Ex-Mandaluyong Mayor Benhur Abalos, bagong MMDA Chairman

ni Thea Janica Teh | January 11, 2021

Itinalaga na bilang bagong chairman ng Metropolitan Manila Development Authority (MMDA) si dating Mandaluyong City Mayor Benjamin “Benhur” Abalos nitong Linggo, ayon kay MMDA General Manager Jojo Garcia.

Pinalitan ni Abalos si retired General Danilo Lim na pumanaw nitong Miyerkules, Enero 6 dahil sa COVID-19. Nahalal bilang mayor ng Mandaluyong City si Abalos simula 1998 hanggang 2004 at 2007 hanggang 2016.

Siya ay pinalitan sa puwesto ng kanyang asawa na si Carmelita Abalos na na-reelect noong 2019.

Matatandaang umupo rin bilang chairman ng MMDA ang ama ni Abalos na si Benjamin Abalos Sr. simula 2001 hanggang 2002.

4 na biyaherong mula sa Brazil, nagdala ng bagong variant ng COVID-19 sa Japan

ni Thea Janica Teh | January 11, 2021

Nadiskubre nitong Linggo sa Japan ang bagong variant ng COVID-19 sa apat na biyahero mula sa Amazona State Brazil, ayon sa Health Ministry ng Japan.

Magsasagawa na ng pag-aaral ang mga opisyal ng Japan upang malaman kung ekeptibo pa rin ang vaccine laban sa bagong variant na iba sa nadiskubre sa Britain at South Africa.

Ayon sa head ng National Institute of Infectious Diseases na si Takaji Wakita, "At the moment, there is no proof showing the new variant found in those from Brazil is high in infectiousness."

Samantala, ibinahagi naman ng Health Ministry ng Brazil na sinabihan na umano sila ng Japan na ang bagong variant ay may 12 mutation at ilan dito ang nadiskubre sa United Kingdom at South Africa.

Aniya, "It implies in a potential higher virus infectiousness." Sa apat na biyaherong dumating sa Haneda Airport sa Tokyo noong Enero 2, isang lalaki na nasa edad 40 ang nakararanas ng hirap sa paghinga, isang babae na nasa edad 30 ang nakararanas ng pananakit ng ulo at lalamunan at isang binata na nakararanas ng lagnat.

Ang isang pasaherong babae naman ay hindi nakitaan ng kahit anong sintomas. Sa ngayon ay sumailalim na sa quarantine ang lahat ng pasahero na dumating sa airport sa Tokyo.

Nitong Huwebes, isinailalim na sa state of emergency ang Tokyo at tatlo pang kalapit na lugar dahil sa patuloy na pagtaas ng kaso ng COVID-19. May kabuuang 289,000 kaso na ang naitala rito at 4,061 ang namatay dahil sa virus.

400K COVID vaccine, unang ipapamahagi sa Pasig

ni Thea Janica Teh | January 11, 2021

Nakipagkasundo na ang pamahalaang lokal ng Pasig City sa AstraZeneca COVID-19 vaccine para sa 400,000 doses na nagkakahalaga ng P100 milyon.

Sa tweet ni Pasig City Mayor Vico Sotto ngayong Lunes, sinabi na "Many of us LGUs signed a tripartite agreement with AstraZeneca and the national gov’t yesterday. Pasig ordered 400K doses (*100M pesos).

Actual quantity & date of delivery will depend on several factors." Sinabi rin ni Sotto na bibili pa ito ng vaccine mula sa iba pang vaccine maker kapag ito ay naging available na at napatunayang epektibo.

Bukod pa rito, ibinahagi rin ni Sotto ang ilan sa mga advantage ng AstraZeneca vaccine tulad ng ito ay mas mura, mas madaling ibiyahe at iimbak, epektibo at maraming bansa na ang nag-apruba dito.

Nitong nakaraang Linggo, sunud-sunod na rin ang anunsiyo ng iba pang LGUs na nakipagkasundo na rin sa AstraZeneca COVID-19 vaccine tulad ng Iloilo City (600,000 doses); Caloocan City (600,000 doses); Vigan City (100,000 doses) at Valenzuela (640,000 doses).