Panalo ng atletang Pinoy, panalo ng buong sambayanan

ni Sonny Angara - @Agarang Solusyon | June 19, 2021

Noong araw, ang kababaihan ay ikinokonsiderang mahihinang kasarian. Dala na rin siguro ng kinasanayan nila noong mga unang panahon. Bawal silang magbuhat ng mabibigat o hindi nila puwedeng gawin ang dapat ginagawa ng kalalakihan, lalo na sa usapang trabaho.

Noon, wala ring kababaihan sa matitinding palakasan tulad ng basketball o anumang sports na nakagisnan nating panlalaki.

Pero nang gulantangin tayo ni Miss Hidilyn Diaz, ang Filipina weightlifter na nagbigay sa atin ng kauna-unahang medalya sa Olympics sa loob ng 20 taon, nabago ang pananaw natin sa paniwalang “lakas at kahinaan” ng kababaihan. Nasungkit noon ni Miss Diaz ang silver medal sa Summer Olympics na ginanap noong Agosto 2016 sa Rio de Janeiro, Brazil.

At nitong nakaraang dalawang linggo lang — taong kasalukuyan, isa na namang Pinay ang nagbigay ng karangalan sa Pilipinas — si Miss Yuka Saso na nag-kampeon sa U.S. Women’s Open Golf Championship.

Lahat tayo, napanganga sa karangalang ito na nakamit ni Yuka.

At bilang pagkilala kay Miss Saso, isang Senate Resolution ang isinulong natin sa Senado — ang Senate Resolution No. 755 na nagbibigay-parangal sa kanyang pagsisikap at determinasyong mas maitaas pa ang kanyang sarili bilang pinakamagaling na female golfer sa buong daigdig.

Dumarami na ang mga female athlete natin na gumagawa ng pangalan sa pandaigdigang palakasan sa kani-kanilang kategorya.

Si Hidilyn ay muling makikipagtagisan ngayong taon sa Tokyo Olympics at ipanalangin natin na muli niya itong mapagwagihan. Dahil ang kanyang panalo — ang kanilang panalo ay panalo ng sambayanang Pilipino.

Nariyan din ang batambatang female tennis player natin — si Alex Eala na gumagawa ngayon ng pangalan sa tennis under-18 tournaments.

Dahil sa ating female athletes, lalo na sa kampeonato ni Bb. Saso, unti-unti nang napapansin sa mga pandaigdigan torneo ang ating mga manlalaro. Pinatunayan natin sa kanila na hindi madaling kakompitensiya sa palakasan ang mga Pilipino.

At dahil nagsisilbi ngayong inspirasyon sa Filipino golfers ang panalong ito ni Yuka, posibleng sa mga darating na araw, darami rin ang kabataang susubok at magsasanay para maging mahusay na golfer sa bansa.

Muli, tayo ay sumasaludo sa pagwawagi ni Yuka Saso, dahil buong Pilipinas ang taas-noo ngayon sa buong mundo. Isang malaking kasiyahan ito sa kabila ng ating patuloy na paghihirap dulot ng pandemya.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Professional licensure examinations, palawigin!

ni Sonny Angara - @Agarang Solusyon | June 12, 2021

Ngayong tayo ay nasa pandemya, pangunahing pangangailangan natin ang mga karagdagang doktor, nurse at health workers. Napakahalaga nila ngayon, lalo na ang doktor at nurses. Ang problema, hanggang sa ngayon ay malaki pa rin ang problema sa pagdaraos ng licensure examinations para sa ating professionals.

Marami sa ating examinees, manggagaling pa sa iba’t ibang panig ng bansa, lalo na sa mga lalawigan na may kalayuan. At kung luluwas sa mga lungsod na nagpapatupad ng swabbing, quarantining, talagang kailangang maglaan ng mahaba-habang panahon ang examinee. At liban pa riyan, malaking gastos ang titiisin niya. Napakahirap.

Kaya panawagan natin sa Professional Regulation Commission o PRC, dapat hindi lang nakasentro sa Maynila at sa iba pang malalaking lungsod ang pagdaraos ng Professional Licensure Examination. Dapat, mapalawig din ito sa bawat sulok ng bansa para mabawasan ang stress ng examinees natin. At higit sa lahat, huwag nating pahirapan pa sa gastos.

Marami sa mga professional examinees ang ganito ang hinaing at sana ay pakinggan natin. Kailangan sila ng komunidad, kailangan sila ng bansa bilang mga propesyunal na makatutulong hindi lang sa ekonomiya, kundi partikular sa mga kababayan natin, lalo na ang nurses and other medical professionals.

Noong March 2020, na-postpone ang dapat sana’y naka-schedule na licensure exam. Pero dahil sa pananalasa ng COVID-19 ay nabinbin ito.

Kung maaari sana ay magtakda ang PRC ng kaukulang examination site sa mga probinsiya para doon na lang sa sentrong ‘yun magpunta ang mga examinee, kaysa naman lumuwas pa sila sa lungsod, mamasahe, mag-quarantine, magpa-swab — hindi nakatutulong sa kanila ‘yung ganung dagdag-problema.

Nakalulungkot na 2019 pa ang huling Nursing licensure test. Isa ‘yan sa mga dahilan ngayon kung bakit, gahol tayo sa bilang ng nurses na kailangang-kailangan pa naman ngayon.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Gobyerno, tagapagmana ng property owners, makikinabang sa pagpapalawig sa tax amnesty law

ni Sonny Angara - @Agarang Solusyon | June 05, 2021

Lusot na sa Senado sa ikatlo at huling pagbasa ang Senate Bill 2208, o ang ating panukalang pagpapalawig sa bisa ng Tax Amnesty Law (RA 11213) hanggang Hunyo 14, 2023.

Sakaling maisabatas, hindi lang ang pamilya ng mga pumanaw na property owners ang makikinabang kundi maging ang gobyerno.

Nakatakdang sanang magpaso ngayong Hunyo 14, 2021 ang bisa ng naturang batas, pero dahil sa pandemya, nabimbin ang mga transaksIyon sa gobyerno at 15 buwang hindi gumalaw ang dapat sana’y pagproseso sa tax amnesty. Kung nagkataon, patung-patong na siguro ang hinaing ng mga kababayan nating may suliranin sa estate tax.

Nakalahad sa batas na mula 20 percent net estate tax, ay ibinagsak ito sa 6 porsIyento at ang halaga ay ibabase sa petsa kung kailan pumanaw ang isang property owner.

Isinasaad din sa batas na binaklas na ang penalties at surcharges na hindi nabayaran sa loob ng maraming taon.

Gayunman, posibleng maglahong parang bula ang lahat ng benepisyong ‘yan, kung hindi natin naagapan sa Senado ang pag-amenda sa Tax Amnesty Law na nagpapalawig sa bisa nito hanggang Hunyo 2023.

Paglilinaw sa ating panukala, malaki ang magiging pakinabang sa batas na ito ng mga tagapagpamana ng property owner sapagkat mababayaran na nila ang buwis ng minana nilang ari-arian tulad ng bahay at lupa sa mababang halaga. Kumbaga hindi na nila proproblemahin pa ang paghahabol sa kanila ng BIR.

Ang gobyerno naman mas tataas ang koleksIyon sa buwis dahil daragsa ang mga aplikasyon para sa tax amnesty at magbabayad ng buwis sa minana nilang property.

◘◘◘

ANG tagumpay ng ating kababayan sa ibayong dagat ay maituturing na tagumpay ng buong sambayanang Pilipino. Ano pa kaya kung ang larangang kinabibilangan ng ating kababayan ay dekalidad na posisyon sa International Criminal Court?

Isang malaking karangalan sa Pilipinas na sa kauna-unahang pagkakataon ay mapabilang ang isa nating kapita-pitagang hukom sa ICC, na naging tapat at masigasig sa kanyang mandato.

At sa kanyang nakatakdang pagreretiro mula sa ICC, ipinaaabot natin kay ICC Judge Raul Cano Pangalangan ang isang pagbati at pasasalamat. Si G. Pangalangan ay dati ring UP Law Dean.

Mabuhay ka, Judge Pangalanan. Isa kang malaking karangalan ng Pilipinas!

◘◘◘

Isang resolusyon ang isinumite natin sa Senado kamakailan na kumikilala sa hindi matatawarang kontribusyon ng dalawang haligi ng Philippine theatre sa pamamagitan ng Repertory Philippines (Rep).

Layunin ng ating Senate Resolution 735 na kilalanin ang Repertory Philippines founders na sina Bb. Zenaida “Bibot” Amador at Bb. Carmen “Baby” Barredo na pumanaw na kailan lamang.

Tulad ng ating yumaong ama na si dating Senate President Edgardo Angara, tayo ay may malaki ring pagsuporta sa anumang larangan ng sining.

Naaalala pa natin na noong tayo ay paslit pa, madalas tayong isinasama ng ating ina sa panonood ng stage plays na kinabibilangan ni Bb. Barredo. Anumang kontribusyon ng ating mga kababayan na nagbibigay karangalan sa ating kasaysayan ay dapat nating kilalanin.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com