UP Lady Maroons, sakalam, sokpa sa Final 4 kontra UE Red Warriors

ni VA - @Sports | November 7, 2022

Pinalakas ng University of the Philippines ang kanilang tsansa na makausad sa Final 4 round ng UAAP Season 85 women's basketball tournament matapos ang 35-puntos na paggapi sa University of the East, 67-32, kahapon sa UST Quadricentennial Pavilion.

Dahil sa panalo, gumitna ang Fighting Maroons sa standings sa pag-angat nila sa markang 4-6.

Mula sa kanilang 21-9 na panimulang bentahe, tuluyang lumayo ang UP sa third canto nang palobohin nila ang kanilang lamang sa 50-24, pagkaraang limitahan sa limang puntos lamang ang UE.

Sa kabila ng naitalang malaking panalo, naniniwala si UP head coach Paul Ramos na kasing halaga rin ito ng iba pa nilang naunang panalo.

"For me, at this point in our tournament, a win is still a win for us -- whether it's two points or as you have noticed in our previous game, one point lang, natalo kami so, regardless of how many points yung spread, the win is the most important aspect sa'min right now. We're really trying to make the most of the remaining games," ani Ramos.

Pinangunahan ni dating UAAP Rookie of the Year Justine Domingo ang naturang tagumpay ng UP sa itinala nitong 15 puntos, 5 rebounds, 2 assists, steals, at isang block.

Nanguna sa winless (0-10) pa ring Lady Warriors sina Kamba Kone at Claire Sajol na may tig-walong puntos.

Vera, balik aksiyon sa ONE 164; Casimero, mamamakyaw ng Hapon

ni G /VA - @Sports | November 6, 2022

Muling sasabak sa aksyon si dating ONE Heavyweight World Champion Brandon “The Truth” Vera matapos ang 19 na buwang pamamahinga at babalik sa ONE Championship sa Manila.

Nakatakdang sumalang ang 45-anyos na Fil-Am sa ONE 164 sa Dis. 3 sa MOA Arena katapat ang bigating Iranian na si Aliakbari Amir kasunod ng anunsyo ni ONE CEO Chatri Sityodtong.

Matatandaang nabitiwan ni Vera ang ONE heavyweight title noong Mayo 15, 2021 laban kay Arjan Singh Bhullar, kasunod ng pagkabigo kay Aung La N Sang para sana sa dalawang titulo na Light-Heavyweight title para bumagsak sa 16-9 kartada.

Samantala, nakatuon ang pansin ni dating three-division champion John Riel Casimero kay Japanese pound-for-pound star Naoya Inoue sakaling talunin niya si Ryo Akaho sa Dis. 3 sa Paradise City sa Incheon, South Korea.

Dapat sana’y nakalaban ni Casimero, 31-4 na may 21 knockouts bilang propesyonal na boksingero, ang kasalukuyang pound-for-pound no. 2 na si Inoue noong 2020 ngunit ibinasura ang laban dahil sa pandemya ng COVID-19. “Kung manalo ako laban kay Akaho gusto ko si Naoya Inoue ang susunod basta hindi siya tatakbo. Nirerespeto ko si Akaho dahil lalabanan niya ako, hindi siya natatakot,” ani Casimero.

Huling lumaban ang 32-anyos na si Casimero noong Agosto 2021 laban sa dating kampeon na si Guillermo Rigondeaux at nanalo siya via split decision. Sa unang bahagi ng taong ito, ang tubong Ormoc ay tinanggalan ng kanyang WBO world bantamweight title matapos itong mabigo ng dalawang beses na ipagtanggol ito laban kay Paul Butler.

Samantala, huling lumaban si Inoue sa isang unification noong Hunyo nang talunin niya si Nonito Donaire Jr. sa pamamagitan ng knockout.

Ochoa, nakamit ang 2nd gold sa JJIF World C'Ship

ni Gerard Arce / VA - @Sports | November 5, 2022

Matagumpay na ipinilipit ni Pinay Jiujitera Margarita “Meggie” Ochoa ang kanyang ikalawang World Championship matapos higitan ang mga pinakamahuhusay na katunggali sa buong mundo sa 2022 Jiu-Jitsu International Federation (JJIF) World Championship sa Jiu-Jitsu Arena sa Zayed Sports City sa Abu Dhabi, United Arab Emirates.

Matapos ang apat na taong paghihintay, muling itinanghal na world champion ang 32-anyos na 2-time SEA Games champion nang dominahin ang apat na dekalibreng jiujitsu athletes kabilang ang paggiba muli kay Canadian Vicky Hoang Ni Ni sa iskor na 2-0 sa women’s under-48kgs category.

Unang naibulsa ng 2017 Asian Indoor Martial Arts Games gold medalist ang titulo noong 2018 nang talunin nito si Hoang sa mas mababang kategorya sa women’s under-45kgs division, kung saan matagumpay na napagwagian nitong Huwebes sa parehong kompetisyon ni Kimberly Anne Custodio.

Bago ito makatuntong ng championship round, nauna muna nitong pinatapik si Oana Lapu ng Romania sa bisa ng 14-0 sa round-of-16, habang sinunod talunin si Oleksandra Rusetska ng Ukraine sa bisa ng 9-0 sa quarterfinals, habang inilampaso si Abdulkareem Balqees ng host country United Arab Emirates sa 22-0.

Nito lang Hulyo ay naitaas ang ranggo nito sa black belt ni 10-time World champion at dating MMA fighter Andre’ “Deco” Galvao’ sa ATOS Jiujitsu headquarters sa San Diego, California sa U.S. kasunod ng pagsungkit ng gold medal sa National IBJJF Jiu-Jitsu Championships sa Las Vegas Convention Center, habang nitong Hunyo ay nakakuha ng silver medal finish ito sa IBJJF World Jiu-Jitsu Championships sa Long Beach, California at ang 2022 Pan American IBJJF Championship sa Silver Spur Arena sa Florida noong Abril bago ganapin ang 2021 SEAG sa Hanoi, Vietnam.