Wala nang slot ang Korea, forfeited sa FIBA Qualifiers

ni VA - @Sports | February 24, 2022

Tila imposible nang magkamit ng slot para 2023 FIBA World Cup ang South Korea.

Ito'y pagkaraan ng ginawa nilang pagpu-pull out sa nakatakdang Asian Cup Qualifiers ngayong Pebrero 24-28 sa Araneta Coliseum matapos na magpositibo sa RT-PCR test ang isa sa kanilang players at ideklarang close contact lahat ng kanyang teammates.

Dulot ng nasabing pangyayari, nakatakdang ideklara ng FIBA ang forfeiture sa unang apat na laro ng mga Koreano sa Asian qualifiers kahit pa COVID-19 ang dahilan ng hindi nila pagsali sa torneo.

Ang dahilan nila ay ang pagkakaroon ng team ng tatlo pang bansang kabilang sa pool.

Kaya naman sa third at huling window ng qualifiers sa Hunyo 30 - Hulyo 3, papasok ang Korea na may 0-4 na rekord kung saan lahat ng apat na laro ay may 20-0 scoreline at walang kahit isang classification point.

Mayroon naman agad na 2-0 rekord ang Gilas, New Zealand at India sa pagsisimula ng second window sa Araneta. Huling pagkakataon na nabigong makapasok ng Korea sa World Cup ay noong 2010. Samantala, dumagdag sina Jayvee Sumagaysay at Madz Gampong sa lumalaking bilang ng mga Filipino volleyball players na magbabahagi ng kanilang talento sa ibang bansa.

Kinumpirma ng Malaysia Volleyball Association sa kanilang social media page na parehas lalaro sina Sumagaysay at Gampong para sa koponan ng Sarawak Hornbill sa MVL Championship na idaraos sa Marso sa Astro Arena.

Kapwa lumaro sina Sumagaysay at Gampong para sa Team Dasma Monarchs na nagkampeon sa nakaraang 2021 PNVF Champions League.

Ang dalawang UAAP standouts ang mga pinakahuling Pinoy volleyball stars na maglalaro bilang imports sa ibang bansa kasunod nina Marck Espejo at Bryan Bagunas na kinuha ng FC Tokyo at Oita Miyoshi sa Japan V. League ayon sa pagkakasunod at Joshua Umandal na kinuha naman ng koponan ng Bani Jamra sa Bahrain.

Atletang nagte-training sa Baguio, babalik Philsports

ni VA - @Sports | February 20, 2022

Planong bumaba na sa Philsports Complex sa Pasig City ng mga nalalabing atleta ng Philippine athletics team buhat sa kanilang Baguio City.

Nauna nang nag-training ang miyembro ng athletics team Baguio Athletic Bowl nila noong Oktubre ng nakaraang taon. Ngunit inihiwalay sa kanila ang mga kabilang sa jumping at sprinting events na sa Ayala Vermosa Sports Hub sa Imus, Cavite nagpatuloy ng pagsasanay.

Pinayagan na ng Philippine Sports Commission ang mga national athletes na muling makapag- training sa PhilSports Complex at Rizal Memorial Sports Complex sa Manila.

"Nag-start ang athletics team ng bubble training sa Baguio City last October 10. Kami kasama yung mga jumpers and sprinters, lumipat sa Vermosa noong Enero 5," ayon kay sprint and jumping coach Jojo Posadas.

Kasama ni Posadas sa Cavite sina coach Joebert Delicano at mga athletes na sina Mark Harry Diones, Anferee Lopeña, Ronne Malipay at Katherine Santos. "So far, okay naman kami dito sa Vermosa, mga jumpers at sprinters na under sa akin. Hindi kami puwede sa Baguio dahil sobrang lamig na, hindi puwede sa mga explosive events. Madaling maka-injury kapag malamig," wika pa ni Posadas.

Ayon kay Posadas, umaasa silang sa kabila ng limitado nilang training at kawalan ng international exposure ay makakapagpakita pa rin ng magandang performance ang kanilang mga atleta sa darating na Vietnam SEAGames.

UAAP at NCAA League, magsasabay ng opening

ni VA - @Sports | February 15, 2022

Kapag nagkataon, posibleng sabay na magbubukas ang dalawa sa pangunahing collegiate leagues ng bansa na University Athletic Association of the Philippines (UAAP) at National Collegiate Athletic Association (NCAA).

Ayon sa balita galing sa kampo ng UAAP, ang Season 84 na nakatakdang pangunahan ng host De La Salle, target nilang magbukas sa darating na Marso 26. Sa kabilang dako, iniulat ng College of Saint Benilde official publication na The Benildean na balak din ng NCAA na magsimula ng kanilang Season 97 sa nasabi ring petsa.

Kapag natuloy, muli namang magkakasabay at puwedeng magkatapat ang pagpapalabas ng mga laro nila sa telebisyon gaya noong 2012-2015 kung saan napapanood ang NCAA sa TV5 at umeere naman sa Studio 23 ang UAAP. Nagkataon namang ang UAAP ngayon ang ipapalabas sa TV5 habang mapapanood ang NCAA sa Channel 7.

Dahil sa kasalukuyang sitwasyon, kapwa din nagpaplano ang dalawang liga na magdaos ng dalawa lang na live events ngayong taon-ang seniors basketball at women's volleyball.

Plano ng UAAP na magdaos ng apat na laro kada playdate habang triple o kaya'y double header naman kada gameday ang NCAA. Target ng UAAP para maging venue ang Mall of Asia Arena (MOA) habang balak ng NCAA na maglaro sa Rizal Memorial Coliseum.

Gayunman, mangyayari lamang ang lahat kung papahintulutan ang dalawang liga ng mga local government units na nakakasakop sa venue na pagdarausan nila ng mga laro kasama ang go signal ng Commission on Higher Education at Inter-Agency Task Force.