Kampo ni Marcos, itinangging sasali sa Comelec debate

ni Lolet Abania | February 24, 2022

Naglabas ng pahayag ang kampo ni presidential candidate Ferdinand “Bongbong/BBM” Marcos, Jr. at itinangging sumang-ayon na itong sumali sa March 19 debate na sponsored ng Commission on Elections (Comelec), ilang oras matapos na ianunsyo ng poll body ngayong Huwebes na lahat ng prexy bets ay kumpirmadong dadalo rito.

Sa isang statement, idineny ng spokesman ni Marcos na si Vic Rodriguez ang pahayag ni Comelec spokesman James Jimenez sa mga reporters na lahat ng 10 presidential candidates ay dadalo sa debate.

“Marcos has not yet confirmed his participation in the Comelec-sponsored debate, which was scheduled from 7 p.m. to 9:30 p.m. on March 19, 2022,” giit ni Rodriguez.

Ayon kay Rodriguez, ang partisipasyon ni Marcos sa debate aniya, “only be confirmed if his hectic campaign schedules permit.”

Si Marcos, kung saan frontrunner sa mga surveys sa ngayon, ay paulit-ulit nang tinanggihan na makiisa sa mga debate.

Subalit, sa Twitter, inilabas naman ni Jimenez ang isang liham mula sa kampo ni Marcos na may petsang Pebrero 11, kung saan nakasaad dito, “Marcos’ readiness to join” sa debate.

Ang liham ay isinulat ni national campaign manager ni Marcos at dating Metropolitan Manila Development Authority (MMDA) chief Benhur Abalos.

“If more confirmation is needed, the COMELEC awaits the same with bated breath. Nevertheless, preparations for the #PiliPinasDebates2022 push thru,” sabi ni Jimenez.

Mga kandidato sa 2022 elections, dapat sumali sa Comelec debate — spox

ni Lolet Abania | January 22, 2022

Ipinahayag ni Commission on Elections (Comelec) spokesperson James Jimenez ngayong Sabado na ang mga kandidato sa pagka-pangulo at bise presidente sa 2022 elections ay dapat mag-commit na sumali sa Comelec debates kung saan magsisimula na ito sa susunod na buwan.

Ginawa ni Jimenez ang statement matapos na tanggihan na lumahok ni presidential aspirant at dating senador Ferdinand “Bongbong” Marcos Jr. sa “The Jessica Soho Presidential Interviews” ngayong Sabado.

“Presidential and Vice-Presidential candidates should commit, to the public whose votes they seek, that they will participate in the #PiliPinasDebates2022. #gauntlet,” ani Jimenez sa Twitter.

Una nang sinabi ni Jimenez na sa ilalim ng batas, hindi kinakailangan na ang mga kandidato ay lumahok sa public debates, at hindi maaaring obligahin ng poll body ang mga kandidato na sumali rito.

Gayunman, ang mga kandidato ay nakikilahok sa ganitong uri ng public forum dahil ani Jimenez sa tinatawag na “massive airtime”.

Ayon sa opisyal, pinaplano ng Comelec na magsagawa ng isang public debate kada buwan para sa presidential at vice presidential candidates simula sa Pebrero hanggang Abril.

Paliwanag ni Jimenez, sisimulan nila ang pirmahan ng memoranda of understanding (MOU) sa bawat kandidato para puwede silang magkasundo sa mga rules ng mga debates.

Ang campaign period sa mga kandidato para sa national posts ay magsisimula sa Pebrero 8, habang ang campaign period naman para sa local candidates ay sa Marso 25. Nakatakda ang 2022 national at local elections sa Mayo 9.