bangko, empleyado sugatan

ni Lolet Abania | March 17, 2021

Inararo ng sports utility vehicle (SUV) ang isang bangko sa Quezon City na nagresulta sa pagkakasugat ng isang empleyado nito ngayong Miyerkules.

Sa ulat ng Quezon City Police District, kinilala ang driver na si Esther Peralta, 64-anyos, isang doktor, na aksidenteng naapakan ang accelerator kesa ang brake ng kanyang kotse habang paalis na mula sa parking space ng bangko sa may Congressional Avenue sa kahabaan ng EDSA Northbound sa Barangay Ramon Magsaysay, Quezon City kaya dire-diretsong sinuyod nito ang loob ng bangko bandang alas-8:00 ng umaga.

Umabot ang SUV hanggang sa counter ng bangko dahilan kaya nasira ang ilang gamit sa loob nito gaya ng ATM at mga computers.

"Nag-withdraw siya sa ATM. When she left around 7:30 AM, paalis na siya, eh, paatras po siya, naramdaman niya po 'yung sasakyan niya na pasulong," ayon sa imbestigador na si Police Staff Sgt. Ruel Ang. "Pinatay niya po ang engine niya, then tinry niyang ikambiyo sa park.

She started again, then the vehicle moved forward. Bumulusok na po siya tuluy-tuloy," sabi pa ni Ang. Kinilala ang biktimang si Aileen Marco, 44-anyos, bank employee, na nasugatan sa insidente at agad ding dinala sa East Avenue Medical Center habang hindi naman nasaktan ang driver na doktor.

Ayon pa sa mga awtoridad, maaaring maharap sa reklamong reckless imprudence resulting in damage to property with slight physical injury ang babaeng driver. Inaalam na rin ng pulisya ang sanhi ng pagbulusok ng sasakyan.