Sigalot ng PATAFA-Obiena, umakyat na sa Senado

ni VA - @Sports | March 18, 2022

Sa halip na maresolba, tila mas lumalaki pa ang gusot sa pagitan ng pamunuan ng Philippine Athletics Track and Field Association’s (PATAFA) at ni Filipino Olympian pole vaulter EJ Obiena.

Ito'y makaraang maghain ng contempt ang apat na Senador sa pangunguna ni Senadora Pia Cayetano kontra sa PATAFA board dahil umano sa paglabag ng mga ito sa utos ng Senate Committee on Sports na ayusin ang gulo nila ng Asian record holder na si Obiena sa pamamagitan ng mediation na ikinasa ng Philippine Sports Commission (PSC). "In compliance with the requirements of Section 18 of the Senate Rules, several colleagues have co-signed my motion. They include Senate President Vicente Sotto III, Senator Francis Tolentino, and Senator Panfilo Lacson," saad ni Cayetano sa inilabas nitong statement.

Hindi nakalahok si Obiena sa World Indoor Championships sa Serbia kahit pa nag-qualify sya sa torneo dahil sa away nila ng PATAFA. Hindi siya inindorso ng PATAFA sa World Indoors sa Belgrade maging sa mga susunod pa nilang nakahanay na sasalihang international tournaments ngayong taon na kinabibilangan ng Vietnam SEA Games sa Mayo, World Championships sa Oregon sa Hulyo, at Asian Games sa Hangzhou ,sa Setyembre.

Ayon kay Cayetano, sa isinagawa nilang Senate hearing noong na nakaraang buwan, nagpakita si Obiena ng mga dokumento na nabayaran na ang suweldo ng kanyang coach na si Vitaly Petrov na kinumpirma naman ng huli. "Obiena did admit to delays in sending the payments, which he attributed to the difficulties he encountered in handling the funds, such as the conversion of Philippine pesos to Euros, as well as the late transfer of his training funds," ayon sa Senadora. Ngunit hindi umano ito tinanggap ng PATAFA na nagpahayag pa umano ng pagdududa sa authenticity ng liquidation reports ni Obiena.

Dy ng Logistics, namayani sa PVL Opener vs. Army

ni Gerard Arce / VA - @Sports | March 17, 2022

Tagumpay ang F2 Logistics sa kauna-unahan nitong laro sa professional ranks makaraang padapain ang Black Mamba-Army, 25-15, 25-18, 21-25, 25-22 kahapon sa pagbubukas ng 2022 Premier Volleyball League (PVL) Open Conference sa Paco Arena sa Manila.

Umiskor si Kim Kianna Dy ng 20 puntos na kinabibilangan ng 15 attacks, 4 na blocks at isang ace gayundin ng game winning hit upang pamunuan ang nasabing panalo ng Cargo Movers. Unang set pa lamang ay nagdomina na ang F2 Logistics sa pangunguna nina Dy at Ara Galang. Nagtuluy-tuloy ito hanggang second set at nagbanta pang ganap na walisin ang laro. Subalit pumalag ang Army sa pamumuno ni Honey Royce Tubino at naipuwersa ang fourth set makaraang angkinin ang third, 25-21. Hihirit pa sana ng decider ang Black Mamba pero pinigil na sila ng Cargo Movers at tinapos na ang laro sa fourth frame.

Dalawa pang manlalaro ni coach Ramil de Jesus ang kumamada ng double digit sa katauhan nina Galang at Majoy Baron na nagposte ng 11 at 10 puntos ayon sa pagkakasunod habang solo namang nag double figure sa Army si Tubino na may 18 hits.

Hindi naglaro para sa Black Mamba ang kanilang mga beteranong sina Jovelyn Gonzaga at Nene Ybañez na parehas miyembro ng national beach volleyball pool na nagsasanay sa Australia. Mga laro ngayon Paco Arena Sports and Events Center 3:00 pm Petro Gazz vs. Balipure; 6:00 pm Creamline vs. PLDT

FIVB Volleyball Nations League, lalarga sa Hunyo

ni VA - @Sports | March 16, 2022

Ihahatid ng Philippine National Volleyball Federation (PNVF) ang isang world-class volleyball action sa Hunyo - ang 2022 FIVB Volleyball Nations League’s (VNL) men at women pool matches sa Smart Araneta Coliseum.

Simula sa Abril ay maari nang makabili ng tiket para sa week 2 ng top-level women's preliminary round para sa lalaruin sa Hunyo 14 -19. Matapos ang isang araw, ang Week 2 ng men's pool matches ay sisimulan naman sa Hunyo 21 - 26.

Inaasahang mapupuno ng ng fans ang Big Dome kasabay ng pagluwag sa health and safety protocols sa Metro Manila. Pinasalamatan ng PNVF ang FIVB sa pagbibigay ng pagkakataon sa Pilipinas na mai-host ang VNL sa unang pagkakataon mula noong 2018.

“We anticipate the return of world-class volleyball action in the country and we’re confident that with pandemic waning, the fans will enjoy the matches,” ayon kay PNVF President Ramon “Tats” Suzara sa isang virtual presscon kahapon. May halagang P2,000 ang tiket sa courtside seats, P1,500 sa Patron A, P1,000 sa Patron B, P500 sa Lower Box, P200 sa Upper Box at P100 sar General Admission.

Ang 3-time VNL champion at Tokyo Olympics gold medalist na United States ang una sa women's pool kasama ang reigning Asian champion Japan, Southeast Asian queen Thailand, China, Poland, Belarus at Canada. Ang Tokyo Olympics gold medalist France ang una sa men's side at susubukin sila ng fan favorite Japan, Slovenia, Argentina, Italy, Germany at The Netherlands.