This is it, guys! SETH KAY FRANCINE: GAGAWIN KO ANG MAKAKAYA KO PARA MATUPAD ANG MGA PANGARAP NATIN

ni Vinia Vivar @Frankly Speaking | January 29, 2026

Photo: IG _imsethfedelin

Ang sweet at punumpuno ng damdamin ang birthday greeting ni Seth Fedelin para sa kanyang ka-love team na si Francine Diaz.

Sa kanyang Instagram (IG) account, nagbahagi ang aktor ng carousel of photos and videos nila ni Chin (palayaw ni Francine), at sa caption ay mababasa ang kanyang madamdaming mensahe.

“Natatandaan ko lahat ng araw na nakita kong nabalot ka ng lungkot. Nakita ko kung paano ka masaktan, mga pangamba sa kung ano ang magiging bukas,” simula ni Seth.

“May mga araw rin na ‘di tayo nagkakasundo, mga araw ko na ‘di ako ayos. ‘Di mo kahit kailan man ipinagdamot ang komunikasyon at pakikipag-usap, pagkukuwento mo ng mga nararamdaman mo at pakikinig sa sinasabi ko,” patuloy niya.

Nagpahiwatig din ang binata na palagi pa rin siyang naririto sa tabi ni Francine sa mga darating na araw.

“Sa mga susunod pang araw, hayaan mong takpan ko ang tenga mo ‘pag ang hanap mo ay katahimikan, maging kaibigan mong makikinig sa bawat sasabihin mo,” aniya.

Nakakakilig pa ang mensahe ni Seth, “Proud ako, kami sa kung ano ang meron ka ngayon at alam kong mararating mo ang gusto mong puntahan. Marami pa tayong pagsasamahan. Gagawin ko ang kaya ko para matupad natin ang mga pangarap natin na lagi nating pinag-uusapan.”

Pagbati niya, “Happy birthday, Chin (Francine)!”

Needless to say, super-kilig ang mga FranSeth fans sa napaka-sweet na birthday message ng aktor kay Francine Diaz at sey nila, halatang mula sa puso ang mga sinabi ng aktor.

---

PATULOY na sinusubaybayan ng mga manonood ang Roja na umeere sa ALLTV2, A2Z, Kapamilya Channel, at online, kung saan nakamit nito ang panibagong online viewership record kasabay ng pagbubukas ng bagong yugto na may mga bagong karakter.

Nagtala ang Roja last Tuesday (Enero 27) ng all-time high record na 620,186 peak concurrent online viewers o sabay-sabay na nanonood sa Kapamilya Online Live sa ABS-CBN Entertainment YouTube (YT), ang most-subscribed YT media and entertainment channel sa Southeast Asia.

Pasabog ang dala ng ‘Bagong Yugto’ trailer na inilabas ng ABS-CBN kamakailan, kung saan tampok ang mga buwis-buhay na pagsubok na kailangang lampasan nina Liam (Donny Pangilinan) at Olsen (Kyle Echarri). Nadagdagan pa ng alyansa ang mga hostage-takers at ngayon ay bihag ang kanilang mga biktima sa isang ospital.

Lalo pang iigting ang tensiyon sa pagpasok ng mga bagong karakter na ginagampanan nina Christian Vasquez, Iana Bernardez, Jeremiah Lisbo, Joel Molina, Mac Manicad, Miggy Campbell, at Paolo Serrano.

Kasingtindi rin ng sagupaan ang malupit na rebelasyon ni Greta (Lorna Tolentino) dahil malaki ang suspetsa niya na magkapatid sina Liam at Olsen.

Pinanghahawakan niya ang hinalang ito matapos matuklasan ang pagiging kabit ng BFF niyang si Wendy (Janice De Belen) ng asawa niyang si Magnus (Raymond Bagatsing).

Dapat abangan sa mga susunod na episodes kung paano muling malalagay sa peligro ang inaakalang ligtas at payapang buhay nina Liam, Olsen, at Luna (Maymay Entrata) dahil sa kalbaryong dala ng mga hostage-takers at sa pagsindak ng mga ito sa awtoridad sa paglusob nila sa ospital kung saan kasalukuyang nananatili ang mga biktima ng La Playa Roja.

Aabot na rin sa sukdulan ang paghihiganti ng lider ng mga hostage-takers na si Emil (Joel Torre) dahil gagawin nito ang lahat para maibalik ang nawawalang milyones na datung na nakuha nila mula sa kanilang mga hostage.

Umeere ang Roja tuwing Lunes hanggang Biyernes, 8:45 PM sa Kapamilya Channel sa ALLTV2, A2Z, at Kapamilya Online Live sa YouTube at Facebook (FB). 

Napapanood din ang pinakabagong mga episodes ng serye 72 oras na mas maaga sa Netflix at 48 oras na mas maaga sa iWant.

Tuloy ang laban para gumaling… KRIS, DINALAW NINA SEN. ROBIN AT ERICH SA OSPITAL

ni Vinia Vivar @Frankly Speaking | January 27, 2026

Photo: FB Robin Padilla

Nag-post ang TV host-actress na si Kris Aquino ng mga larawan at video habang nasa ospital siya kung saan ay nagpalagay muli ng port-a-cath, na ayon sa Google AI ay isang maliit na device na inilalagay under the skin, usually sa upper chest na konektado sa catheter na ipinapasok sa ugat malapit sa puso. Para ito sa long-term, secure access for chemotherapy, blood tests, o IV medications, para mabawasan ang pagtusok ng mga karayom o injections sa skin.

Simula ni Kris, “This carousel of photos and videos happened January 24, 6:30–10 PM; January 25 from 4 PM to 6:45 PM. I said yes to have my PortaCath re-done. Thank you to my cousin-in-law Dr. Nic Cruz who arrived at 1 AM from a conference in Singapore and vascular surgeon Dr. Jeff Chua.”

Kasunod nito ay nagpasalamat siya sa kanyang mga doktor at nurses na gumagamot at nag-aalaga sa kanya.

“Thank you Dr. Jonnel Lim, @ging.md, @drkatcee, not pictured but nagpuyat until 4 AM Friday sa pagbantay when I urgently needed to try a new medicine but had an allergic reaction, and again kept me company until Bimb arrived home. It’s our monthsary here in SLMC Global, head of Rheumatology Dr. Jombi Lichauco.

“My chronic pain is being managed by the brilliant Dr. Henry Lu and his 2nd year fellow for pain management and now my friend Dr. Angela. My personal nurses, led by Nurse Elle, Nurse Ky, and Nurse Mark, and happy birthday Nurse Kate. The nurses here on the 16th floor and all assigned in the OR and recovery room, thank you for continuing to have faith in my recovery,” pasasalamat ni Tetay.

Binanggit din niya na kaarawan ng kanyang yumaong inang si former President Corazon Aquino nitong nakaraang Sunday.

“January 25 is my mom’s birthday. My mom never publicly shared with you all the excruciating operations and procedures she endured and the difficult choices she made. She protected her privacy,” aniya.

“I’m now choosing to post pictures and videos but not give detailed medical info. ‘Pag gumaling ako, that’s when I should share what I wrote in my journals, the many witnessed holographic instructions should anything happen, and my many playlists,” patuloy niya.

Nagpasalamat din siya sa mga kaibigang dumalaw sa kanya sa ospital tulad nina Sen. Robin Padilla, Erich Gonzales, at make-up artist RB Chanco.

“Thank you Senator @robinhoodpadilla for your Wednesday visit and @erichgg and @rbchanco for Friday night’s visit,” aniya.

“My blood earlier gushed out. I saw it because I was kept awake the entire time. My mom, I know, kept me safe. Until my wound heals completely, we can’t move into our semi-permanent residence. Our home in Tarlac is the other,” pagbabahagi pa niya.

Naniniwala ang TV host-actress na sa patuloy na pagdarasal ay gagaling din siya kaya labis din ang kanyang pasasalamat sa mga taong nananalangin para sa kanya.

“Thank you for your prayers and concern. Please change from fighting to brave. I thank God for all of you. You don’t need to know how much I suffer. You need to see that I’ll continue praying and believing that I will reach remission,” saad niya.

Bilang pagtatapos, inamin ni Kris na sobra na niyang nami-miss ang pag-i-interview kaya binabalak niyang gumawa ng sariling podcast na aniya ay birthday gift niya sa kanyang mga supporters.

“With the correct safety protocols, puwede akong mag-taped as a live video podcast.

“I miss doing interviews. Will you watch and subscribe? Like this post if you want my podcast to start soon with a partial home tour. My birthday gift to you,” pahayag ni Krisy.

Na-hurt kaya nag-dance concert… ROCHELLE, SINABIHAN NG ANAK NA NEVER MAGIGING BINI

ni Vinia Vivar @Frankly Speaking | January 25, 2026

Photo: Rochelle Pangilinan

Inamin ni Rochelle Pangilinan na sobrang fan pala ng BINI ang anak nila ni Art Solinap na si Shiloh. At ito nga raw ang dahilan kung bakit talagang ipinursige niya na ituloy ang reunion concert ng SexBomb.

Sey ng leader ng SexBomb Dancers sa kanyang panayam kay Karen Davila, “Sa totoo lang, ‘yung anak namin ang isa sa mga dahilan kung bakit isa ako sa mga nag-push ng concert. Kasi sobrang fan si Shiloh ng isang girl group.”

Tinanong ni Karen kung ano’ng girl group at sey naman ni Rochelle ay BINI. Kuwento ng aktres-dancer, kinakanta raw ni Shiloh ang mga kanta ng BINI.

“Tapos sabi ko… nagyabang ako, ‘You know what, ‘Nak? Ako ang leader dati. I’m the leader before ng isang girl group, which is Sexbomb Girls,’”  ani Rochelle.

At naloka siya sa sagot ng kanyang anak.

“You will never be BINI, Mom,” sey daw ni Shiloh.

Nanlaki raw ang mata ni Rochelle at nanggigil siya sa anak.

“Nanggigil talaga ako, Madam. Nangilid-luha talaga ako. Tinawag ko si Art, ‘Be, halika dito!

Sabihin mo r’yan! Ako ang leader ng Sexbomb. Sabihin mo!’” kuwento pa ni Rochelle.

Kaya naman masasabi niyang ang BINI ang isa sa mga talagang nag-inspire para ituloy nila ang reunion concert, para ipakita sa anak niya na dati talaga silang sikat na girl group.

Sa round one ng concert, napanood sila ni Shiloh at nakita niyang proud na proud ang anak sa kanya.

“Talon s’ya nang talon buong gabi at ramdam na ramdam ko na proud na proud s’ya, at ipinost ko talaga s’ya,” ani Rochelle.

Napaiyak pa raw siya dahil sa sobrang touched. 

Tila nahiya raw si Shiloh kaya Sexbomb na lang daw ang pinakikinggan niyang music, pero sinabihan niya ito na okay lang sa kanya kung may gusto itong ibang grupo.

---

INALMAHAN ng veteran anchor-broadcaster na si Mel Tiangco ang mga lumalabas na balita sa social media hinggil sa umano’y pang-iinsulto niya sa tennis star na si Alex Eala.

Kumalat kasi sa social media ang isang quotation na pinalalabas na galing sa kanya at nilalait ang atleta.

Narito ang nakasaad sa viral post:

“Don’t claim it’s for this country — you’re nothing but a despicable, selfish person.”

Marami ang naloka sa nasabing post at ang iba’y nagalit kay Mel. Ang iba naman ay takang-taka kung bakit nakapagsalita nang ganoon ang 24 Oras anchor.

Last Friday, bago matapos ang 24 Oras ay nagbigay ng pahayag si Mel at nilinaw na fake news ito.

“Naku, eh, baka po sakaling nakita n’yo ‘yung mga pekeng post na ininsulto ko raw si Philippine tennis star Alex Eala. Naku, tahasan ko pong sasabihin, fake po ang mga posts na ‘yan,” saad ng news anchor.

“Sabi pa nga sa pekeng posts, eh, sumagot pa raw si Eala gamit ang mga maanghang na salita. Uulitin ko po, fake news po ‘yan,” dagdag pa niya.

Diin niya, “Wala po akong sinabing anumang negatibo laban kay Alex. ‘Di ko rin s’ya ininsulto kailanman.”

Aniya pa, “Bagkus, ipinagbubunyi ko s’ya at ipinagdarasal pa.”