76ers humilera na sa East semis, Knicks nakaabang

ni Anthony E. Servinio @Sports | May 4, 2026

Photo: Philadelphia 76ers / FB

Kinumpleto ng bisitang Philadelphia 76ers ang milagro sa 109-100 panalo sa paboritong Boston Celtics sa 2026 NBA Playoffs kahapon sa TD Garden. Nanaig ang 76ers sa seryeng best-of-seven, 4-3, at tumuloy sa Eastern Conference Semifinals.

Pumasok ang Celtics na wala sa Jayson Tatum na napilitang lumiban dahil masakit ang tuhod. Agad na kinuha ng Philly ang pagkakataon at unti-unting lumayo hanggang umabot ng 84-66 bago magwakas ang pangatlong quarter.

Ayaw mapahiya sa sariling tahanan, humabol ang Celtics at ang huling banta nila ay 98-99 at 3:49 sa orasan. Nakahinga ng maluwag ang 76ers sa walong sunod-sunod na puntos ni Tyrese Maxey, 107-99, at tiyakin ang resulta na may 15 segundo pa.

Nagtapos si Maxey na may 30 at 11 rebound. Sariwa pa ang operasyon para tanggalin ang appendix, bumanat ng 34 at 12 rebounds si Joel Embiid.

Haharapin na ng Philadelphia ang New York Knicks simula Martes sa Madison Square Garden. Hindi biro ang ginawa ng 76ers na kunin ang huling tatlong laro.

Ito ang ika-14 na pagkakataon na may umahon galing 1-3 mula 1968. Bago niyan ay dumaan muna sila sa Play-In at tinalo ang Orlando Magic, 109-97, para itakda ang serye kontra Celtics.

Sa gitna ng nawalang 23.3 puntos ni Tatum ay sinikap buhayin ang Celtics nina Jaylen Brown na may 33. Tumulong si Derrick White na may 26.

Malalaman ang huling dalawang mapapabilang sa East Semis sa kambal na Game Seven ngayong Lunes. Bibisita ang Orlando sa Detroit Pistons habang dadalaw ang Toronto Raptors sa Cleveland Cavaliers.

Ika-5 sunod na finals seat kinagat ng NU Bulldogs

by Gerard Arce @Sports News | May 3, 2026

Photo: Dobleng depensa ang ginawa ni #18 Regina Grace Jurado at #5 Avril Denise Bron ng UST Golden Tigresses sa palo ni #18 Arah Ella Panique ng NU Lady Bulldogs sa UAAP Season 88 Women's Volleyball Tournament sa Smart Araneta Coliseum kahapon. (Ben Maniclang via Bulgar)

Mga laro sa Miyerkules

(MOA Arena)

Separate ticket

Best-of-3 Finals

12 noon – FEU vs NU (Men Finals)

5 p.m. – DLSU vs NU (Women Finals)

Magkakaroon ng ikalawang pagkakataon ang NU Lady Bulldogs na madepensahan ang korona na kakagat sa ika-5 sunod na finals appearance matapos tuldukan ang ratsada ng UST Golden Tigresses sa 20-25, 26-24, 26-24, 25-21 kasunod ng mahusay na pagmamando sa opensa ni ace playmaker Camila “Lams” Lamina para harapin ang undefeated na DLSU Lady Spikers, kahapon sa UAAP Season 88 volleyball tournament stepladder semifinals sa Smart Araneta Coliseum.

Bukod tangi ang naging pagpapakita ng kahusayan sa pagpapatakbo ng opensa ng Lady Bulldogs ng 24-anyos na two-time Best Setter at sa eksaktong laro ng mga spikers na sina Arah Panique at Vange Alinsug, gayundin si middle blocker Chamy Maaya. “Very happy kase lahat kami talagang pinagtrabahuhan namin itong game na ito kase very crucial, do-or-die game and very happy ako sa performance ng team, sana magtuloy-tuloy siya hanggang championship,” pahayag ng 5-foot-7 setter na tubong Guimaras na namahagi ng 34 excellent sets, kasama ang anim na digs, at tatlong puntos, na makakalaban ang La Salle sa pang-apat na pagkakataon.

“Very challenging talaga yung La Salle,  kase kumpleto sila and kami naman all we have to do is back to basic and prepare kung ano talaga yung usual na preparation namin sa team at yung preparation. Iisang mindset pa rin, is to get the championship crown.”

Nanguna sa atake si dating Alas Pilipinas hitter Arah Panique sa 23 puntos na sinundan ni senior spiker Alinsug sa 18 marka habang umiskor si Maaya ng 14 puntos at Alexa Mata sa 9 puntos at apat na digs.

TOL: Russian Anisimov bida sa Stage 4, Nikita sa Yellow Jersey

ni Elyssa Nichole @Sports | May 3, 2026

Photo: Nanguna si Ivan Anisimov ng team LCW UAE Cycle sa stage 4 sa oras na 03:59:41 sa 159 km  mula Palayan City hanggang Bayombong, Nueva Vizcaya habang si Emmanuel Montemayor ay nanguna sa 22 puntos sa individual qualification ng MPTC Tour of Luzon kahapon. (mptctolpix)

Bayombong City - Mananatili ang Yellow Jersey kay Russian rider Nikita Shulchenko ng LCW UAE Cycling Team matapos nitong makasabay sa mga tigasing riders sa Stage 4 ng  MPTC Tour of Luzon sa Nueva Viscaya.

Hindi rin nagalaw ang puwesto nina Syrian cyclist Ibrahiem Yousef Alrefai at Pinoy rider Emmanuel Dave Montemayor nanatili sila sa second at third placer sa Individual general Classification.

Sina Shulchenko at Alrefai ay magkakampi sa LCW UAE Cycling Team habang nasa Go for Gold Philippines naman si Montemayor sa event na suportado ng Metro Pacific Tollways Corp., Manny V. Pangilinan Group of Companies at Philippine Sports Commission.

Malaking grupo ng mga siklista ang tumawid sa finish line kung saan ay nahablot ng isa pang Russian rider mula sa LCW UAE Cycling Team na si Ivan Anisimov ang Stage 4.

Inirehistro ni Anisimov ang tatlong oras, 59 minuto at 41 segundo sa 165 km Palayan City - Bayombong, Nueva Vizcaya na dumating na segundo si Korean cyclist Jung Hoon Lee ng Seoul Cycling Team habang tersero si Ronnilan Quita ng 7Eleven Cliqq Roadbike Philippines.

Tumawid ng pang-apat sa meta si Antoine Huby ng France mula sa 7Eleven Cliqq Roadbike Philippines habang pang-lima si Landerson Nebres ng Dreyna Orion Cement.

Samantala, hawak pa rin ng Go for Gold Philippines ang tuktok ng Team General Classification, pangalawa ang 7Eleven Cliqq Roadbikes Philippines at pangatlo ang powerhouse Standard Insurance Philippines.