2022 National Budget, dapat ipokus ng gobyerno sa pandemic response

ni Sonny Angara - @Agarang Solusyon | October 09, 2021

Nitong mga huling buwan ng taon, tutok na naman ang dalawang sangay ng Kongreso sa pagdinig sa National Budget para sa 2022. At tayo, bilang chairman ng Senate Committee on Finance ang mangunguna sa pagdinig sa pambansang pondo sa panig ng Mataas na Kapulungan.

Dalawang sunod na taon na ngayon na ang National Budget ay itinututok natin sa COVID response. Sa susunod na taon, sa kabila ng may kaliitang pondo na P5 trilyon, sisiguruhin nating mas prayoridad dito ang pagresolba sa iba’t ibang suliranin dulot ng pandemya.

Nakadidismayang sa sa nakaraang budget briefing ng Development Budget Coordination Committee o DBCC na pinangunahan ng ating komite, napansin ng inyong lingkod, gayundin ang ating mga kasamahan na wala man lang pokus sa COVID-19 ang panukalang National Budget.

Sa isinumiteng proposed budget ng Department of Budget and Management (DBM), nakita natin na walang kaukulang pondo na inilaan para sa contact tracing, walang pondo para sa testing (outside of booster shot), walang pondo para sa testing ng mga batang may gulang na 12 hanggang 17, wala ring pondo para sa contact tracing at wala pa ring pondo para sa Special Risk Allowance o SRA para sa ating health workers.

Nagkaintindihan na tayo, kasama ang Department of Interior and Local Government (DILG) na hangga’t hindi nawawala ang COVID-19, ito pa rin ang dapat pokus ng pondo para sa 2022.

Wala pa rin namang pagbabago ang bagsik ng pandemic. Sa katunayan, mas lumala. Kaya, hindi dapat isantabi ang pagresolba sa pandemya.

Nang dinggin natin sa Senado ang 2022 budget proposal ng DILG, nabatid natin na mas mababa nang halos P1-B ang kanilang pondo sa kasalukuyang alokasyon na umaabot ng P190.3-B kumpara sa P191.38-B 2020 budget nila. Malaking bahagi ng kanilang pondo ay inilalaan ng local governments sa kanilang laban sa COVID-19.

Dahil d’yan, ipinaalala natin sa DILG na nung nakaraang taon, nagawa namang dagdagan ng mga senador ang kanilang pambansang pondo.

At dahil 85 porsiyento ng DILG family budget ay nabubuhos sa personnel services, ikokonsidera natin sa Senado ang pagbili ng mas maraming body cams, police cars, dagdag na fire stations at marami pang iba na malaki ring kapakinabangan sa departamento.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Bigyang-pugay ang solidong sakripisyo ng mga health workers

ni Sonny Angara - @Agarang Solusyon | October 2, 2021

Nitong Lunes, agad na lumusot sa Senado ang Senate Resolution 916 na ating in-sponsor sa Senado. Ito ay bilang pagkilala, at pagbibigay-pugay sa ating mga bayaning doktor, kasabay ng pagdiriwan ng National Physicians’ Day.

Alam n’yo, tulad ng ating mga sundalong patuloy na nakikipagbakbakan sa mga kalaban kahit nagkakaubusan na ng bala habang nasa gitna ng war zones, ang ating mga doktor ay ganun din.

Sa mga unang araw nang sagpangin tayo ng pandemya, sa kabila ng kakulangan ng kongkretong impormasyon tungkol sa COVID-19, hindi nag-atubili ang ating mga doktor na gamutin ang mga tinamaan nito, kahit ang ibig sabihin pa nito ay matinding panganib sa kanilang buhay. Kahit kulang na kulang sa mga nauukol na gamit, tuloy lang sa serbisyo. Ganyan ang mga bayani. Walang inuurungang laban. Handang magsakripisyo.

Ngayong patuloy ang roll out ng vaccines, nangunguna pa rin ang mga doktor sa pagsigurong ligtas ang proseso ng vaccination.

Ngayong pandemya, napakarami sa atin ang patuloy na nawawalan ng pag-asa na babangon pa tayo sa krisis. Dito natin makikita ang tunay na kahalagahan ng ating mga doktor. Hindi lang sila nariyan para gumamot ng mga pasyente – nariyan din sila para bigyan tayo ng pag-asa.

Ang kanilang pagsisikap, pagsasakripisyo at paggamit ng kanilang talino laban sa pandemya ang makatutulong sa atin upang unti-unti tayong makabalik sa normal na pamumuhay.

Marami na sa ating mga physician ang tinamaan ng sakit at may mga pumanaw habang nasa aktibong pagganap sa kanilang sinumapaang tungkulin.

Marso nang nakaraang taon, nang magsimulang hagupitin tayo ng pandemya. At mula Marso 2020 hanggang Setyembre 2021, mahigit 20,000 healthworkers natin ang nagkasakit dahil sa COVID at 105 sa kanila ang namatay dahil dito. Pero ang pangayyaring ‘yan, hindi nagpahina sa kanilang kalooban, bagkus, mas lalo pang nagpaigting sa kanilang tapang na labanan ang karamdamang ito. Solidong kabayanihan na kinakailangang kilalanin at parangalan.

Ang ating resolusyon ay sinuportahan ng magigiting nating mga kasamahan sa Senado na kinabibilangan nina Senators Migz Zubiri, Richard Gordon, Nancy Binay, Joel Villanueva, Imee Marcos at Pia Cayetano.

Ang National Physicians’ Day ay naisabatas noong 1978 sa pamamagitan ng Presidential Proclamation 1789 na nagbibigay pagkilala sa mga doktor dahil sa kanilang tapat na pagsisilbi nang walang pinipiling oras, kasarian, estado sa lipunan, lahi at relihiyon makatulong lang sa mamamayan.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Pondo para sa Medical Scholarship Law, ilabas na!

ni Sonny Angara - @Agarang Solusyon | September 25, 2021

Mabilis na lumusot sa Senado nitong nakaraang araw ang pagpasa sa proposed budget ng Office of the President (OP) na nagkakahalaga ng P8.182-B.

Base sa kanilang inilatag na breakdown sa panukalang pondo, P5.1-B ang ilalaan sa Presidential Oversight Program; P916-M para sa Presidential Executive Staff Services Program; P85-M para sa Presidential Legal and Legislative Services Program at P84-M para sa Presidential Advisory Program.

Halagang P4.5-B din ang hiniling ng OP para sa kanilang confidential and intelligence budget para sa 2022 na katulad ding halaga sa kasalukuyan nilang intel budget ngayong taon.

Ang Presidential Management Staff o PMS naman ay nagpanukala ng P751.1 milyong budget para sa susunod na taon.

Ayon sa tanggapan ng Pangulo, sa kasalukuyan nilang confidential and intelligence budget, gumastos sila ng P2.95-B. Ito ang isinagot ng OP nang busisiin ng mga senador hinggil sa katayuan ng kasalukuyang intel budget.

Agaran man nating ipinasa ang budget ng OP sa ilalim ng Senate Committee on Finance na pinamumunuan ng inyong lingkod, hiniling pa rin ng mga senador sa OP sa pangunguna ni Executive Secretary Salvador Medialdea ang agarang paglalabas sa pondong inilaan ng mga mambabatas para sa iba’t social at local infra projects na inaprubahan sa ilalim ng 2021 GAA. Umaabot ang pondong ‘yan sa mahigit P100 bilyon, na minarkahan ni Pangulong Duterte na FLR o for later release nung lagdaan niya ang 2021 budget nung nakaraang Disyembre.

Partikular na hiniling natin sa tanggapan ng Pangulo ang pondo para sa implementasyon ng RA 11509 o ang Doktor Para sa Bayan Act. Nilalayon ng batas na ito na makapagbigay ng medical scholarship para sa mga mag-aaral na nais maging doktor.

Kailangan kasi talaga natin ngayon ng mga karagdagang medical practitioner para makatulong sa atin sa COVID-19 response. Ang problema nga, wala pang ipinalalabas ng pondo para sa pagpapatupad nito.

Kung lalabas lang ang pondong ‘yan, mas marami sanang mapaggagamitang proyekto at maraming trabaho pa ang malilikha. Noong hagupitin tayo ng COVID, milyun-milyong kababayan natin ang nawalan ng trabaho. Sa pondong P100-B, marami sanang natulungan ‘yan kung agad na naipalabas.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com