Obiena, humagupit uli ng gold sa Switzerland

ni Gerard Arce / VA - @Sports | September 14, 2022

Isang araw matapos manaig ng kampeonato, tila hindi mapigilan sa pagsungkit ng gintong medalya si 2020 Tokyo Olympian pole vaulter at 5-time medalist ngayong taon na si Ernest John Obiena nang pagharian naman ang Gala dei Castelli sa Bellinzona, Switzerland kahapon.

Klinaro ng 26-anyos na two-time SEA Games champion ang 5.81-meters para talunin si Tokyo Olympics silver medalist at World No.2 Christopher Nilsen ng U.S. na nakakuha lamang ng 5.71-metro. Sinundan ni dating 2012 London Olympics champion Renaud Lavillenie ng France sa parehong sukat na 5.71-m, gayundin si Jacob Wooten ng US sa 5.71m sa 4th place.

Lumapag sa 5th place si Simen Guttormsen ng Norway sa 5.61m kapareho ni Thibaut Collet ng France para sa 6th place. Nasa ika-pito naman si Anthony Ammirati ng France sa 5.51m, at Swiss pole vaulters Dominik Alberto sa 5.41, Justin Fournier sa 5.21 at Valentin Imsand sa 5.21.

Nito lang Lunes ay nakuha ni Obiena ang 2022 Golden Fly Series Liechtenstein para sa kanyang ika-5 gintong medalya sa 7 mahalagang events na nilahukan.

Nagwagi rin ng gold medal ang Tondo, Manila-native sa True Athletes Classics, St. Wendel City Jump sa Germany, Internationales Stabochchsprung-Meeting sa Germany at Brussels Diamond League, kung saan tinalo niya si World No.1 at record holder at Tokyo Olympics gold medalist Armand Duplantis ng Sweden sa pagtalon sa 5.91meters.

Kuwalipikado na rin ito sa Diamond League Grand Finals sa Zurich, Switzerland. Isang taon na ang nakalipas nang wasakin at lumikha ng panibagong Asian record si Obiena sa International Golden Roof sa Innsbruck, Austria sa 5.93-meters, na kinalauna’y muling sinira sa 5.94-meters sa World Athletic Championships sa Oregon, para mapanalunan ang bronze medal upang maging kauna-unahang Filipino na nagwagi ng medalya sa naturang torneo.

Matapang na laro ng TNT pinapurihan ni coach Chot

ni VA / MC - @Sports | September 7, 2022

Saludo at pinupuri ni TNT head coach Chot Reyes ang kanyang team sa kabila ng kabiguan sa kamay ng San Miguel Beermen sa Game 7 ng 2022 PBA Philippine Cup Finals noong Linggo.

Wala si Reyes sa laro noong Linggo sa Big Dome dahil nagpositibo siya sa COVID-19.

Sa ulat ng ABS-CBN news, ilang source ang nagsabi na masama ang pakiramdam ni coach Chot noong Sabado pa.

Sa kabila ng wala si Reyes sa laro, nakalamang pa ang Tropang Giga sa SMB, 89-84 makaraan ang tatlong quarters. Pero hindi na sila nakaporma noong 4th quarter, bagamat bumagal ang SMB ay nanamlay na rin ang TNT.

"Congrats to Coach Leo Austria and the San Miguel Beermen for the championship," saad ni Reyes sa kanyang Instagram post matapos ang laro, 119-97 na panalo para sa SMB. "But I am so immensely proud of our guys, led by Jayson Castro and Kelly Williams, for their courage in battling overwhelming odds," dagdag niya. "Sorry I couldn't be on the floor with you for that last one. On to the next!"

Kakaibang tapang ni Castro ang kanyang ipinakita kahit masakit ang kanyang bukung-bukong ay nakapagtarak pa ito ng 32 points, 10 rebounds at eight assists.

Si Kelly Williams naman ang nangalabaw sa depensa kontra June Mar Fajardo na may 6 points at 7 rebounds.

Pero hindi na nakahabol ang TNT nang rumagasa na ang San Miguel sa 4th, na-eject pa si Poy Erram sa second quarter dahil sa flagrant foul kay Mo Tautuaa ng SMB.

Ika-10 PBA championship sana ito ni Reyes kung nagkampeon ang TNT.

World's no. 1 Duplantis dinaig ni Obiena sa Brussels

ni Gerard Arce / VA - @Sports | September 4, 2022

Isang malaking panalo ang naisakatuparan ni 2020+1 Tokyo Olympian at 2022 World Championships bronze medalists pole vaulter Ernest John “EJ” Obiena nang silatin si Olympic at World champion Armand Duplantis ng Sweden sa Brussels Diamond League sa Belgium kahapon.

Pumailanlang sa kataasan ng talon ang two-time SEA Games gold medalist nang irehistro at iklaro ang 5.91 meters sa ikatlong pagsubok upang agawin ang korona sa World No.1 at record holder na pumalyang makuha sa tatlong pagtatangka ang naturang talon.

Nakakabiglang nagtapos lang ang 22-anyos na American-Swedish sa 5.81 meters na malayo sa karaniwang tinatalon sa mga kompetisyon, kung saan may personal best siya sa indoor na 6.20m at outdoor sa 6.21m.

“Made a core memory today. First @diamondleagueathletics win. Gold here in @allianzmemorialvandamme with 5.91m,” wika ni Obiena sa kanyang Facebook post.

Hawak ng 26-anyos na 2019 Asian Championships titlist ang Asian record na 5.94 meters na masuwerteng hindi sumayad sa bar ng inaasintang sukat, samantalang nakakabiglang hindi naabot ni Duplantis ang parehong sukat na lubhang ikinadismaya nito.

“I did a lot of things poorly technically. It's rare for me to jump the way I did. Maybe I needed a bit of a wake-up call. I gotta come back next year and do something more special for the people that came out,” saad ni Duplantis.

Bukod kay Duplantis, dinaig din ng 2019 Universiade champion si Tokyo at World silver medalist Christopher Nilsen ng U.S. na nakakuha ng 5.71-meters. Sinundan siya ni Rutger Koppelaar ng The Netherlands at 2016 Olympic champion Thiago Braz ng Brazil sa 5.71meters. lumapag sa pang-anim si 2012 London Olympics gold medalist Renauld Lavillenie ng France at Oleg Zernikel ng Germany sa 5.61m. Nasa 8th place si Sondre Guttormsen sa 5.41m, habang 'di natapos nina Pai Haugen Lillefosse ng Norway at Ben Broeders ng Germany ang kanilang mga talon.