Agarang pagpirma sa pambansang budget, malaking tulong sa mga biktima ng bagyo

ni Sonny Angara - @Agarang Solusyon | January 04, 2022

Tayo’y nagpapasalamat kay Pangulong Rodrigo Roa Duterte sa kanyang agarang pagsasabatas at paglalagda sa 2022 national budget.

Malaking pasalamat din sa mga kasamahan nating senador na tulad ng inyong lingkod ay araw-araw ding nagpupuyat at nagsisikap, maisulong lang ang panibagong budget para sa susunod na taon.

Dahil alam nating lahat ang dagok na inabot ng ating mga kababayang sinalanta ng Bagyong Odette, napakalaking tulong ang maipaaabot ng gobyerno sa ating mga kababayan sa pamamagitan ng pambansang budget.

Ang Senado, sa pangunguna ng Senate Committee on Finance na ating pinamumunuan ay walang pagod na nagsagawa ng masinsinang pag-aaral sa national budget. Ito ay para masiguro nating papasa sa nauukol na panahon ang pambansang pondo para sa susunod na taon.

Matindi ang pangangailangan ng mga lugar na nasalanta ng bagyo at mahalaga na maibuhos sa maagang panahon ang pera para mas maagang maipatayo ulit ang mga nasirang bahay, ospital, paaralan at iba pang imprastraktura at makabangon ang lahat ng naapektuhan.

***

Nakababahala ang bantang “PhilHealth holiday” ng mga pribadong ospital dahil mangangahulugan itong pagtanggi sa PhilHealth coverage ng mga pasyenteng miyembro nito.

Gayunman, sa isang banda, naiintindihan din natin kung saan nanggagaling ang bantang ito ng organisasyon ng mga pribadong ospital dahil sa hindi pa rin nareresolbang problema nila sa mga utang sa kanila ng PhilHealth.

May panukala ang mga kasamahan nating senador na atin ding inaayunan, upang matiyak na maayos ang estado ng pananalapi ng PhilHealth.

Ito ay ang paglilipat ng pangangasiwa ng nasabing ahensiya sa ilalim ng Department of Finance (DoF). Sa pamamagitan nito, ang pinansiya ng PhilHealth ay maiaayon sa prosesong ipinatutupad ng financial services industry.

Dahil financial insurance ang PhilHealth, mas makabubuti nga siguro na Finance department din ang hahawak sa kanila at hindi ang health department. Mas matutugaygayan nila ang takbo ng pondo, kung sasailalim sila sa pangangasiwa ng DoF.

Sa usaping pinansiyal, dapat ang nagmamantine niyan, finance professionals, actuaries and management experts. Siguro naman, pansin nating lahat na wala sa hulog ang finance management ng PhilHealth. Kaya nga lumaki nang ganito ang problema at lumobo sa bilyun-bilyon ang utang nila sa private hospitals.

Dapat nga, dahil may Universal Health Care Law na tayo, mas maging malakas at mahusay na ang PhilHealth. Pero, ano nangyari? Bakit mas lalong nanghina yata? Sila ang pinaka-sadsad na health arm ng ating health system.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Tulong at dasal, ialay natin sa mga ‘Odette’ victims

ni Sonny Angara - @Agarang Solusyon | December 28, 2021

Una sa lahat, tayo ay nakikidalamhati sa ating mga kababayang hinagupit ng Super Typhoon Odette at patuloy na nananalangin ng kanilang kaligtasan sa kabila ng unos na ito.

Pinadapa ni Odette ang mga rehiyong kinabibilangan ng Regions 4-B, 6, 7, 8, 10 at 13. Sa dami ng mga bayang sakop ng mga rehiyong ito, hindi natin lubos-maisip kung paanong nakararaos ang mga kababayan natin sa araw-araw.

Noong Martes, idineklara ni Pangulong Rodrigo Duterte ang state of calamity (SOC) sa mga naturang rehiyon at inaasahang tatanggap ng suporta ang mga lokal na pamahalaan ngayong linggong ito. Ito ay upang matiyak na mas mapalalawak pa ang tulong ng gobyerno sa mga nasalanta.

Magba-Bagong Taon, at ito ang sinapit ng mga kababayan natin. Sana, sa mga nakaluluwag sa buhay, mag-abot din tayo ng kaunting tulong o taimtim na panalangin para sa kaligtasan ng ating mga kababayan at ng kani-kanilang lalawigan.

Maikukumpara natin ang tindi ng bagyong ito sa Yolanda, pero mas maraming lugar ang apektado nito. Bagama’t wala pang mga opisyal na report hinggil sa lawak ng nasalanta at nasawi nating mga kababayan, patuloy ang pagbuhos ng mga ulat galing sa mga kinauukulang nakatututok sa suliraning ito.

***

Bago matapos ang buwan, posibleng lagdaan na ni Pangulong Duterte ang panukalang P5.024 trilyong national budget para sa susunod na taon (2022).

Posibleng minamadali na rin ng Pangulo ang pagsasabatas ng budget para makatulong din sa mga sinalanta ni ‘Odette’.

Nabatid natin sa Presidential Legislative Liaison Office (PLLO) na mamadaliin ng ang paglagda sa proposed national budget para makaagapay din sa mga pangangailangan ng mga rehiyong sinagasaan ng bagyo.

Ayon sa PLLO, maaaring pirmahan ng Punong-Ehekutibo ang Pambansang Budget noong Disyembre 27.

Uunahan na natin ng pasasalamat ang Pangulo sa kanyang ipinakikitang pag-alala sa ating mga kababayan, sa pamamagitan ng agarang paglagda sa 2022 national budget.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

2021 national budget hanggang Disyembre 2022, aarangkada na!

ni Sonny Angara - @Agarang Solusyon | December 11, 2021

Matapos lumusot sa ikalawang pagbasa (second reading) ng Senado ang panukalang pagpapalawig o ekstensiyon sa 2021 budget hanggang sa December 2022, inaasahan natin ang pinal na pagpasa nito sa plenaryo sa susunod na linggo.

Tinutukoy natin dito ang House Bill 10373 na naglalayong amendahan ang Sec. 62 ng general provisions ng RA 11518 o ang General Appropriations Bill na naglalaman ng 2021 national budget.

Isinulong natin ito dahil sa totoo lang, nitong nakalipas na dalawang taon, naging napakahirap para sa gobyerno ang pagkilos dahil sa pandemya. Maraming proyekto at programa ang naapektuhan dahil sa iregular na pagbubukas ng mga tanggapan ng mga ahensiya. Dahil dito, minabuti natin ang pagpapatupad ng FLR o for later release.

Dahil kung noon ngang wala pang pandemya, hirap na tayong mag-comply sa cash-based budgeting, paano pa ngayong nasa krisis tayo?

Bagaman may mga hindi pabor sa panibagong ekstensiyon ng budget, umaasa tayong itong 2021 budget na ang huling magpapatupad ng extension validity. Sa 2022 national budget, naglagay tayo ng isang seksiyon na tumutugon sa mabagal na paggamit ng pondo ng mga ahensiya ng gobyerno.

Base sa Sec. 61 ng general provisions ng panukalang P5.024 trilyong pondo para sa 2022 (na patuloy pa ring tinatalakay ng bicameral conference committee), magkakaroon ito ng hybrid system na magdaragdag ng ekstrang dalawang taon para sa obligation and disbursement.

Layunin natin d’yan na maalis na ang budget extensions.

***

Bago natin makalimutan, nais muna nating ipaabot ang pagbati sa ating kaibigang si G.

Al Panlilio na muling nahalal bilang pangulo ng Samahang Basketbol ng Pilipinas.

Magandang pangyayari ito para sa SBP dahil naghahanda na tayo sa ating pagho-host sa FIBA World Cup sa 2023.

Ang inyo namang lingkod at si Cong. Robbie Puno ay nananatili pa ring chairman at vice chairman, ayon sa pagkakasunod, at si G. Manny V. Pangilinan bilang chairman emeritus ng Board of Trustees.

Binabati rin natin si G. Ricky Vargas na nahalal naman bilang PBA Chairman.

Umaasa tayo na sa kabila ng pananatili ng pandemya, mas mapalalakas natin ang ating hanay na isasabak sa FIBA World Cup 2023.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com