State of calamity sa Abra at Mountain Province

ni Mai Ancheta @News | July 29, 2023

Inilagay sa state of calamity ang mga lalawigan ng Abra at Mountain Province dahil sa matinding pinsalang iniwan ng Bagyong Egay.

Inaprubahan ng sangguniang panlalawigan ng nabanggit na mga lugar ang rekomendasyon ng kanilang disaster councils na magdeklara ng state of calamity upang mapabilis ang relief at rehabilitasyon ng mga iniwang pinsala ng kalamidad.

Batay sa report ng Mountain Province Disaster Office, nag-iiwan ng tinatayang P350 milyong halaga ng pinsala sa mga pananim at ari-arian ang Bagyong Egay sa 10 munisipalidad.

Maraming mga bahay at mga pananim ang nalubog sa baha sa Abra bukod pa sa mga imprastrakturang napinsala dahil sa bagyo.

Naunang nagdeklara ng state of calamity ang lalawigan ng Ilocos Norte at Dagupan City dahil sa matinding pinsalang idinulot ng bagyo.

Security personnel ni Pilar, Abra Vice Mayor Disono, patay sa shooting incident

ni Lolet Abania | March 29, 2022

Patay ang isang security personnel ni Pilar, Abra Vice Mayor Jaja Josefina Disono sa naganap na barilan ngayong Martes sa lugar, kung saan pinaniniwalaan ng lokal na opisyal na isang ambush habang inilarawan ito ng pulisya bilang armed encounter.

Ayon kay Disono, pauwi na siya sa kanyang bahay na galing sa municipal hall nang mangyari ang shooting incident.

“May kausap lang ako. Tapos po sinabi ng empleyado na ‘yung tatay noong kalaban ng kapatid ko na incumbent mayor pumunta sa pulis. Tapos, mamaya may checkpoint,” sabi ni Disono.

Sinabi ng alkalde na huminto ang sasakyan niya sa isang checkpoint at pinadaan na rin kalaunan. Aniya, sinabihan ng pulisya ang kanyang tauhan na lulan naman ng isa pang sasakyan na bumaba rito.

“Siguro natakot, eh sumunod na sa amin. Binakbakan na ‘yung kasama namin, ‘yung sa likod. May namatay po kaming kasama,” saad ni Disono.

Sa inisyal na report mula sa PROCOR, alas-10:30 ng umaga naganap ang insidente sa Barangay Poblacion, kung saan hindi pinansin ng Toyota Hiace ang checkpoint matapos na parahin ito ng mga pulis.

Ayon sa pulisya, ang dalawang personnel ng Regional Mobile Force Battalion 15, na nagsisilbi bilang kanilang rear security, ay binangga umano ng naturang sasakyan.

Batay pa sa report, isang police mobile ang humabol sa tumatakas na Toyota Hiace habang ang mga sakay nito ay nagpaputok umano ng baril sa sasakyan ng pulisya.

“Hot pursuit operation ensued, wherein the motor vehicle fled towards the compound/residence of Vice Mayor Jaja Josefina Disono,” ayon sa report.

Ayon kay PROCOR chief Police Brigadier General Ronald Lee, hindi isang ambush ang nangyaring insidente.

“Hindi ambush. VM and her armed civilian escorts ignored the PNP checkpoint at sinagasaan ang dalawang pulis natin at pinuputukan ng mga armed goons ni VM kaya nagkahabulan,” giit ni Lee.

Sinabi pa ni Lee, kinordon na ng pulisya ang tirahan ni Disono dahil ang mga armadong indibidwal ay nagtungo roon.

Sanggol, pugot na nang ipanganak sa Abra

ni Lolet Abania | October 12, 2021

Pugot na umano ang ulo ng isang sanggol nang maipanganak ito sa lalawigan ng Bangued, Abra.

Sa salaysay ng ina ng sanggol, sinabi ng isa sa mga nag-assist sa kanyang panganganak na ang sanggol ay patay na nang mailuwal niya.

Gayunman, hindi ipinaalam sa kanya na ang sanggol ay decapitated o pugot na. Nakita lamang nilang ganito nang makauwi na sila ng bahay.

Kinokonsidera naman ng pamilya na magsampa ng kaso laban sa Abra Provincial Hospital.

Ayon sa mga opisyal ng ospital, handa silang harapin ang anumang kaso na isasampa laban sa kanila.

Nagsasagawa na ng imbestigasyon ang mga awtoridad hinggil sa insidente at humingi na rin ng statement sa attending physician nito.

Paliwanag ng hospital officials, ang sanggol ay namatay na habang nasa loob pa ng sinapupunan ng kanyang ina at kinakailangan nilang tanggalin upang mailigtas ang buhay ng nanay nito.