Benepisyo para sa medical frontliners, agrarian reform, PUVs, tuluy-tuloy kahit

expired na ang bisa ng bayanihan 2.

ni Sonny Angara - @Agarang Solusyon | July 17, 2021

Expired na ang bisa ng Bayanihan 2 nitong nakalipas na Hunyo 30. Pero ang mga probisyong nagpapatupad sa mga benepisyo ng ilang mahahalagang sektor at industriya ay mananatili. Pangunahin d’yan ang mga benepisyo ng magigiting na medical frontliners.

Patuloy lang ang mga benepisyong ito, hangga’t tayo ay nasa pandemya at hangga’t hindi pa binabaklas ni Pangulong Rodrigo Duterte ang deklarasyon ng national emergency kaugnay sa ating sitwasyon.

Kabilang sa mga mananatiling benepisyo para sa medical frontliners na nasa active duty ang mga tulong-pinansiyal, tulad ng P15,000 kung sila ay magkakaroon ng mild COVID; P100,000 sa kritikal na kondisyon at P1-M kung sila ay mamamatay. Ang huli ay ipagkakaloob ng gobyerno sa kanilang inulilang immediate family.

Maging ang kanilang magagastos sa pagpapaospital dahil sa COVID ay babalikatin ng estado, liban pa sa mga patuloy nilang matatanggap na life insurance, accommodation, transportation, meal at special risk allowances.

Tuluy-tuloy din ang iba pang benepisyo sa iba’t ibang sektor tulad ng suspended permitting requirements, agrarian reform clients at suporta sa transportation sector na talagang patuloy na hinahagupit ng pandemya.

Mananatiling suspendido ang permitting requirements para sa flagship projects o malalaking proyekto ng gobyerno na may kaugnayan sa Build, Build, Build. Maging ang permit requirements para sa telco infrastructures ay isasailaim din sa nasabing suspensiyon na magpapatuloy hanggang sa Setyembre ng taong kasalukuyan.

At dahil walang magaganap na phase out sa mga jeepney, tuloy ang kita at pasada ng mga kapatid nating drivers. Tinitiyak natin ‘yan dahil nakasaad mismo ‘yan sa mga probisyong nilalaman ng Bayanihan 2.

Maging ang agrarian reform benefits ay mananatili dahil na rin sa malaking epekto ng pandemya sa sektor ng sakahan.

Patungkol naman sa loan assistance para sa MSMEs, posibleng hindi lahat ay nabigyang-impormasyon sa loan window accounts para sa kanila sa ilalim ng Department of Trade and Industry. At ang maganda rito, hindi rin kasamang nag-expire ng Bayanihan 2 ang loan windows ng Development Bank of the Philippines at ng Land Bank of the Philippines na maaari pa ring lapitan ng ating maliliit na negosyante.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Taunang medical check-up, dapat libre para sa lahat ng Pilipino; gastos, sagot ng PhilHealth

ni Sonny Angara - @Agarang Solusyon | July 10, 2021

Walang pinipili ang sakit. Mahirap man o mayaman. Pero ang mas apektado, ang mga kababayan nating walang-wala — mga kababayan nating mas uunahin na lang bumili ng makakain para sa pamilya, kaysa bumili ng gamot o magpasuri sa doktor.

Sa ngayon, isinusulong natin sa Senado ang ating panukalang-batas, ang Senate Bill 2297. Nilalayon natin dito na gawing libre ang annual medical check-up para sa lahat ng Pilipino.

Napakahalagang taun-taon, sumasailalim tayo sa kumpletong check-up dahil dito natin malalaman kung ano ang karamdamang meron tayo. Dito natin matutuklasan kung tayo ay may malubhang sakit, tulad ng sakit sa puso, diabetes at iba pang nangangailangan ng agarang atensiyong medikal.

Nakalulungkot kasi na hanggang ngayon, patuloy ang pagdami ng mga kababayan nating hindi nakapagpapasuri sa doktor dahil sa takot sa paggastos. Dahil d'yan, hindi nabibigyan ng kagyat na atensiyon ang kanilang pangangailangang pangkalusugan.

Karamihan sa kanila, dahil wala ngang budget para magpa-check-up, mas pinipili na lang nilang mag-self-medication o kaya naman ay ang alternative healing. Walang kasiguruhan, sa totoo lang.

Sa kasalukuyan, tuluy-tuloy ang laban natin sa pandemya. At sa ganitong panahon, mas kailangan nating masuri ng doktor. Unang-una, ang mga karamdamang tulad ng nabanggit natin kanina — heart diseases, diabetes, at iba pang matitinding sakit, ‘yan ang madaling kapitan ng COVID-19 dahil sa mahinang pangangatawan ng tao.

Higit kailangan natin ngayon na magabayan ng doktor, lalo na kung may mga karamdaman tayong tulad ng mga nasabi natin.

Umaasa rin ang inyong lingkod na sa lalong madaling panahon, maisabatas ang ating panukala dahil napakalaking tulong nito sa ating mamamayan.

Ang maganda rito, lahat ng gagastusin sa medical check-up, laboratory and diagnostic tests, sagot ng PhilHealth. Wala tayong babayaran. Bahagi ‘yan nang nilalaman ng RA 11223 o ang Universal Health Care (UHC) Act, kung saan isa tayo sa may-akda.

Karapatan ng bawat Pilipino na pagkalooban ng tulong pangkalusugan, anuman ang estado nila sa buhay.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

‘Wag magpadala sa fake news: Bakuna, panlaban sa epekto ng sakit

ni Sonny Angara - @Agarang Solusyon | July 03, 2021

Dahil 16 na buwan nang walang naitalang kaso ng polio sa bansa, idineklara ng United Nation Children’s Fund (UNICEF) at ng World Health Organization na ang Pilipinas ay isa nang polio-free country matapos magtagumpay ang immunization campaign laban sa naturang karamdaman.

Ito ang pangalawang pagkakataon na idineklara ng WHO na nakaalpas na sa polio ang bansa. Una, noong 2000, matapos ang matagumpay na immunization campaign nang noo’y health secretary at dating senador Juan Flavier. Ito ay tinawag nilang Oplan Alis Disease, kung saan tinatayang 24 milyong Pilipino ang nabakunahan kontra polio sa loob lamang ng dalawang araw.

Nitong Hunyo 2021, nang ideklara tayong polio-free, tinatayang 30 milyong doses ng polio vaccine ang naipamahagi sa iba’t ibang lugar sa bansa. Naisakatuparan ang vaccination program sa pakikipagtulungan ng pribadong sektor at civic organizations sa gobyerno.

Masasabi mang tagumpay ang anti-polio vaccination campaign, may mga hindi pa rin maiiwasang pangyayari na pilit na sumisira sa kampanyang ito. Maging sa COVID-19 vaccines, talamak din ang fake news para mahikayat ang iba na huwag magpabakuna. Nitong Mayo 2021, base sa survey ng SWS, tatlo lamang sa bawat 10 Pinoy ang gustong magpabakuna. Dala ito ng takot dahil sa mga kumakalat na tsismis na sumisira sa dignidad na mga bakuna. Ang masaklap, magpapabakuna lang sila, kung ‘yung gusto nilang brand ang ituturok sa kanila. Namimili ang ating mga kababayan dahil sa kung anu-anong fake news na lumalabas laban sa iba’t ibang uri ng bakuna.

Noong i-sponsor natin ang RA 11525 o ang COVID-19 Vaccination Program Act of 2021 sa Senado, binigyang-diin natin ang kahalagahan ng bakuna bilang kaakibat ng kagustuhan nating makarekober mula sa iba’t ibang pahirap na dulot ng pandemya. At ang resulta, 20 kasamahan nating senador ang nagsilbing co-author natin sa batas.

Uulitin lamang natin. Kung gusto talaga nating maipanalo ang pandemya, magtiwala tayo sa ‘Science’. Anumang karamdaman ay sakop nito kaya’t maniwala tayo sa mga eksperto at hindi sa mga ‘human CCTV’ na kung anu-anong paninira sa bakuna at health protocols ang ginagawa.

Hinihikayat natin ang lahat, magpabakuna tayo, observe health and safety protocols at palagi tayong maging malinis sa katawan, kapaligiran at sanayin ang sarili na magsuot ng facemask tuwing lalabas ng bahay.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com