top of page
Search

Mental health services sa mga eskwelahan, aarangkada na

  • BULGAR
  • Jan 4, 2024

ni Kuya Win Gatchalian @Win Tayong Lahat | January 4, 2024

Happy New Year!


Positibo ang ating mindset sa pag-angat ng sektor ng edukasyon ngayong pumasok na ang taong 2024, lalo na’t kaakibat ng mas mataas na national budget sa taong ito ang ilang makabuluhang programa para sa kapakanan ng mga kabataan. Kasama na rito ang aspeto ng mental health ng mga mag-aaral, kung saan Php210 milyong pondo ang nakalaan ngayong taon para sa pagpapatupad ng mga programa at adbokasiya sa mental health ng Department of Education (DepEd).


Mahalagang matutukan ang pagpapatibay at epektibong pagpapalaganap ng mga paraan upang maisulong ang mental health sa ating mga paaralan. Kaya naman tiniyak natin na sa ilalim ng 2024 budget ay mayroon tayong pondo para sa mga programa ng DepEd at masuportahan ang mental na kalusugan ng ating mga mag-aaral.


Batay sa datos ng DepEd, 1,686 na mga mag-aaral ang nagpakamatay sa pagitan ng School Year (SY) 2017-2018 at SY 2022-2023, habang 7,892 naman ang nagtangkang magpakamatay.


Patunay din ang resulta ng international large-scale assessments na nagpapakita ng mataas na bilang ng mga insidente ng bullying sa mga paaralan sa Pilipinas. Base sa datos ng 2019 Southeast Asia Primary Learning Metrics (SEA-PLM), mas maraming mga estudyante sa ating bansa ang nakakaranas ng pambu-bully (63.2 porsyento), aggression (9.2 porsyento), karahasan (12.3 porsyento), at offensive behavior (28.8 porsyento) kung ihahambing sa ibang mga mag-aaral sa Southeast Asia.


Sa resulta naman ng 2022 Programme for International Student Assessment (PISA), isa sa tatlong mag-aaral na 15 taong gulang ang nakaranas ng bullying nang hindi bababa sa isang beses sa isang linggo. Bumaba man ang bilang ng mga mag-aaral na nakaranas ng bullying sa pagitan ng 2018 at 2022, nananatili pa ring hamon ang pagsugpo sa bullying, lalo na sa mga lalaki at sa mga public school. Lumabas din sa ulat ng PISA na mas mababa ng 11 hanggang 44 puntos ang nakukuhang score sa Mathematics ng mga mag-aaral na nakaranas ng pambu-bully nang ilang beses sa isang buwan.


Mandato ko bilang chairman ng Senate Committee on Basic Education ang maisulong ang dekalidad na edukasyon para sa lahat.


Kaya naman isinusulong ng inyong lingkod ang pagsasabatas ng Basic Education Mental Health and Well-Being Promotion Act (Senate Bill No. 2200) upang gawing institutionalized ang School-Based Mental Health Program. Dito, sisiguraduhing may sapat na access ang mga bata sa school-based mental health services sa mga ipapatayong care center, katuwang ang mga mental health specialists at associates. 

 

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

 
 

Free wifi sa lahat ng public schools, madaliin

  • BULGAR
  • Dec 28, 2023

ni Kuya Win Gatchalian @Win Tayong Lahat | December 28, 2023

Mahalaga ang pagpapabilis ng proseso ng digitalization sa bansa para matiyak na may sapat na learning materials ang ating mga mag-aaral.


Lumabas sa 2022 Programme for International Student Assessment (PISA) na mas mataas ang Pilipinas sa index ng kakulangan ng learning materials kung ihahambing sa ibang bansa na bahagi ng Organization for Economic Co-Operation and Development (OECD). Ang isang unit na pagtaas sa index ng kakulangan sa learning materials ay nagresulta sa pagbaba ng apat na puntos sa mathematical performance.


Ayon pa sa naturang pag-aaral, 55 porsyento ng mga mag-aaral ay pumapasok sa mga paaralan kung saan iniulat ng mga punong-guro nila ang kawalan ng educational materials, kabilang ang mga textbook, international and communications technology (ICT) equipment, library o laboratory materials. Pumalo naman sa 49 porsyento ang mga nasa paaralan kung saan iniulat ng kanilang mga punong-guro ang kakulangan o mababang kalidad ng mga educational materials.


Anim sa 10 mag-aaral ang mga nasa paaralan kung saan iniulat ng kanilang mga punong-guro ang kakulangan sa mga digital resources (63 porsyento) at mababang kalidad ng digital resources (63 porsyento), kabilang ang laptop computers, internet access, learning management systems, o mga school learning platforms.


Lumabas din sa resulta ng PISA na kung ikukumpara natin sa ibang mga bansang bahagi ng OECD, mas positibo ang naging karanasan ng mga Pilipinong mag-aaral sa home-based learning. Pitumpu’t siyam na porsyento ng mga mag-aaral ang nagsabing inangat ng distance learning ang kanilang kakayahang gumamit ng mga digital devices para sa pag-aaral, habang 83 porsyento naman ang nagsabing handa ang mga guro na magpatupad ng distance learning.


Ayon pa sa 2022 PISA, umaabot sa 10.7 oras ang ginugugol ng mga 15 taong gulang na mag-aaral sa mga digital resources, anim na oras sa pag-aaral at 4.7 na oras para sa leisure. Naiuugnay ang bawat isang oras na paggamit ng digital devices sa pag-aaral sa tatlong puntos na pagtaas sa kanilang score sa Math, ngunit nagdudulot naman ng pagbaba ng apat na puntos ‘pag ginagamit sa paglilibang.


Patunay ang mga datos na ito, pati na ang mga karanasan ng bansa noong panahon ng pandemya, na kailangan nang wakasan ang digital divide at palawakin ang paggamit sa digital education upang isulong ang modernisasyon at inobasyon sa sektor. Dapat nating tiyakin na patuloy ang pag-aaral pagdating ng anumang sakuna.


Kabilang sa mga inihaing panukalang batas ng inyong lingkod na konektado sa digitalization ay ang Digital Transformation in Basic Education Act (Senate Bill No. 383).


Sa ilalim nito, magiging mandato sa Department of Information and Communications Technology (DICT) na pabilisin ang paglalagay ng libreng public Wi-Fi sa lahat ng mga pampublikong paaralan.


Nakasaad din sa panukalang batas na dapat patatagin ng DepEd ang kakayahan ng mga paaralan pagdating sa kanilang information and communications technology (ICT) upang magpatupad ng distance learning. 

 

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

 
 

Batas laban sa bullying ipatupad, panukalang mangangalaga sa mental health ng estudyante suportahan

  • BULGAR
  • Dec 21, 2023

ni Kuya Win Gatchalian @Win Tayong Lahat | December 21, 2023

Alam naman natin na ang bullying ay nagdudulot ng mababang self-esteem, kawalan ng kumpiyansa, at kahirapan sa pag-focus sa pag-aaral ng mga biktima nito. Maaari ring maapektuhan ang kanilang emosyonal na kalagayan na puwedeng magresulta sa pagbaba ng interes sa kanilang pag-aaral.

 

Nakita natin ito sa resulta ng 2022 Programme for International Student Assessment o PISA kung saan bumaba ng 11 hanggang 44 puntos ang marka sa Mathematics ng mga mag-aaral na nakaranas ng bullying sa loob ng isang buwan.

 

Batay sa datos ng 2022 PISA, nananatiling problema ang bullying, lalo na sa mga lalaking mag-aaral at sa mga pampublikong paaralan. Sa katunayan, ayon sa naturang assessment, isa sa tatlong mag-aaral na Pilipino ang nakararanas ng bullying nang hindi bababa sa isang beses sa loob ng isang linggo. Ang PISA ay isang pag-aaral na isinasagawa ng Organization for Economic Co-Operation and Development (OECD) kung saan sinusuri nila ang kakayahan ng mga mag-aaral na 15 taong gulang.

 

Gayunpaman, bumaba na ang bilang ng mga naitalang pambu-bully. Ayon pa sa pinakahuling PISA, mula 50 porsyento noong 2018, bumaba sa 28 porsyento noong 2022 ang bilang ng mga mag-aaral na iniulat na pinagkatuwaan sila ng kanilang mga kapwa mag-aaral. Mula 35 porsyento noong 2018, bumaba sa 19 porsyento noong 2022 ang bilang ng mga mag-aaral na nagsabing pinagbantaan sila ng ibang mga mag-aaral.


Noong 2018, 33 porsyento ng mga mag-aaral ang nag-ulat na sinadya silang iwan sa ere ng ibang mga mag-aaral. Noong nakaraang taon, bumaba sa 14 porsyento ang bilang ng mga mag-aaral na nag-ulat ng parehong karanasan.

 

Ayon sa Department of Education (DepEd), 21,521 ang naitalang kaso ng bullying noong School Year (SY) 2018-2019. Bumaba ito sa 11,637 noong SY 2019-2020 — posibleng dahil sa pagpapatupad ng distance learning.

 

Bilang chairman ng Senate Committee on Basic Education, patuloy na isinusulong ng inyong lingkod ang mga programa para sa proteksyon at kapakanan ng mga kabataan. 

 

Ipinapanawagan natin ang epektibong pagpapatupad ng Anti-Bullying Act of 2013 (Republic Act No. 10627). Kung inyong matatandaan, pinangunahan natin noong Pebrero ang pagrepaso sa pagpapatupad ng Anti-Bullying Act of 2013, kung saan hinimok natin ang DepEd na paigtingin ang mga mekanismo nito para sa pag-uulat ng mga insidente kaugnay ng pambu-bully. 

 

Isinusulong din natin ang pagsasabatas ng Basic Education Mental Health and Well-Being Promotion Act (Senate Bill No. 2200). Layon ng panukala na gawing institutionalized ang School-Based Mental Health Programs. 


May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

 
 
RECOMMENDED
bottom of page