ni Sonny Angara - @Agarang Solusyon | September 18, 2021
Simula na naman ng masinsinang trabaho ng dalawang sangay ng Kongreso dahil kailangan na naman nating magpasa ng National Budget para sa susunod na taon. Ibig sabihin, dito muna sa usaping ito tututok ang mga mambabatas dahil kritikal ang isyu sa pambansang pondo.
Napakahirap ng kakaharapin nating pagdedebate para sa 2021 General Appropriations Act, hindi lamang dahil sa mga masalimuot na usapin kundi dahil hanggang ngayon ay lubog sa krisis ang bansa dulot ng pandemya.
Alam naman siguro nating lahat na nakapasok na sa bansa ang iba’t ibang uri ng COVID-19 at pinakamatindi sa mga ito ang Delta variant. At kung mapapansin natin, napakabilis ng mga pangyayari. Pati ang pangangailangan ng ating frontliners, mas matindi na ngayon dahil nga sa hindi makontrol na pagtaas ng mga kaso ng COVID sa kasalukuyan.
Walang binatbat ang takot natin noong nagsisimula pa lang ang COVID sa takot natin ngayon. 'Yung bilang ng mga kaso, parang kada araw, doble-triple ang dumaragdag. Kaya kung anuman ang nilalaman ng budget proposal ng Ehekutibo sa pamamagitan ng Department of Budget and Management, dapat “swak” sa bilis ng pabagu-bagong estado ng COVID sa bansa.
Base sa ating Konstitusyon, inaatasan ang Pangulo ng bansa na magsumite sa Kongreso ng kanyang proposed National Budget sa loob ng 30-araw. Magsisimula ang palugit na ito mula sa pagbubukas ng regular na sesyon o kaya ay sa ikatlo o ikaapat na linggo ng Agosto taun-taon.
At dahil d'yan, inaatasan din ang mga ahensiya ng gobyerno na magsumite ng kani-kanilang budget proposal sa pagsisimula pa lang ng taon para mabigyan din ng malawak na pagkakataon ang DBM na ihanda ang sandamakmak na dokumentong ito na ipadadala nila sa Kongreso para sa kaukulang pagbusisi. Ang budget proposals ay kailangang makarating sa Kongreso sa ikaapat na Lunes ng buwan ng Hulyo kada taon. Ganun ang nakagisnang sistema na nabago dahil sa pandemya.
Kaya ang suhestiyon natin ngayon, bigyan ng pagkakataon ang mga government agency na pag-aralan nang mabuti ang kanilang panukalang budget at hayaang isailalim sa rebisyon kung kinakailangan.
Noong nakaraang linggo, sa budget briefing ng DBCC o Development Budget Coordinating Committee kaugnay sa P5.024 trilyong national budget for 2022, nabigo tayong makita ang mga kritikal na probisyon na sasagot sa krisis. Kasama sa mga hinahanap nating probisyon ang pagbabakuna sa mga bata, ang SRA o special risk allowance para sa ating health workers, cash aid o ayuda, pagpapautang sa micro, small at medium enterprises, pondo para sa testing at contact tracing.
Sa paliwanag ng DBM kaya wala raw ang probisyon para sa vaccination of children, dahil ang partikular na pinondohan sa 2022 NEP ay ang pagbili ng booster shots para sa mga bakunadong indibiduwal na nagkakahalaga ng P45B. Hindi napondohan ang bakuna para sa mga batang 12-17 taong gulang dahil inamendahan ng FDA ang emergency use authorization ng Pfizer-BioNTech nitong Hunyo.
May katanungan ka ba, reklamo o nais ihingi ng tulong? Sumulat sa AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com