Cayuna at Doria, malulupet sa HD Spikers vs. Flying Titans

ni Gerard Arce / VA - @Sports | March 23, 2022

Nakamit ng Cignal ang solong pangingibabaw sa Pool A matapos padapain ang Choco Mucho, 20-25, 25-17, 25-20, 25-16, para sa ikatlong sunod nilang panalo sa pagpapatuloy ng 2022 PVL Open Conference sa Paco Arena.

Nauna rito, malakas ang naging panimula ng Choco Mucho na agad pumailanglang sa 8-2 bentahe para makauna sa laro kontra Cignal, 25-20. Agad namang bumawi ang HD Spikers at kumamada ng 16-4 run para itabla sa 1-1 ang laban matapos ang inilatag na 16-4 run na nagresulta sa 25-17 panalo kontra Flying Titans sa second frame.

Sa third set, nagtala ang Choco Mucho ng 13-4 run para makadikit sa Cignal ,19-20 buhat sa 6-16 na pagkakaiwan para makamit ang 2-1 na kalamangan sa laban sa pamamagitan ng 25-20 tagumpay. Pagdating ng fourth set, namintina ng Cignal sa pamumuno ni setter Gel Cayuna ang magandang laro hanggang sa ganap na makamit ang panalo na sinelyuhan ni Roslyn Doria. Si Doria din ang tumapos na leading scorer para sa Cignal sa ipinoste nitong 17 puntos na binubuo ng 9 na attacks at 8 blocks.

“Pinagsabihan kami ni coach [Shaq] na hindi kami yung lumaban nung first set kaya lumabas ang laro naming nung set 2. Sabi rin ni coach na one game at a time lang at kailangan ma-sustain yung magandang depensa at plays namin sa laro,” wika ng 25-anyos na si Doria na tubong Mangaldan, Pangasinan na parte ng ASEAN Grand Prix bronze medal team nung 2019.

Sinundan siya ni Ces Molina na may 14 puntos at nina Rachel Ann Daquis at Angeli Araneta na may tig-10 puntos. Dahil sa panalo, tiyak ng may twice-to-beat incentive ang Cignal papasok ng knockout quarterfinals habang bumaba ang Flying Titans sa 2-1 na rekord kapantay ng F2 Logistics. Tumapos na topscorer para sa nabigong Choco Mucho si Kat Tolentino na may game high na 19 puntos. Mga laro ngayon Paco Arena 3 pm Balipure vs. PLDT 6 pm Petro Gazz vs. Creamline.

Tiamzon at Phillips ng Angels, pormado sa PVL

ni Gerard Arce / VA - @Sports | March 22, 2022

Matapos matalisod sa second set,winalis ng Petro Gazz Angels ang huling dalawang sets,25-22,19-25, 25-22, 25-18 upang maigupo ang PLDT Power Hitters at umangat sa liderato ng Group B na may 2-0 marka kahapon sa 2022 PVL Open Conference sa Paco Arena.

Nagposte ng 13 puntos si dating UP Lady spiker Nicole Tiamzon na kinabibilangan ng 12 hits upang pamunuan ang nasabing panalo ng Angels na nagsadlak sa PLDT sa ikalawang sunod nitong kabiguan upang manatiling undefeated sa Pool B sa 2-0 kabuntot ang Creamline Cool Smashers sa 1-0 na kasalukuyang kalaban ang Balipure Water Defenders sa ikalawang laro.

"Noong first set ok naman yung performance namin, pero 'yung mga service errors, 'yung mga dapat di pumupuntos sa'min yun 'yung tumaas nu'ng second set,tapos nawalan kami ng first ball," ani Tiamzon kung bakit nasingitan sila sa second frame. "Going to third and fourth set, nag adjust kami,ibinalik namin yung first ball para maka-atake at ma-distribute 'yung bola ng maayos," dagdag nito.

Sumalo naman ng 15 excellent digs at 3 excellent receptions si Bangs Pineda, habang may 9 pts si Aiza Pontillas at 10 excellent digs, samantalang may 20 excellent sets si Rhea Saet. Dalawa pang manlalaro ng Angels ang tumapos na may double figure sa katauhan nina MJ Philips at Jonah Sabete na may 11 at 10 puntos ayon sa pagkakasunod.

Nauwi naman sa wala ang game high 17 puntos ni Christine Joy Soyud na kinabibilangan ng 12 hits, 3 blocks at 2 aces dahil bigo siyang maisalba ang High Speed Hitters. Nag-ambag naman ng 10 pts si Dell Palomata, at 8 pts kay Mika Reyes. May 23 excellent sets si Rhea Dimaculangan, habang may 35 excellent digs si Kath Arado at 13 kay Chin Basas ngunit kinapos. Mga laro ngayon Paco Arena- 3 pm Choco Mucho vs. Cignal; 6 pm Army vs. Chery Tiggo.

Molina ng HD Spikers, ginulat sa 4 set win ang Logistics

ni Gerard Arce / VA - @Sports | March 21, 2022

Pinataob ng Cignal ang dating namumunong F2 Logistics ,25-14, 25-21, 19-25, 25-19 para sa ikalawang sunod nilang panalo sa 2022 PVL Open Conference kahapon sa Paco Arena sa Manila.

Mainit ang naging simula ng HD Spikers na kumamada ng 7-1 sa first set na naging daan sa kanilang panalo na sinundan pa ng 10-1 panimula sa second upang maiposte ang 2-0 bentahe sa laro. Ngunit di naman agad sumuko ang Cargo Movers at nakapuwersa pa ng fourth set makaraang itala ang 13-3 pagtapos sa third set.

Nagtala ng tig-13 puntos sina Ces Molina at Rachel Ann Daquis habang nagdagdag ng 12 puntos si Ria Meneses upang pangunahan ang nasabing panalo ng HD Spikers. Sa kabilang dako, nanguna naman para sa Cargo Movers na bumagsak sa markang 2-1, panalo-talo si Tin Tiamzon na nagtapos na may 15 puntos kasunod si Kim Dy na may 11 puntos at Abby Maraño na may 10 puntos.

“Talagang tinapangan lang namin at kung anong ginagawa ng first six ginagawa rin ng second six. Masasabi naming tapang lang talaga, lalo na nung mas nasaktan sa amin, kaya sa lahat ng aspeto na ginagawa namin kailangan ng double effort lalo na kung yung game namin ay dikitan. Dapat i-master at pagtibayin pa para tuloy tuloy ang panalo,” wika ni Cignal HD setter Gel Cayuna, matapos ang laro na may 18 excellent sets at 7pts kabilang ang 3 service aces.

Dahil sa panalo, nangingibabaw ngayon ang Cignal sa Pool A taglay ang markang 2-0 habang nalasap naman ng Cargo Movers ang unang pagkatalo sa 2-1 kartada, kung saan pinagbidahan sila ni Tim Tiamzon sa 15 pts, na may 17 excellent digs, at 5 excellent reception. Nagbigay din ng 11pts si Kim Kianna Dy at 10pts kay Abby Marano, samantalang may 26 excellent digs at 9 excellent reception si Dawn Macandili.