‘Wag pagdamutan ng tulong ang mga health workers

ni Sonny Angara - @Agarang Solusyon | August 28, 2021

Nakalulungkot ang balitang nahaharap ngayon sa manpower problem ang St. Luke’s Medical Center. Karamihan sa kanilang health workers, tulad ng mga nurse ay minabuti nang mangibang bansa. Pangunahin nilang dahilan ang napakababang sahod at kawalan ng maayos na working condition sa bansa.

Nangyari ito sa kasagsagan ng usapin hinggil sa napipintong mass resignations din umano ng health workers mula sa mga pribado at pampublikong ospital dahil sa patuloy na pagbabalewala ng Department of Health sa kanilang panawagang ibigay ang kanilang nauukol na benepisyo.

Ilang araw at buwan na rin tayong nananawagan sa DOH na kung maaari ay i-release na ang health benefits ng mga health workers. Kabilang sa mga benepisyong ‘yan ang special risk allowance o SRA at ang hazard allowances.

Malinaw na nakalagay sa batas, sa Republic Act 7305 o ang Magna Carta of Public Health Workers na sa kasagsagan ng pandemya, entitled sa hazard allowance ang government health frontliners. Ang naturang allowance ay katumbas ng halos 25 porsiyento ng buwanang basic salary ng health worker na tumatanggap ng Salary Grade 19 pababa. Limang porsiyento naman para sa mga health workers na may Salary Grade 20.

Nabanggit natin ang hazard allowance nitong nakaraang araw sa pagdinig ng Blue Ribbon Committee matapos ipahayag ng DOH na kasabay ng pag-expire ng Bayanihan to Recover as One Act o ang Bayanihan 2 noong Hunyo 30 ay natapos na rin ang pagkakaloob ng SRA sa health workers.

Hindi pupuwede ito ay maling-mali sila rito. Dahil ang totoo, hangga’t nasa national emergency ang bansa dahil sa pandemya at hangga’t hindi binabaklas ni Pangulong Rodrigo Duterte ang deklarasyon ng national emergency, mananatili ang pagkakaloob ng SRA sa private at public health workers.

Sabi ng DOH, noong mag-expire ang Bayanihan 2, nag-expire na rin ang issuance ng SRA. Mali ‘yun. Meron tayong liberal approach dito at marami na tayong nakausap na legal personalities tungkol dito. Nakalulungkot na kung sino pa ang dapat nakikipaglaban para sa kapakanan ng health workers ngayong pandemya, parang sila pa ang walang pakialam.

Ang mga health workers ay iniaalay ang kanilang sarili kaligtasan para makapagligtas ng buhay. Napakahirap bang intindihin nito? Barya lang halos ang benepisyong ‘yan, bakit kailangan nating ipagdamot sa mga taong bubuhayin ka kahit nasa bingit ka na ng kapahamakan?

Maging sensitibo sana ang mga kinauukulan sa gobyerno at bigyan ng hustisya ang health workers natin. Marami sa kanila, nagkakasakit na rin. At ‘pag gumaling, balik trabaho agad. Huwag natin silang pagdamutan ng tulong.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

‘Di pagdadamutan ng gobyerno… Healthcare workers, ‘wag mangamba sa kanilang special risk allowance

ni Sonny Angara - @Agarang Solusyon | August 21, 2021

Nakalulungkot ang mga pangyayari sa Afghanistan. Ang magagawa na lamang siguro natin sa ngayon ay ipagdasal ang kanilang mamamayan at ang kanilang bansa. At alam naman natin, kahit saang panig ng mundo, mayroong Pinoy, at kabilang sila sa mga naapektuhan.

Marami sa mga kababayan nating ililikas mula sa Afghanistan ay posibleng nangangamba sa kanilang pagbabalik-bansa dahil sa kawalan ng kasiguruhang trabaho. Maaari pa ngang sila lang ang natatanging breadwinner ng pamilya na ngayon ay nababahala sa maaari nilang sapitin dahil sa pangyayaring ito.

Dahil ang layunin ng gobyerno ay mailigtas sa tiyak na kapahamakan ang mga kababayan natin sa Afghanistan, dapat siguruhin din nila sa mga OFWs na may matatanggap silang benepisyo at ayuda sa sandaling magbalik bansa sila.

Base sa nilalaman ng Overseas Workers Welfare Administration (OWWA) Act of 2016, may maaasahang tulong ang mga OFWs na magbabalik-bansa matapos silang mawalan ng hanapbuhay sa ibayong-dagat. At sakali mang may isa sa kanila ang masawi o kaya’y lubhang masugatan bago i-repatriate, tatanggap sila ng tulong-pinansiyal hanggang P200, 000.

May nakalaan ding training at seminars para sa kanila para mas madali silang makahanap ng panibagong trabaho sa bansa. Liban d’yan, may probisyon sa naturang batas na nagsasabing maaaring mangutang ang mga repatriated OFWs sa Land Bank at sa Development Bank of the Philippines na babayaran nila sa mababang interes lamang.

Ang dependents at benepisaryo ng mga nagbalik-bansang OFW ay nakatakda ring bigyan ng educational assistance.

May kaukulan ding airport assistance para sa kanila, at pansamantalang matitirhan sa OWWA halfway house bago bumiyahe pauwi sa kani-kanilang bayan. Bibigyan din sila ng kaukulang panggastos para sa kanilang pagbibiyahe.

◘◘◘

Magagawan pa ng paraan para matanggap pa ng healthcare workers ang kanilang special risk allowance o SRA. Base ‘yan sa pagkumpirma mismo ng Department of Budget and Management kahit pa naibalik na sa national treasury ang P9.02B para rito.

At gusto lang nating bigyang-diin din — kahit nag-expire na ang Bayanihan 2 Law noong June 30, malinaw sa batas na magpapatuloy ang pagbibigay ng SRA sa healthcare workers hangga’t umiiral ang national emergency at hangga’t hindi binabaklas ni Pangulong Rodrigo Duterte ang deklarasyon niyang ito. Sa panahong ito na ang mga heath workers ang sandigan natin, huwag naman natin silang pagkaitan ng tulong. Hindi sila napapagod magserbisyo, huwag naman natin silang pagdamutan.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Para masiguro ang tuluy-tuloy na pagbangon ng ekonomiya... PH healthcare system, dapat pang

mas palakasin ng gobyerno.

ni Sonny Angara - @Agarang Solusyon | August 14, 2021

Magandang balita para sa bansa ang malaking economic growth sa second quarter ngayong taon, sa gitna ng patuloy na pananalasa ng COVID-19 pandemic na inaayudahan pa ng mga tumataas na kaso ng Delta variant.

Sa kabila nito, tayo ay nananawagan sa gobyerno na manatiling alerto, huwag maging kampante at kung maaari ay mas palakasin pa natin ang ekonomiya para na rin sa kapakanan ng lahat.

Sa unang tatlong buwan ng taong ito, bagsak na bagsak talaga tayo. Ngayong taon, lumakas ang ating industriya at umusbong ng 20.8 percent kumpara sa -21.8 percent na estado nito sa mga unang bahagi ng 2020.

Ngayong taon din, ang household consumption na itinuturing na malaking factor sa pagpapagalaw ng ating ekonomiya ay lumakas sa 7.2 percent sa second quarter ng taon, kumpara sa -15.3 percent rate nito sa second quarter ng 2020.

Ayon nga kay NEDA Secretary Karl Chua, malaki ang naitulong ng mas pinaluwag na quarantine restrictions sa mga unang buwan ng taon na nagbigay-daan upang mas gumalaw ang ating mga industriya, ang transportasyon at iba pang mahahalagang aspetong pang-ekonomiya.

Naniniwala naman tayong kung mas mapalalakas pa ng gobyerno ang laban nito sa pandemya sa pamamagitan ng pinaigting na healthcare system, contact tracing, isolation at pinabilis na vaccination effort, mas malaki ang tsansa na mas umalagwa pa ang ekonomiya ng bansa dahil masisiguro ang pagkontrol sa pagtaas ng mga kaso ng COVID.

◘◘◘

Dahil ngayon ay Araw ng Kabataan sa buong daigdig, nais nating batiin ang kabataang Pilipino na sa kabila ng murang edad ay aktibo sa iba’t ibang aktibidad na nakatutulong sa kani-kanilang mga komunidad.

Isa ang mga miyembro ng Sangguniang Kabataan sa ating mga hinihimok na maging aktibo sa pagsusulong sa tinig ng kanilang hanay upang mapalakas ang kanilang kapangyarihan bilang mga susunod na henerasyon ng mga pinuno ng ating bansa.

Nitong Marso ng kasalukuyang taon, pumasa sa ating komite sa Senado, ang Senate Committee on Youth ang ating panukalang-batas, ang Senate Bill 2124 na nag-a-amenda sa RA 10742 o ang SK Reform Act of 2015 na naglalayong pagkalooban ng kaukulang buwanang honoraria hindi lamang ang mga SK chairpersons, kundi maging ang SK members, ang kanilang mga secretary at treasurer.

Ang kabataan, kung bibigyan ng tamang oportunidad at pagpapahalaga ay kayang magtagumpay at magiging tulay ng kasalukuyan tungo sa mas magandang hinaharap.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com