Williams, bumida sa TNT, lumamig ang apoy ng LPG

ni MC / VA - @Sports | June 27, 2022

Pumalaot ang defending titleholder TNT Tropang Giga sa ikatlong panalo matapos ang 87-72 na iskor laban sa Phoenix Super LPG sa 2022 PBA Philippine Cup kagabi sa Ynares Centre sa Antipolo City.

Nagbalik ang matinding porma ni Mikey Williams, ang Finals MVP noong huling edisyon ng PBA makaraang ipamalas ang all-around performance sa itinarak na 27 points, 7 assist, 6 rebounds at 2 steals at pag-ibayuhin ang Tropang Giga sa 5-2 panalo-talo.

Hawak pa ang naiiwang 4 puntos matapos ang kalahati ng peryodo, 61-58, sinimulan na ng TNT na umalagwa sa 4th quarter nang umiskor si RR Pogoy ng lay-up at bigyan ang tropa ng pangunguna sa laro, 87-68 sa natitirang 1:33.

Lumamang pa rin ang TNT sa Fuel Masters sa 14 points sa papakulapsong oras at tumapos si Williams ng 11 sa kanyang overall output.

Ang panalo para sa TNT ang maituturing na pinakamainit na team sa liga matapos unang maagang dispatsahin ang Rain or Shine at sister team Meralco Bolts. Samantala, lagpak naman ang Phoenix sa 2-4 kartada dahil sa dalawang sunod na pagkatalo.

Ang beteranong si Sean Anthony ang namuno sa Fuel Masters sa bisa ng double-double 13 points at 14 rebounds kasama ang 2 assists at steal. Nakapag-ambag si Rookie Tyler Tio ng 13 marka.

3rd gold, nasungkit ni Prado sa Road Nationals

ni MC / VA - @Sports | June 25, 2022

Astig sa kalkulasyon ng ruta at matulin itong si Jermyn Prado sa pagpedal tungo sa ikatlong gintong medalya sa PhilCycling National Championships for Road noong Huwebes sa Tagaytay City.

Pumapadyak nang matiyaga at mabilis sa road race (massed start) ng Women Elite ay ipinakita ang pagkabeterano sa 2019 Southeast Asian Games ni Prado, 27-anyos,na subok na sa mga patag hanggang pag-atake sa mga rutang paakyat sa Praying Hands Monument kabuntot si up-and-coming Mathilda Krogg.

Tinapos ni Prado ang 114-km race makaraan ang criterium noong Martes at individual time trial noong Miyerkules. “Like I said, I don’t stop training,” ani Prado, na naorasan ng 3 hours, 21 minutes at 23 seconds, parehong oras ng 19-year-old na si Krogg na nagkamit ng silver medal sa 114-km race na nagtapos sa matarik na akyatan.

Si Krogg, ang nagkampeon sa Women’s Under-23, ang ikalawa niyang gold matapos ang criterium. Silver medal ang nakuha ni Avegail Rombaon sa event na inorganisa ni PhilCycling and Philippine Olympic Committee president Rep. Abraham “Bambol” Tolentino. Nagkasya sa bronze si Ma. Mhay-ann Lina.

Nakuha ng teammate ni Krogg na si Kate Yasmin Velasco ang Under-23 silver medal sa oras na 3:24:40 at 7-Eleven Roadbike Philippines’ Phoebe Salazar ay bronze sa 3:25:13 sa event na bahagyang inulan.

Nagtapos na 1-2-3 sina Angelica Mae Altamirano (1:25:15), Lyca Angel Jacobe (1:25:43) at Althea Campana (1:25:44) sa Women’s Junior, habang sina Steven Aaron Cerezo (1:02:04), Kyle Christian Mendajao 1:02:06) at Lester de la Cruz (1:02:06) ang nalagay sa Men’s Youth podium. Parehong kumarera sa 55 kms.

Gold si King Vincent Mercado (1:32:29), silver si Khalil Sanchez (1:32:29) at si KienEbojo (1:32:30) ay bronze sa 74-km Men’s Junior race, habang si Kim Syrel Bonilla (1:26:33), Vianne Angel Pagnanawon (1:26:34) at Rosalie de la Cruz (1:26:35) ay top finishers sa 40-km Women’s Youth event.

Galedo at Prado, una sa Time Trial Races

ni MC / VA - @Sports | June 24, 2022

Walang kupas si Mark John Galedo at muling nagpamalas ng kaastigan sa padyakan si Jermyn Prado sa individual time trial (UTT) races sa Day 2 ng PhilCycling National Championships for Road 2022 noong Miyerkules sa Tagaytay City.

Naorasan ang pinakabeterano sa lahat na si Galedo ng 52 minuto at 43.10 secs upang masungkit ang gold sa men’s ITT raced sa rutang 30 kilometro mula Nasugbu hanggang Praying Hands Monument sa siyudad na ito at ipinakita ng 37-anyos na matibay pa rin ang kanyang mga binti sa pedalan bilang dating Southeast Asian Games winner at ilang ulit nang domestic tour champion.

“I prepared hard because these are the national championships,” pahayag ni Galedo ng 7-Eleven Roadbike Philippines. “I still feel them in my legs and I’ll go on riding.”

Pinalamon niya ng alikabok ang mga katunggali sa Philippine cycling championships. Tumapos na 2-3 sina Philippine Navy-Standard Insurance's Ronald Oranza at Jhon Mark Camingao kasunod si Galedo sa 31 seconds. Nanguna si Nichol Pareja (7-Eleven Roadbike PHL) sa Men’s Under-23 sa 30 kms sa oras na 55:49.20, kasunod ni Macryan Lago (Go For Gold) 14 na segundo sa likod kabuntot si Arvin DuanneDigap sa 6 na minuto.

Matapos magreyna si dating SEAG queen Prado sa criterium dinomina niya ang 20-km women’s ITT sa 39 minuto at 14.20 secs.

Kabuntot sina PHL Navy-Standard Insurance riders Marianne Grace Dacumos (2:30 behind) at AvegailRombaon (2:39) sa championships na itinuturing sa Philippine cycling history na pinakamaraming nagpatalang 600 siklista sa apat na kategorya ng male at female. Gold medalist si Phoebe Salazar (7-Eleven) sa oras na 41:56.10 sa Women’s U-23, kasunod ni PHL Navy-Standard Insurance’s Kate Yasmin Velasco (42.34 behind) at Mary Joy Zamora 1:53.80).

Ang iba pang men's podium finishers sa event na inorganisa ni PhilCycling Rep. Abraham “Bambol” Tolentino at Philippine Olympic Committee president, ay sina Lance Andrew Lumanlan (34.26), Zack Reyes (1:09 behind) at RR King Roque ng Go For Gold (1:28) sa Juniors at Samstill Mamites (15:24.40), Justhene Navaluna (15.73) at Mark Kairos Amban (26.20) sa Youth.

Nakaiskedyul pa kahapon at ngayon ang road races.