Bagyong Egay at Habagat, joint forces

ni Jeff Tumbado @Weather News | July 25, 2023

Mas tumindi pa ang Bagyong Egay habang ito'y posibleng mag-landfall sa kalupaan ng Babuyan Islands-Batanes area ngayong araw ng Martes.

Sa latest update ng PAGASA, huling namataan ang gitna ng bagyo 525 kilometro silangan ng Baler, Aurora kahapon ng hapon.

Ito ay may lakas ng hangin na 150 kilometro kada oras malapit sa gitna na may bugso ng hangin hanggang 185 kilometro kada oras at mabagal na tumatawid sa direksyong pakanluran.

Malaki rin ang posibilidad na tumama ang bagyo sa mainland Cagayan.

Nakikita ang nasa 50-100 millimeter na pag-ulan sa mga bahagi ng Cagayan, Catanduanes, Camarines Sur, Camarines Norte, at hilagang bahagi ng Sorsogon sa susunod na dalawang araw.

Maaaring palakasin din ng Bagyong Egay ang hanging Habagat na siyang magdadala ng mga pag-ulan sa kanlurang bahagi ng Central Luzon, Timog Luzon at Visayas sa susunod na tatlong araw.

Tinatayang lalabas ang bagyo ng Philippine area of responsibility (PAR) sa Huwebes habang tinutumbok nito ang mga katubigan sa timog-kanlurang Taiwan.

'Egay', posibleng maging super bagyo

ni Jeff Tumbado @Weather News | July 22, 2023

Nagbabadyang maging “super bagyo” ang ganap na bagyong si 'Egay' na kasalukuyang nasa rehiyon ng Luzon.

Batay sa huling datos ng Philippine Atmospheric, Geophysical and Astronomical Services Administration (PAGASA), posibleng sa Lunes, Hulyo 24, maging super typhoon si 'Egay' kung saan nakatakda ang mismong State of the Nation Address (SONA) ni Pangulong Ferdinand Marcos, Jr.

“Pagdating sa intensity o lakas nitong bagyo, posible nga rin po itong lumakas into a Tropical Storm category within the next twelve hours at bukas posibleng nasa Severe Tropical Storm category, at pagdating ng Linggo, makikita po natin nasa Typhoon category na itong si Bagyong Egay, and by Monday posible po itong umabot sa Super Typhoon category,” paliwanag ni PAGASA weather specialist Ana Clauren-Jorda sa pulong balitaan kahapon.

“Kaya hindi po basta-basta o hindi dapat natin ipagwalang bahala itong mino-monitor nating si Bagyong Egay dahil malawak po ito at may malakas na hangin na dala,” wika pa nito.

Nabanggit din ng weather bureau na asahang magtataas sila ng wind signals sa ilang bahagi ng bansa simula ngayong araw ng Sabado, Hulyo 25.

“Inaasahan na magtataas po tayo ng Tropical Cyclone Wind Signal sa ilang bahagi ng Bicol Region at Eastern Visayas, partikular na sa Eastern portion simula po bukas ng gabi o early Sunday,” ani Jorda.

Huling namataan si 'Egay' sa Silangan-Timog Silangan ng Luzon na may taglay na lakas na hangin na 55 kilometro bawat oras at bugsong aabot sa 70 kilometro kada oras.

Wala pa umanong epekto sa bansa ang bagyo, ngunit asahan ang mga pag-ulan sa mga darating na araw na dulot din ng Southwest Monsoon o Hanging Habagat.

Sinabi ni Jorda na magsisimula ang mga pag-uulan na dala ni 'Egay' sa Linggo hanggang Lunes sa bahagi ng Luzon kabilang na ang NCR, Catanduanes at Northern Samar.

Bagyong Egay, next

ni Mai Ancheta @News | July 17, 2023

Isa na namang namumuong sama ng panahon ang namataan ng PAGASA sa silangang bahagi ng Mindanao na maaaring maging bagyo kapag pumasok sa Philippine Area of Responsibility (PAR).

Kapag lumakas at nakapasok sa PAR sa Martes, tatawagin itong Bagyong Egay.

Lalakas din ang habagat sa kalagitnaan ng susunod na linggo dahil sa masamang panahon na maaaring higupin ng low pressure area mula sa silangan patungo sa direksyon ng Luzon.

Bagama't nakalabas na ang Bagyong Dodong, sinabi ng PAGASA na makararanas ang bansa ng hindi kagandahang panahon dahil sa patuloy na pag-iral ng habagat at magdadala ito ng mga pagkulog at pagkidlat sa Metro Manila at ilang bahagi ng Luzon.

Makararanas naman ng mga manaka-nakang pag-ulan sa ilang bahagi ng Visayas dahil sa southwest moonsoon, habang ang Mindanao ay makararanas ng mga pag-ulan.

Nananatili namang lubog sa baha ang ilang lugar sa bansa pati na sa Metro Manila dahil sa iniwang buhos ng ulan ng Bagyong Dodong.