Nuns vs. St. John agawan sa Final 4 ng SGVIL-DLSU

by Gerard Arce @Sports News | April 29, 2026

Photo: Ang top 8 teams sa quarterfinals ng Shakey’s Super League GVIL Rising Stars Cup, sino ang mananaig para makatuntong sa finals? (fbpix) 

Itataya ng defending champion National University Nazareth School (NUNS) ang korona laban sa St. John’s Institute sa win-or-go-home final eight upang makapasok sa pinag-aagawang Final Four ngayong araw sa Shakey's Girls Volleyball League sa La Salle Green Hills Gym.

Pipilitin ng grupo nina Raine Alonzo, Bella Cruz at Alas Pilipinas Girls member Xyz Rayco na mapanatili ang unbeaten record sa pagsisimula ng mga aksyon bandang alas-10:00 ng umaga sa Court 1.

Mayroong malinis na kartada ang Lady Pullpups kasunod ng 4-game sweep sa Pool A na hanap ang maging kauna-unahang back-to-back champions ng pinakamalaking grassroots volleyball league na suportado ng Shakey’s Pizza Parlor at Peri-Peri Charcoal Chicken. 

Makikipagtagisan naman ang Pool C second place St. John’s na ilalaban nina high-scoring winger Caera Celis at Kristel Mirasol upang maitala ang malaking upset, habang ang last year runner ups na Bacolod Tay Tung ay nanatiling walang talo sa apat na laro na haharapin ang Season 2 champion Adamson University sa maituturing na rematch noong 2024 title showdown.

Ang Pool D queens na University of Santo Tomas ay makakaharap ang King’s Montessori School, habang ang unbeaten na FEU-Diliman ay makakaharap ang Immaculada Conception College sa Court 2.

Ang reigning Division 2 champion na Domuschola International School ay haharapin ang undefeated na University of Batangas High School sa quarterfinal meeting, habang ang UST-B at Bacolod Tay Tung-B ay bubuksan ang sagupaan sa Court 1, gayundin ang walang talong NUNS-B laban sa DLSU Green Hills, habang ang Corpus Christi School ay babanggain ang St. Jude sa Court 2.

Masisilayan ang quarterfinal matches sa best-of-3 sets format, habang ang semifinal at final ay gagawing best-of-five sets at winner-take-all matches, ayon sa pagkakasunod sa mga larong mapapanood at matutunghayan sa live at on-demand sa PusoP.com livestream at Solar Sports.

13 teams at 89 cyclists larga na sa MPTC Tour of Luzon

ni Elyssa Nichole @Sports | April 29, 2026

Calatagan, Batangas - Markado si defending champion Dae Yeong Joo ng Korea pag-arangkada ng MPTC Tour of Luzon 2026 ngayong araw sa Tagaytay City.

Pasisibatin ang 13 teams sa alas-9 ng umaga kung saan magsisimula ang 150.1 km. Stage 1 sa Calatagan, Batangas at magtatapos sa Praying Hands sa Tagaytay City.

Ibabandera ng Gapyeong Cycling Team ang top rider nilang si Joo na pangungunahan ang 89 cyclists na papadyak sa 14-stage race na may pitong local at anim na foreign teams.

Makakatulong ni Joo ang teammates na sina Cha Dong Heon, Jang Jun Hyeok, Lim Ye Seo, Jung Dae Ho at Jung Moon Soon. Babantayan din ng mga siklista ang local teams na defending champion MPTC Drivehub at powerhouse Standard Insurance.

Ipaparada ng Standard Insurance si former Ronda Pilinas champion Ronald Oranza, makakasama niya sina Junrey Navarra, Ronald Lomotos, Jeremy Lizardo, Jhon Mark Camongao,  Dave Eeron Cangayao at Jexxel Ehd Azur. Pambato ng MPTC Drivehub sina Rustom Lim, Mike Piolo Lugtu, Nash Joshua Lim, Khyll Lequin, John Paul Laureta, Rking Roque at Ruzel Agapito.

Ang ibang local teams ay ang  Eleven Cliqq Roadbike, Excellent Noodles Cycling Team, DReyna Orion Cement at Pangasinan Cycling Team habang ang foreign ay Seoul Cycling Team mula South Korea, LCW UAE Cycling Team, National Team ng Malaysia, Ponti Wuaya Racing Team mula sa Indonesia at panlaban ng Hong Kong na CCN Factory Racing.

Pagkatapos ng Calatagan-Tagaytay Stage 1, sunod ang 43.40-km team trial Stage 2 sa Clark- New Clark City sa Huwebes, para sa 145.40-km Stage 3 New Clark City - Palayan City at  aarangkada sa 165.80-km Stage 4 Palayan City - Bayombong sa Santiago City- Tuguegarao City ang bakbakan ng siklista sa 130.60-km Stage 5. Nakalaan ang P1-M premyo sa individual champion at P2-M sa magka-kampeon na koponan.

Spurs at Celtics, 3-1 na isa na lang sa playoffs

ni Anthony E. Servinio @Sports | April 28, 2026

Photo: Nabigo sa tangkang pag-swak ng bola si Alperen Sengun (28) ng Houston Rockets habang nakadepensa si Los Angeles Lakers center/forward Jaxson Hayes (11) at forward LeBron James (23) sa 2nd quarter game ng NBA playoffs kahapon sa Toyota Center. (Troy Taormina-Images/Reuters)

Binitin ng Houston Rockets ang martsa ng bisitang Los Angeles Lakers, 115-96 sa 2026 NBA Playoffs kahapon sa Toyota Center. Isang panalo na lang ang kailangan ng San Antonio Spurs at Boston Celtics matapos ang mga impresibong tagumpay.

Unang quarter lang nakasabay ang Lakers at mula roon ay tuloy-tuloy ang arangkada ng Rockets hanggang maging 97-69 maaga sa huling quarter. Ito ang unang panalo ng Houston sa seryeng best-of-seven subalit matapos mahulog sa unang tatlong laro.

Bumanat ng 23 si Amen Thompson habang 20 si Tari Eason. Hindi pa rin naglaro si Kevin Durant dahil masakit ang bukong-bukong.

Umahon ang Spurs mula sa 39-58 butas bago magwakas ang pangalawang quarter at ibinaon ang Portland Trail Blazers 114-93, at itayo ang 3-1 bentahe. Balik-aksyon si Victor Wembanyama at agad uminit para sa 18 ng kanyang 27 sa huling dalawang quarter na may kasamang 12 rebounds at 7 supalpal.

Rumatrat ng 24 3-points ang Celtics para tambakan ang Philadelphia 76ers, 128-96, at lumamang ng 3-1. Anim na tres si reserba Payton Pritchard para pamunuan ang Boston sa kanyang 32 habang nagpatak ng 30 si Jayson Tatum at 20 kay Jaylen Brown.

Sa isa pang serye, panalo ang Toronto Raptors sa bisitang Cleveland Cavaliers, 93-89, para pumantay sa 2-2. Sumandal ang Raptors sa mga paniguradong free throw ni Scottie Barnes sa huling minuto upang magtala ng 23 at tinumbasan ni Brandon Ingram na 23 din.

Samantala kahit lamang ng 3-1 ang Minnesota Timberwolves sa Denver Nuggets, kailangang maghanda silang tapusin ang serye na wala sina Donte DiVincenzo at Anthony Edwards. Napilay ang sakong ni DiVincenzo sa Game 4 at ooperahan na sabay nasaktan ang tuhod ni Edwards at walang linaw kung kailan babalik.