Payagan ang pribadong sektor na bilhan ng booster shots ang kanilang empleyado

ni Sonny Angara - @Agarang Solusyon | December 04, 2021

Nakikiusap ang pribadong sektor sa pamahalaan na kung maaari ay bigyan sila ng mga bakuna na maaari nilang magamit bilang COVID-19 vaccine booster shot para sa kani-kanilang empleyado.

Sa ating palagay, dapat itong suportahan ng gobyerno, dahil unang-una, hindi lang sapat kundi halos mag-umapaw na ang mga dumarating na bakuna sa ating bansa.

Pangalawa, marami umano sa mga bakuna ay malapit nang mag-expire. Kaya’t mas makabubuting magamit na agad ang mga ito kaysa naman masayang lang.

Ayon sa pinag-isang pahayag ng business organizations sa bansa, hinihiling nila sa pamahalaan na dahil may oversupply naman tayo ng vaccines, kung maaari ay bahaginan sila para sa kapakanang pangkalusugan ng kanilang empleyado at ng pamilya ng mga ito.

Para sa atin, rasonable ang kahilingang ito ng mga kaibigan natin sa pribadong sektor.

Alam nating marami pa sa adult population natin ang nananatiling hindi pa bakunado.

Pero sana, manghinayang din tayo sa mga bakunang magpapaso, na posibleng agad pang magagamit ng private sectors kung ibahagi na lang natin ang mga ito sa kanila.

At kaugnay niyan, makikiusap na rin tayo sa mga kababayan nating hindi pa nagpapabakuna hanggang ngayon — please lang, para rin sa inyong kaligtasan ito — magpabakuna na tayo.

Huwag tayong basta na lang maniwala sa mga paninira sa COVID-19 vaccines dahil mas malaki ang tsansa na malagay pa tayo sa alanganin kung hindi tayo makikinig sa mga eksperto.

At muli, panawagan natin sa ating mga kinauukulan, pagbigyan sana natin ang kahilingan ng pribadong sektor. Para rin ito sa kapakanan ng mga kababayan nating nasa kanilang pangangalaga.

Sa pagkakataong ito, mas maipakikita natin ang tunay na pagmamalasakit lalo pa’t may kakayahan naman ang gobyerno na pagbigyan sila sa pakiusap nilang ito.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Pagpasa ng 2022 P5.024 trilyong nat’l budget, posible sa unang linggo ng Disyembre

ni Sonny Angara - @Agarang Solusyon | November 27, 2021

Sa loob ng pitong araw ay natapos ng Senado, sa pangunguna ating komite (Senate Committee on Finance) ang budget debates kaugnay sa P5.024 trilyong 2022 national budget.

At muli, kahit naipahatid na natin ang ating pasasalamat sa ating mga kasamahang senador na talagang nakipagpuyatan gabi-gabi hanggang madaling-araw, partikular ang ating mga vice-chairpersons, ang kani-kanilang staff, magpapasalamat pa rin tayo sa kanila sa pamamagitan ng pitak nating ito.

Kung hindi dahil sa kanilang pakikiisa at sa matiyagang interpelasyon, malamang ay hindi tayo umabot sa target nating deadline para matapos ang debate.

At dahil dito, posibleng pumasa na sa ikalawa at ikatlo o pinal na pagbasa ang proposed national budget sa unang linggo ng Disyembre upang matiyak na agad itong malagdaan ng Pangulo upang may panibago tayong gagamiting pondo para sa susunod na taon.

***

Patungkol naman sa panukala ng Mababang Kapulungan na palawigin pa ang validity ng 2021 national budget, pabor tayo rito.

Unang-una, kailangang magtuluy-tuloy ang disbursement of funds para sa mahahalagang proyekto na nabimbin dahil sa pandemya.

Suportado natin ang 2021 budget extension at umaasa tayong maging ang mga kasamahan natin sa Senado ay kakatig din sa proposisyong ito.

Batid nating lahat na maraming proyekto at budget implementation ang nagkaproblema ngayong taon dahil sa mga ipinatupad na lockdown dahil sa pagtaas ng COVID cases nitong mga unang buwan ng taon.

Maraming pondo ang bumalik sa national treasury dahil hindi naituon sa mga kinakailangang proyekto at programa dahil sa mga restriksiyong ipinatupad ng gobyerno kaugnay sa pandemic.

Makatutulong sa ating economic recovery kung papayagan ng Kongreso ang ilang ahensiya na ipagpatuoy ang kanilang mga naudlot na proyekto at programa dahil sa pinagdaraanan nating krisis.

Maging ang napakagaling nating Minority Leader na si Sen. Frank Drilon, suportado rin niya ang panukalang ito, kasabay ang panawagang kailangang pagsikapan ng mga ahensiya ng gobyerno na magamit o maigastos sa mga nauukol na programa at proyekto ang mga ipinagkakaloob na pondo sa kanila.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Malapit na ang pagbabalik ng normal na pamumuhay…Pagbabalik ng F2F classes, nagbigay-pag-asa

ni Sonny Angara - @Agarang Solusyon | November 20, 2021

Kamakailan, pinasimulan na sa ilang lalawigan ang muling pagpapatupad ng face-to-face classes para sa mahigit 100 paaralan na isinali sa pilot run. Marami ang umayon sa hakbang na ito ng gobyerno dahil napakalaking abala nga naman ng pandemya sa sistema ng ating edukasyon.

Malaking hamon, lalo na sa mga pamilya ang distance at blended learning. Unang-unang problema, ang napakabagal na koneksiyon ng internet, dahilan upang hindi makadalo sa klase ang mga bata o kaya naman ay ma-late at hindi makahabol sa daily lessons.

Ang pagbubukas ng ilang pampubliko at pribadong paaralan ngayong buwan ang nagbigay-pag-asa sa atin na talagang nalalapit na tayo sa pagbabalik ng normal na pamumuhay. Isa sa malalaking posibilidad kung bakit unti-unti na tayong bumabalik sa dati ay ang pagdami ng bilang ng mga kababayan nating bakunado, gayundin ang ating disiplina at pagsunod sa mga ipinatutupad na health at safety protocols.

Sa pagdinig ng Senado sa panukalang budget para sa 2022, ilang katanungan ang nais nating masagot — gaano nga ba tayo kahanda na muling bumalik sa normal ang ating education system?

Noong silipin kasi natin ang isinumiteng National Expenditure Program (NEP) ng DBM, at ang General Appropriations Bill (GAB) na inaprubahang bersiyon naman ng Kamara, wala tayong nakitang pondo para sa paghahanda sa face-to-face classes. Siguro, dahil nang sinulat o binubuo pa lamang ng mga kinauukulan ang 2022 budget ay wala pa talaga silang plano na ibalik sa normal ang sistema dahil nga sa patuloy na pagtaas ng COVID cases noong mga panahong ‘yun.

Bilang sagot, at para makatulong din tayo sa problemang ito, ipinanukala ng ating komite, ang Senate Committee on Finance, na itaas ang 2022 budget ng DepEd. Ito ay para maging handa tayo sa posibilidad na darami pa ang mga paaralan na magpapatupad ng face-to-face classes sa mga darating na buwan.

Ipinanukala rin ng ating komite na dagdagan ang pondo ng 116 SUCs na kinabibilangan ng University of the Philippines System.

Maliban sa mga nabanggit, dagdag-pondo rin ang suhestiyon ng ating komite para sa implementasyon ng Alternative Learning System o ALS at sa Special Education Program ng DepEd. Layunin natin dito na walang maiiwang bata o estudyante sa larangan ng edukasyon.

Ang mga kababayan nating walang kakayahan para sa formal education ay maaari pa ring makapag-aral sa pamamagitan ng ALS at SPED. Ipinanukala rin natin na itaas ang pondo ng Last Mile Schools Program na itutuon sa konstruksiyon ng mas marami pang eskuwelahan, tech-voc laboratories, water and sanitatioin facilities at instalasyon ng solar panels sa malalayong probinsiya.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com