Kai Sotto, malabo nang maglaro sa Gilas ng FIBA Cup

ni VA @Sports | February 13, 2023

Hindi maglalaro si Kai Sotto para sa Gilas Pilipinas sa 6th window ng FIBA World Cup Asian qualifiers.

Ito ang ipinaabot ng kampo ng 7-foot-3, center na kasalukuyang nasa bansa sa saglit na pahinga mula sa pagtatapos ng kanyang stint sa Adelaide 36ers ng NBL - Australia.

At ayon sa kampo ni Sotto, aalis din ito patungong Japan bago pa man ang window 6 kung saan nakatakdang makalaban ng Gilas ang Lebanon at ang Jordan. Base sa schedule, makakasagupa ng Gilas ang Lebanon sa Pebrero 24 at ang Jordan sa Pebrero 27 sa mga larong idaraos sa Philippine Arena sa Bocaue, Bulacan. Inaasahan sana ng Gilas ang paglalaro ni Sotto upang makadagdag sa kinakailangang taas ng koponan na nabawasan pa sa pagka injured ni Japeth Aguilar na nagtamo ng MCL injury.

Ayon kay Gilas coach Chot Reyes, may magandang offer silang nakahandang ibigay Kay Sotto kung sakaling pumayag itong maglaro sa 6th window. Gayunman, tinanggihan umano ito ng kampo ni Sotto na nagsabing mas pinaprayoridad nila ang kalusugan ng manlalaro. "Health is more important than money," ayon sa kampo ni Sotto. Base na rin sa direktiba ng Wasserman sports agency na siyang namamahala sa planong pagpasok sa NBA ni Sotto,sa Japan B League na lalaro si Sotto bago ito magtungo muli ng US upang lumahok sa mga mini-camps doon at sa Summer League. Ayon pa sa mga handlers ni Sotto, iniingatan lamang nila at inilalayo ang kanilang alaga sa mga di inaasahang injury. "It's not about the money," wika ng source na di na nagpakilala.

Umaasa aniya sila na mauunawaan ng pamunuan ng Gilas at ng Samahang Basketbol ng Pilipinas ang kanilang desisyon na huwag nang palaruin si Sotto sa huling yugto ng qualifier lalo pa't tiyak na naman anilang pasok ang Pilipinas sa 2023 FIBA World Cup bilang isa sa mga host.

Obiena, pumorma pa sa silver, Baltazar, may sanction sa KBL

ni VA/GA @Sports | February 12, 2023

Nagpatuloy ang pagiging perpekto ng indoor season ni Filipino pole vaulter EJ Obiena matapos nitong magwagi ng silver medal sa ISTAF Indoor Berlin - na isang World Athletics Silver event - sa Germany.

Pumangalawa siya kay World at Olympic champion Armand Duplantis ng Sweden, na siyang nagwagi ng gold sa itinala nitong bagong meet record na 6.06 meters. Ito ang ikalawang silver medal finish na naitala ni Obiena sa loob ng pitong indoor meets kasunod ng kanyang naging second place finish sa Springer International sa Cottbus, Germany.

Nagtala rin siya ng apat na gold medal win sa National Indoor sa Padova, Italy, Perche En Or sa France, Orlen Cup Lodz at Orlen Coppernicus Cup sa Poland at isang bronze medal sa Mondo Classic kung saan naiposte niya ang kanyang indoor personal best at napantayan ang national record na 5.91 meters.

Samantala, pinatawan ng dalawang taong suspensiyon sa paglahok sa Korean Basketball league (KBL) si dating La Salle forward Justine Baltazar matapos hindi magpakita sa koponan ng Seoul Samsung Thunders.

“As a result of reviewing the contract violation case of Justine Baltazar from Seoul Samsung... We have decided to sanction the season suspension (until the 2024-2025 season),” pahayag ng liga.

Nabigong makarating ng dating Hiroshima Dragonflies sa Japan B. League sa South Korea matapos maglaro sa Strong Group sa Dubai, na parte ng kanilang usapan sa kanyang kontrata noong Enero.

“Baltazar was scheduled to return to Korea on (February) 1st after finishing the Dubai Invitational Tournament, but contact was suddenly cut off,” saad ng KBL. “As a result, Samsung could not register as a player in KBL. In the end, (the team) had no choice but to break the contract with Baltazar.”

Diaz, tutok sa Olympics, SEAG ipauubaya sa ibang barbelista

ni VA @Sports | January 25, 2023

Hindi na sasabak sa Cambodia Southeast Asian Games si Hidilyn Diaz- Naranjo kung saan paborito sana siyang magwagi ng ikatlong sunod na gold medal sa weightlifting.

Sa halip, lalahok siya sa Asian Weightlifting Championship na isang Paris 2024 Olympics qualifier na makakasabay ng 32nd SEAG sa Mayo.

Mismong ang asawa at coach ng Tokyo Olympics gold medalist na si Naranjo na si Julius (Naranjo) ang kumumpirma ng balita.

Ang dahilan, mag-aabot at magkakasabay ang Cambodia Games sa Mayo 5-17 at ang Asian championships sa Mayo 3-13 sa Jinju, South Korea.

“I don’t see it as advisable for us to compete in the SEA Games because it is not an Olympic qualifying event,” ayon pa kay Naranjo. Gusto rin aniya ng kanyang maybahay na mabigyan ng pagkakataon ang mga kabataang weightlifters na ipakita ang galing sa Cambodia. “At the end of the day, we’re focusing on qualifying for the Olympics and Hidilyn also wants to give chance to other aspiring athletes who can make a mark in SEA Games,” paliwanag ni Naranjo. “We have to look for what’s more relevant and we think the Jinju competition is more likely our destination.”

May tsansa si Diaz-Naranjo na makasabak sa ikalimang sunod niyang Olympics kung sakali sa Paris kung magwawagi siya sa anim na qualifiers na itinakda ng International Weightlifting Federation para sa 2024 Games.

Nagwagi si Diaz-Naranjo sa unang 6 na qualifying tournaments-ang World Championships noong Disyembre sa Bogota,Columbia.

Ngunit ang agumpay sa Bogota ay nagawa nya sa 55 kgs.category kung saan din siya nagwagi ng gold medal sa Tokyo.

Hindi isinama sa Paris program ang kategorya kaya umakyat ni Naranjo sa 59 kgs division.

Base sa itinakda ng International Weightlifting Federation (IWF) na time line para sa hangad na mag-qualify sa Paris Olympics ay nagsimula noong Agosto 2022 at matatapos sa Abril 2024.

Kabilang sa qualifiers na lalahukan ni Diaz-Naranjo ang 2023 IWF Grand Prix 1 and 2, 2024 senior continental championships at IWF World Cup sa Thailand sa Abril.