Bagong hepe ng PhilHealth, sasabak na sa ‘giyera’; korupsiyon, dapat nang matuldukan!

ni Sonny Angara - @Agarang Solusyon | September 5, 2020

Kapag tayo ay may gamit na nagiging palyado na ang serbisyo sa atin o kung minsan ay wala na talagang silbi dahil hindi na mapakinabangan at inilalagay na tayo sa alanganin, dapat palitan na. At ang ipapalit, dapat ay ‘yung may kalidad at siguradong hindi tayo mapapahiya at sigurado ring hindi papalya.

Ganyan ang inaasahan natin ngayon sa bagong hepe ng Philippine Health Insurance Corporation o PhilHealth—si dating NBI Director Dante Gierran na pumalit kay dating PhilHealth president Ricardo Morales.

Nasa balikat ngayon ni G. Gierran ang responsibilidad na ibalik ang tiwala ng publiko sa PhilHealth na matagal nang nababahiran ng iba’t ibang uri ng katiwalian.

Sa pag-upo ng bagong pinuno ng PhilHealth, walang oras ang dapat niyang sayangin para sa modernisasyon ng institusyong ito at ‘linisin ang bawat sulok’ ng insurance corporation.

Umaasa rin tayong tatalima si G. Gierran sa iniatas sa kanya ng Pangulo na balasahin ang mga opisyal ng PhilHealth regional offices, kalusin ang korupsiyon at panagutin ang mga tiwaling opisyal na may kinalaman sa mga anomalya sa loob ng ahensiya.

Maraming dapat baguhin sa PhilHealth si G. Gierran. Kasama riyan ang sistema sa reimbursement ng healthcare costs at ang pagsasaayos sa napakagulong case rate system o ang sistema ng PhilHealth sa pagbabayad ng medical claims.

Tiyak na mababantayan ang anumang katiwalian sa ahensiya at ang mga galaw ng pandarambong sa loob kung may mas pinahusay at epektibong IT system ang ahensiya. Kailangang magkaroon sila ng sistematikong datos o database na pangangasiwaan ng kanilang information technology.

Nasa ika-21 siglo na tayo—modernisado na ang panahon. Hindi na katanggap-tanggap ang mga rason na kaya hindi nabantayan ang rekord ay dahil walang sapat na database—hindi rasonable ‘yan, kundi palusot na lang. Kaya pakiusap natin kay G. Gierran, ipakita niya ang ‘pangil’ ng isang pinuno pagdating sa paglaban sa korupsiyon at iba pang katiwalian.

Tayo ay may isinusulong na panukala—ang Senate Bill 1470 o ang National Digital Transformation Act. Malaki ang maitutulong ng panukala nating ito sa mga posibleng suliranin ng isang kumpanya, partikular sa kanilang mga record.

At dito sa PhilHealth, mas makabubuting maging digitized ang records nila dahil mas magiging madali ang validation ng membership. Ganito na ang umiiral na sistema ngayon sa SSS at GSIS kaya nga’t mas mahusay na ang serbisyo nila ngayon sa publiko.

Saan ka nga naman nakakita ng members na 130 years old at nasa records pa hanggang ngayon? ‘Yan ang mga dapat linisin ng bagong pamunuan ng PhilHealth dahil nagagamit ang mga record sa paggawa ng anomalya.

Kaya’t umaasa tayo na sa ilalim ng liderato ni G. Gierran, unti-unti nang maibabangon ang reputasyon ng PhilHealth na talaga namang niyurakan ng mga tiwaling opisyal sa loob ng ilang taon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.co

Mas pinalakas na health sector, target ng bayanihan 2

ni Sonny Angara - @Agarang Solusyon | August 29, 2020

Posibleng umapaw na sa 200,000 ang mga positibong kaso ng COVID-19 sa bansa. Ibig sabihin, mayroon na tayong higit 60,000 active cases, tinatayang 3,000 na namatay at mahigit 130,000 na nakarekober.

Walang nakaaalam kung kailan matatapos ang krisis na ito, pero ang mahalaga, may nakalaang tulong ang pamahalaan para sa lahat ng apektado. Ito ang nilalayon ng ipinasa natin sa Senado na Bayanihan to Recover as One Act o mas kilala bilang Bayanihan 2.

Kabuuang pondo na P165.5-B ang nakapaloob sa Bayanihan 2, kung saan, malaking bahagi nito ay inilaan sa pinakamahalagang sangay ngayon ng gobyerno — ang kagawaran ng kalusugan.

Sa naturang kabuuan, P140-B ang regular appropriation, habang P25.5-B ang tinatawag na standby fund. Sa ilalim nito, P40.5-B ang nakalaang pondo para mga programa at iba pang mga pangangailagan ng ating medical frontliners. Mula sa P40-B na ito, P3-B ang inilaang alokasyon sa Department of Health upang makabili ng mga nabanggit na pangangailangan.

Kabilang sa mga ito ang pagbili ng 6 milyong N95 face masks; 8.5 milyong medical gowns; 1 milyong head covers; at 2 milyong coveralls. Ito ang mga ginagamit ng mga doktor at iba pa nating healthcare workers na sumasabak nang direkta sa mga pasyenteng may COVID bilang kanilang proteksiyon. Makikinabang din sa mga kagamitang ‘yan tulad ng face masks ang ating mga kababayang indigent na walang kakayanang bumili ng mga gamit pang-proteksiyon.

Iniaatas din ng Bayanihan 2 na ang bibilhing PPEs ay kailangang gawa sa bansa, sa kondisyong ang mga ito ay sulit sa presyo at de-kalidad. Ito ay upang matulungan ang ating mga lokal na PPE manufacturer.

Sa kabuuan, halos pinakamalaking bahagi ng pondo para sa Bayanihan 2 ang inilaan sa sektor pangkalusugan.

At upang mas maging malinaw, kabilang sa mga programang pangkalusugan ang patuloy na pag-empleyo ng emergency human resources for health (HRH); pagpapaigting sa kakayahan ng DOH hospitals; special risk allowance para sa mga pribado at pampublikong health workers at kompensasyon sa health workers na magkaka-COVID o papanaw dahil sa sakit na ito habang naka-detalye sa COVID wards. Kabuuang P13.5-B ang inilaan ng Bayanihan 2 para sa mga programang ito.

Kaugnay nito, nagpahayag din ang DOH na kakailanganin pa rin nila hanggang sa mga susunod na araw ang mga dagdag HRH upang mas mapalakas ang kanilang pagresponde sa mga kaso ng COVID-19, partikular sa mga lugar kung saan mataas ang bilang ng mga infected.

Noong minsang mag-public address si Pangulong Rodrigo Duterte, ipinangako niya na sa ilalim ng Bayanihan 2, magiging prayoridad ang mga programa ng health sector. Kabilang d’yan ang additional hiring ng health personnel at ang pagkakaroon ng special risk allowance at benefits para sa kanila. Kahit man lamang sa ganitong paraan, malaman nilang labis nating kinikilala at pinahahalagahan ang kanilang pagsasakripisyo para sa atin.

Kabilang sa mga kompensasyong matatanggap ng ating healthworkers, base sa naunang Bayanihan 1 ay P100, 000 para sa health workers na malubhang tatamaan ng COVID at P1-M para sa mga papanaw kaugnay ng karamdamang ito habang nasa active duty. Sa ilalim naman ng Bayanihan 2, tatanggap ng P15,000 ang healthworkers na magdaranas nang mild to moderate case ng COVID.

May kaukulan ding P4.5-B para sa konstruksiyon ng temporary medical isolation at quarantine facilities, field hospitals, dormitories para sa frontliners at sa pagpapalawak sa kapasidad ng mga ospital sa bansa at isa pang P4.5-B para naman sa konstruksyon at pagmamantine ng isolation facilities, billing ng hotels, pagkain at transportasyon na gagamitin sa pagresponde sa COVID cases. Kaukulang P5-B naman ang inilaan para sa hiring ng 50,000 contact tracers ng DILG at P10-B standby fund para sa IATF sa pagbili ng gamot, testing at bakuna.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.co

P165.5-B pondo ang nakalaan sa Bayanihan 2

ni Sonny Angara - @Agarang Solusyon | August 23, 2020

Pangunahing tanong sa araw-araw: Kailan matatapos ang lahat ng ito? Kailan tayo muling babangon? Walang nakakaalam pero ang sigurado, may nakahandang tulong ang pamahalaan.

Kamakailan, pinagtibay na ng Senado ang ikalawang bersiyon ng Bayanihan — ang Bayanihan 2 o ang Bayanihan to Recover As One Act na pangunahing iniakda nina Senate President Vicente “Tito” Sotto at Senadora Pia Cayetano.

Lubos tayong nagpapasalamat sa ating mga kasamahan sa Mataas na Kapulungan, gayundin sa Kamara sa pagsisikap na maigapang ang panukalang ito upang matiyak na patuloy ang tulong ng gobyerno sa sambayanan.

Sa ilalim ng Bayanihan 2, tayo ay naglaan ng kaukulang P140-B bilang regular appropriations habang may ‘tambay’ na P25.5-B bilang paunang lunas sakaling magipit. Kaya’t sa kabuuan, ang Bayanihan 2 ay may pondong umaabot sa P165.5-B.

Marami ang nagtatanong — saan-saan daw mapupunta ang pondong ‘yan? Hayaan ninyo ang lingkod na magpaliwang sa madaling salita: Una, mula sa naturang pondo, P3-B ang inilaan natin para sa procurement o pagbili ng PPEs, face masks, shoe covers at face shields; P4.5-B para sa pagtatayo ng mga pansamantalang medical isolation at quarantine facilities, field hospitals, dormitory at para rin sa pagpapalawak ng hospital capacity ng mga government hospitals; isa pang P4.5-B bilang pondo ng Office of Civil Defense o ng NDRRMC para sa kanilang isolation facilities at iba pang mga pangangailangan. Kabilang dito ang billing sa mga hotel, pagkain at transportasyon na ginagamit ng mga pasyenteng may COVID-19; halagang P13.5-B inilaan sa DOH para sa kanilang emergency employment ng Human resources for health; P820-M pondo para sa Overseas Filipino sa ilalim ng Department of Foreign Affairs; P13-B para sa cash-for-work program ng gobyerno at iba pang support programs nito para sa mga sektor na lubhang apektado ng pandemya; P600-M bilang subsidies and allowances para sa mga mag-aaral na lubha ring naapektuhan ng krisis; P300-M bilang subsidies and allowances sa mga guro, non-teaching personnel at part-time faculty sa mga state universities and colleges o SUCs; P180-M pang-allowance sa ating mga pambansang atleta at sa mga coach; P39.472-B bilang capital infusion sa pagpapautang ng government banks. Ito ay binubuo ng (1) P10-B para sa DTI Small Business Corporation o SB Corp kung saan P4-B dito ay para maipautang sa mga MSMEs, mga kooperatiba, ospital at OFWs, habang P6-B nito ay para sa turismo; (2) P18.4725-B para sa LandBank; (3) P6-B para sa DBP at (4) P5-B para sa Philippine Guarantee Corp.

Nariyan din ang P24-B bilang tulong sa sektor ng agrikultura at sa programang Plant, Plant, Plant ng Department of Agriculture; P9.5-B assistance sa sektor ng transportasyon; P4-B sa tourism industry at may P100-M pondo para sa tourist guides training at subsidies; P3-B para sa development ng smart campuses sa iba’t ibang panig ng bansa; P1-B para sa TESDA Scholarships; P6-B para sa DSWD assistance to individuals in crisis situations; P4-B para sa implementasyon ng digital education ng DepEd; P1.5-B assistance to LGUs, at karagadang P2-B pa bilang subsidy sa pagbabayad ng interest loans sa utang ng LGUs sa government banks; P5-B para sa DILG na gagamitin nila para makapag-empleyo ng mga dagdag na contact tracers; P2.5-M para sa mga computer-based licensure ng Philippine Red Cross; P10-M bilang research fund ng Health Technology Assessment Council, isang ahensyang nilikha sa ilalim ng UHC Law; P15-M naman para sa Computational Research Lab ng UP Diliman.

Tungkol naman sa standby fund na P25-B, halagang P10-B mula rito ang para sa patuloy na pagpapalawak ng COVID-19 testing, para sa pagbili ng gamot at bakuna. Kabuuang P15.5275-B naman bilang karagdagang capital infusion sa government banks.

Umaasa tayong sa pamamagitan ng panibagong tulong sa ilalim ng Bayanihan 2 ay patuloy na makatutulong ang ating pamahalaan sa sambayanan na patuloy na hinahagpit ng pandemya. Ilang hakbang na lang, lalapag na ang panukalang ito sa tanggapan ni Pangulong Rodrigo Duterte at lalarga na para sa ating unti-unting pagbangon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City

o mag-email sa agarangsolusyon.bulgar@gmail.co